မျက်စိမှုန်ခြင်း

မျက်စိမှုန် သူများ မျက်မှန်တပ်လျှင် ပိုမှုန်သည်ဟု ထင်မှတ်ကြသည်။ ထို့ကြောင့် မျက်စိ မှုန်လာပြီး ပါဝါ အလွန်အကျွံ တက်မှသာ မျက်စိကို အထူးဂရုစိုက် ကြသည်ကို တွေ့ရ တတ်သည်။ တစ်ဦးနှင့် တစ်ဦး အမြင် အာရုံချင်း မတူညီကြ သဖြင့် မျက်စိ ကျန်းမာရေးကို ဂရုစိုက်သင့် ပါသည်။

စက္ခုအာရုံ၌ သာမန်ပုံရိပ်မှာ အဝေးမှ လာနေသည့် အရာဝတ္ထုများ၏ ပုံရိပ်ကို မျက်စိရှိ မှန်ဘီလူးသို့ ဖြတ်၍ အမြင်အာရုံလွှာ ပေါ်မှာ ကျလေ့ရှိသည်။ အာရုံလွှာ၏ သဘောက ဓာတ်ပုံဖလင် ကော်ပြားနှင့် တစ်ထပ်တည်း ပင်ဖြစ်သည်။ ဓာတ်ပုံ ရိုက်သည့်အခါ ဖလင်ကော်ပြား ပေါ်မှ ပုံရိပ်များ ကဲ့သို့ မြင်လွှာပေါ်တွင် မျက်စိရှေ့၌ ရှိသည့် အရာဝတ္ထု၏ ပုံရိပ် လာထင် တတ်သည်။

ထင်ဟပ်လာသည့် ပုံရိပ်များကို အာရုံကြောမှ ထွက်လာသည့် စက္ခု အာရုံကြော၏ အကူအညီဖြင့် ဦးနှောက်သို့ ပံ့ပိုး ပေးသည်။ ဦးနှောက် အနောက်ဘက်ရှိ စက္ခုအာရုံ ခံစားရာ ဗဟိုဌာနမှ အဓိပ္ပာယ် ဖွင့်ဆို ပေးခြင်းဖြင့် မျက်စိတွင် မြင်ရသည့် အရာဝတ္ထု များ၏ ပုံသဏ္ဌာန် အရောင်အဆင်း တို့ကို တိကျစွာ ခွဲခြားနိုင်သည်။

အနီးရှိ အရာဝတ္ထုကို ကြည့်သည့် အခါ စက္ခု မှန်ဘီလူး၏ ပုံသဏ္ဌာန် ပြောင်းလဲ ပေးခြင်းဖြင့် မျက်စိရှေ့နားရှိ အရာဝတ္ထု များကို ပြတ်သားစွာ မြင်ရသည်။ မျက်စိ ပြောင်းလဲမှု သာမက မျက်စိ အတွင်းဘက် ကိုပါ စောင်းပေး ရသည်။ ပြောင်းလဲ လှုပ်ရှားမှု နှစ်မျိုးလုံး အစဉ်ဒွန်တွဲ လျက်ရှိသည်။

မျက်စိမှုန်ခြင်း ကြောင့် မအီမသာ ဖြစ်ခြင်း၊ စိတ်အား လျော့ခြင်း၊ စိတ်ဆင်းရဲ ပင်ပန်းခြင်း၊ အိပ်မပျော်ခြင်း တို့ ဖြစ်လာနိုင်သည်။ မျက်စိမှုန်ပြီး မျက်စိ ညောင်းညာ ကိုက်ခဲလေ့ ရှိသူများ သည် တစ်နေ့တာ အလုပ်လုပ်ပြီး ညနေပိုင်း တွင် အဖြစ်များသည်။

အဝေးမှုန်ခြင်းမှာ အနီးရှိ အရာဝတ္ထုများ ကို ကောင်းစွာ မြင်ရသော်လည်း အဝေးရှိ အရာဝတ္ထုများကို ကြည်လင် ပြတ်သားစွာ မမြင်ရခြင်း ဖြစ်သည်။ မျက်ကြည်လွှာ သည် ညီညာသည့် စက်ဝိုင်းလုံး မျက်နှာပြင် မဖြစ်ခြင်း၊ မျက်စိ မှန်ဘီလူး အခုံး မညီညာခြင်း၊ ချို့ယွင်းခြင်း များကြောင့် ပြင်ပမှနေ၍ မျက်စိ မှန်ဘီလူးကို ဖြတ်ပြီး အလင်းတန်း များသည် အာရုံပေါ်မှ အစက် တစ်ခုတည်းမှ နေပြီး ပုံရိပ်မထင် သဖြင့် မျက်စိမှုန်ခြင်း ဖြစ်တတ်သည်။

အနီးမှုန်ခြင်း သည် အသက် ၁၅ နှစ်မှ ၄ဝ နှစ်အတွင်း စ၍ မှုန်တတ်ပြီး အသက်ကြီး သည့်အခါ မှန်ဘီလူး အနေအထား ပြုပြင် ပေးနိုင်သော စွမ်းရည် လျော့နည်း လာသဖြင့် အနီးမှုန်လေ့ ရှိသည်။ အသက် ၇ဝ နှစ်ခန့် တွင် စက္ခု မှန်ဘီလူး၏ အနေအထားကို ပြုပြင်နိုင်စွမ်း လုံးဝ မရှိသလောက် ဖြစ်လာကာ သက်ကြီး မျက်စိမှုန်ခြင်း ဖြစ်တတ်သည်။

ဒေါက်တာလွင်သန့် (ဆေး-၂)

#Themyawadydaily

#မြ၀တီနေ့စဉ်

http://ift.tt/1zfEI5n

from သစ်ထူးလွင် (ကျန်းမာရေး) - Thit Htoo Lwin http://ift.tt/155veME