အပြေး လေ့ကျင့်ခန်းကို လိုအပ်သည်ထက် ပိုလျှင် ကျန်းမာရေး ဆုတ်ယုတ်မှုကို ခံစားရနိုင်

ဝါရှင်တန် ၊ ၆-၂-၂၀၁၅

ကျန်းမာရေး အပြေး လေ့ကျင့်ခန်းကို လိုအပ်သည်ထက် ပိုလုပ်လျှင် ကျန်းမာရေး တိုးတက် ကောင်းမွန်လာမည် မဟုတ်ဘဲ အပြေး လေ့ကျင့်ခန်း လုံးဝ မလုပ်သူအတိုင်း ကျန်းမာရေး ဆုတ်ယုတ်မှု ကိုသာ ခံစားရမည်ဟု အမေရိကန် နှလုံးဘက် ဆိုင်ရာကောလိပ် မှ သုတေသီ များက ဆိုသည်။

သိပ္ပံပညာရှင် များက ကျန်းမာရေး အပြေး လေ့ကျင့်သူများ နှင့် မပြေးသူများ စုစုပေါင်းဦးရေ ၁ဝဝဝ ကျော်ကို ၁၂ နှစ်ကြာ စောင့်ကြည့် လေ့လာခဲ့ရာ ခပ်မှန်မှန် ခြေလှမ်းဖြင့် တစ်ပတ်လျှင် ၂ နာရီခွဲခန့် ပြေးသူများသည် အခြားသူများ နှင့် နှိုင်းယှဉ်လျှင် အသက် သေဆုံးနိုင်ခြေ အနည်းဆုံး ဖြစ်ပြီး တစ်ပတ်လျှင် ၄ နာရီကျော် ပြေးသူများနှင့် လေ့ကျင့်ခန်း လုံးဝ မလုပ်သူများ သည် သေဆုံးနိုင်ခြေ အမြင့်ဆုံး ဖြစ်နေသည်ကို တွေ့ရှိခဲ့ခြင်း ဖြစ်သည်။

''ကျန်းမာရေး အပြေး လေ့ကျင့်မယ် ဆိုရင် တစ်နာရီကို ငါးမိုင်နှုန်းနဲ့ တစ်ပတ်ကို ၃ရက်၊ စုစုပေါင်း ပြေးချိန် ၂ ဒသမ ၅ နာရီက အသင့်လျော်ဆုံး ဖြစ်ပါတယ်။ ဒါထက် ပို အားစိုက်ထုတ် လိုက်မယ်ဆိုရင် ကျန်းမာရေး အကျိုး သက်ရောက်မှု မရှိတော့ဘဲ ဘာ ကျန်းမာရေး လေ့ကျင့်ခန်းမှ မလုပ်သူ အတိုင်း ခံစား ရနိုင်ပါတယ် .. '' ဟု သုတေသီ တစ်ဦး က ပြောပြသည်။

''ကျန်းမာရေး အတွက်ပဲ ဆိုရင် သိပ်ပြင်းပြင်း ထန်ထန် လုပ်ဖို့ မလိုပါဘူး။ ပြီးတော့ သိပ်ပြင်းပြင်း ထန်ထန်လဲ မလုပ်သင့်ဘူး။ ကမ္ဘာ ပေါ်မှာ အလွန်အကျွံ လုပ်ရင် အန္တရာယ်ရှိတဲ့ လေ့ကျင့်ခန်း ထဲမှာ အပြေး လေ့ကျင့်ခြင်းက ထိပ်ဆုံးက ပါပါတယ်။ တအားပြေးရင် နှလုံးခုန်နှုန်း အပြောင်းအလဲ ကလဲ ပြင်းထန် လာတဲ့အတွက် ခံနိုင်ရည် မရှိရင် ကျန်းမာရေးက ပိုပြီး ဆိုးရွား သွားနိုင်တာပါ ... '' ဟု ၄င်းသုတေသီ က ဆက်လက် ပြောပြသည်။

ကျန်းမာရေး အပြေး လေ့ကျင့်ခြင်းကို ရေရှည် ပြုလုပ်မည့် အစား ခပ်ဆတ်ဆတ်လေး လမ်းလျှောက် ပေးခြင်းက ပို၍ သင့်တော်ကြောင်း၊ နှလုံး ကျန်းမာရေး အတွက် မာရသွန်လောက် နီးနီးပြေးရန် မလိုအပ်ကြောင်း၊ ခပ်ပေါ့ပေါ့၊ ခပ်တိုတို ပြေးရုံမျှဖြင့် ဘဝသက်တမ်း တွင် နှစ်များ ပေါင်းထည့် ပေးနိုင်မည် ဖြစ်ကြောင်း၊ တစ်ပတ်လျှင် မိနစ် ၁၅ဝ ထက်ပို၍ ကျန်းမာရေး အပြေး လေ့ကျင့်ခြင်း မပြုလုပ် သင့်ကြောင်း သုတေသီ များက သတိပေး ထားသည်။

''အသက်အရွယ်နဲ့ ဆိုင်ပါတယ်။ များများပြေးရင် နှလုံးက များများ အလုပ်လုပ် ရမယ်။ အဲဒီအတွက် သွေးလွှတ်ကြော သွေးပြန်ကြော တွေက ဖွဲ့စည်းပုံ ပြန်ပြင်ရမယ်။ အသက် ၅ဝ နောက်ပိုင်းမှာ အဲဒီ ပင်မသွေးကြော ကြီးတွေကို ပုံစံပြင်ဖို့ ဆိုတာ အန္တရာယ် များပါတယ်။ ဒါကြောင့် မိမိ အသက်အရွယ် က ခံနိုင်တဲ့ အားကစား လေ့ကျင့်မှုမျိုးပဲ ပြုလုပ်ရမှာ ဖြစ်ပါတယ် .. '' ဟု သုတေသီ တစ်ဦးက ပြောပြ၍ သိရသည်။

#Yadanarpondaily

#ရတနာပုံနေ့စဉ်

http://ift.tt/1xxTIoA

from သစ်ထူးလွင် (ကျန်းမာရေး) - Thit Htoo Lwin http://ift.tt/1uihQAG