ပင်လယ်ပြင်တွင် မျောပါနေသော ရေလုပ်သား ၁၇၄ ဦးကို ထပ်မံဆယ်ယူ

တပ်မတော်(ရေ)စစ်ရေယာဉ်များမှ ပင်လယ်ပြင်မျောပါနေသော ရေလုပ်သား ၁၇၄ ဦးကို

ဒုတိယအကြိမ် ထပ်မံဆယ်ယူခဲ့ပြီး ပင်လယ်ပြင်ရှာဖွေမှုများ ဆက်လက်လုပ်ဆောင်မည်

ရန်ကုန် နိုဝင်ဘာ ၉

ပင်လယ်ပြင်တွင် မျောပါလျက်ရှိနေသာ ကျားဖောင်သမား ရေလုပ်သားများကို တပ်မတော်(ရေ)မှ စစ်ရေ ယာဉ်များသည် နိုဝင်ဘာ ၇ ရက်မှ စတင်၍ လိုက်လံရှာဖွေကယ်ဆယ်မှုများ ပြုလုပ်ခဲ့ရာ နိုဝင်ဘာ ၉ ရက် နံနက်ပိုင်းတွင် ၁၇၄ ဦး ဒုတိယအကြိမ်အဖြစ် ထပ်မံရှာဖွေကယ်ဆယ်ခဲ့ကြောင်း တပ်မတော်(ရေ)မှ သိရသည်။

ပြီးခဲ့သည့် နိုဝင်ဘာ ၅ ရက် ညနေပိုင်းက မိုးလေဝသနှင့် ဇလဗေဒ ညွှန်ကြားမှုဦးစီးဌာန၏ တိုင်းထွာချက်များအရ ဘင်္ဂလားပင်လယ်အော် အရှေ့တောင်ပိုင်းတွင် ဖြစ်ပေါ်ခဲ့သော လေဖိအားနည်းရပ်ဝန်းသည် မုန်တိုင်းငယ်အဖြစ် ရောက်ရှိခဲ့ပြီး ယင်းမုန်တိုင်းငယ်ကြောင့် ပင်လယ်ပြင်တွင် ငါးဖမ်းရှာဖွေမှုများ ပြုလုပ်လျက်ရှိ သည့် ကျားဖောင်များနှင့်အတူ ရေလုပ်သားအမြောက်အမြား ပင်လယ်ပြင်တွင် မျောပါခဲ့ကြသည်။ အဆိုပါ ရေလုပ်သားများကို နိုဝင်ဘာ ၇ ရက် မှ စတင်၍ တပ်မတော်စစ် ရေယာဉ်များဖြင့် ရှာဖွေခဲ့ရာ နိုဝင်ဘာ ၈ ရက် နံနက်ပိုင်းက ရေလုပ်သား ၂၅၂ ဦးကို ကယ်ဆယ်နိုင်ခဲ့သည်။

'' တပ်မတော် စစ်ရေယာဉ် ၅၆၃၊ တွဲဆွဲရေယာဉ် နဝရတ်၊ ထောက်ပံ့ရေယာဉ် ၆၂၃၊ ၆၂ဝ၊ ၉ဝ၆ ငါးစင်း နဲ့ ပင်လယ်ပြင်မျောပါ ရေလုပ်သားတွေကို ဆက်လက်ရှာဖွေနေပါတယ်။ နိုဝင်ဘာ ၉ ရက် နံနက်ပိုင်းအထိ ရေလုပ်သား ၁၇၄ ဦး ထပ်မံတွေ့ ရှိပါတယ်။ တစ်ဦး လမ်းလျှောက် နိုင်စွမ်းအားနည်းနေလို့ အမှတ်(၂) စစ်ဆေးရုံကို ပို့ထားတယ်။ အခု ဒီနေ့ မွန်းလွဲပိုင်းမှာ နောက်ထပ် ရေလုပ်သားကိုးဦး ထပ်မံတွေ့ရှိ ထားပါတယ်။ ဘယ်လောက်အတိုင်း အတာအထိ ရှာဖွေမလဲဆိုရင် ရေလုပ်သား ကယ်တင်မှု လုံးဝကင်းရှင်းသွားပြီလို့ သတင်းရရင်ပဲဖြစ်ဖြစ် တွေ့ရှိ ကယ်တင်ထားတဲ့ ရေလုပ်သားတွေ ဆီကရတဲ့ သတင်းအချက်အလက်တွေ ကိုပဲဖြစ်ဖြစ် ချင့်ချိန်ပြီး ညွှန်ကြားချက်အတိုင်း ဆက်လက်ဆောင်ရွက် မှာပါ'' ဟု ပင်လယ်ပြင်မျောပါ ရေ လုပ်သားများကို ရှာဖွေရာတွင် ဦးဆောင်ပါဝင်သူ ရေတပ်မတော်မှ ဗိုလ်မှူးဘုန်းမြင့်ဦးက ပြောသည်။

ပင်လယ်ပြင်မျောပါ ရေလုပ်သား ၁၇၄ ဦးကို တပ်မတော်(ရေ) မှ ထပ်မံ ကယ်ဆယ်ခဲ့ပြီး နိုဝင်ဘာ ၉ ရက် နံနက် ၆ နာရီက သာကေတမြို့နယ် ရေတပ်ဆိပ်ကမ်းသို့ ရောက်ရှိခဲ့သည်။ တပ်မတော်စစ်ရေယာဉ်ဖြင့် ထပ်မံကယ်ယူခဲ့သော ရေလုပ်သား ၁၇၄ ဦးအပြင် တရုတ်သင်္ဘောတစ်စင်းဖြင့် ပင်လယ်ပြင်မျောပါ မြန်မာရေလုပ် သားတစ်ဦးကို ကယ်ဆယ်ခဲ့ကြောင်း ရန်ကုန်တိုင်းဒေသကြီး လူမှုဝန်ထမ်း ကယ်ဆယ်ရေးနှင့် ပြန်လည်နေရာချ ထားရေးဝန်ကြီးဌာနက ဦးကြည်သာ (ညွှန်ကြားရေးမှူး)ထံမှ သိရှိရသည်။

''တရုတ်သင်္ဘော တစ်စင်းနဲ့ ပင်လယ်ပြင်မျောပါ ရေလုပ်သားတစ်ဦးကို ကယ်လာတယ်ဆိုလို့ ဆိပ်ကမ်း အာဏာပိုင်ရုံးကနေ ကျွန်တော်တို့ သွားရောက်လက်ခံခဲ့ပါတယ်။ ဒီနေ့ ကယ်ဆယ်လာတဲ့ ရေလုပ်သားတွေမှာ ဖျာပုံက ၁၂၇ ဦး၊ ပုသိမ်က ၃ဝ၊ ရန်ကုန်က ၁၆ ဦးနဲ့ မန္တလေးက တစ်ဦးပါပါတယ်။ မန္တလေးကတစ်ဦး ကို အောင်မင်္ဂလာအဝးပြေးကနေ ရွှေစင်စင်္ကြာနဲ့ ပို့ပေးခဲ့ပါတယ်။ ဧရာဝတီတိုင်းဒေသကြီးကိုတော့ ကားလေးစီးနဲ့ ပို့ပေးခဲ့တယ်'' ဟု ယင်းက ဆက်လက်ပြောကြားသည်။

ပင်လယ်ပြင်မျောပါ ရေလုပ်သားများသည် အသက် ၁၈ နှစ်အရွယ်၊ ၆၇ နှစ်အရွယ်အထိ အမျိုးသားများ ဖြစ်ကြပြီး ဗိုလ်မှူးဘုန်းမြင့်ဦး (တပ်မတော်ရေ) က ''ပင်လယ်ထဲမှာရှိနေတဲ့ လူတစ်ဦးက ၄၈ နာရီထက်ပိုပြီး ဆက်လက်ရပ်တည် ရှင်သန်ဖို့ဆိုတာ စိတ်ဓာတ်ပိုင်းဆိုင်ရာရော၊ သူတို့ရဲ့ အတွေ့အကြုံပါ၊ ကြံခိုင်မှုရှိဖို့လိုပါတယ်။ ကရင်အမျိုးသားတစ်ဦးဆို ဖောင်ပေါ်မှာမဟုတ်ဘဲ သုံးရက်လုံး ရေထဲမှာ ဝါးပိုးဝါးဖက်တွယ်ပြီးနေရတာကို ကယ်ခဲ့ရတယ်။ သင်္ဘောပေါ် ရောက်တော့ အစာတောင်မစားနိုင်ဘူး၊ ရေလုပ်သားတွေ ညဆိုရင်လည်း သူတို့ကို မတွေ့သွားမှာစိုးလို့ မီးရှို့ အချက်ပြတာတွေ၊ ဆိုလာမီးလေးတွေ နဲ့ တတ်သလောက်အချက်ပြတာတွေ၊ ဘေးအန္တရာယ်ကျရောက်ရင် သုံးတဲ့ အချက်ပြနည်းတွေနဲ့ အားကိုးတကြီး အချက်ပြကြပါတယ်။ ကျွန်တော်တို့ ရောက်တာနဲ့ တကယ့်ကို သူတို့ အသက်မသေတော့ဘူးဆိုပြီး ပျော်ရွှင်ကြတယ်။ ကျွန်တော်တို့က တပ်မတော်သားဆိုတော့ ပြည်သူကို ကာကွယ်စောင့်ရှောက်ရမည့် အပိုင်းလဲရှိပါတယ်။ အခုလို ရေလုပ်သားတွေကို အသက်အန္တရာယ်က ကာကွယ်နိုင်တဲ့အတွက် ပီတိလဲဖြစ်မိပါတယ်။ ဂုဏ်ယူလို့မဆုံးဖြစ်ရပါ တယ်'' ဟုဆိုသည်။

တပ်မတော် စစ်ရေယာဉ် ၅၆၃၊ တွဲဆွဲရေယာဉ် နဝရက်၊ ထောက်ပံ့ရေယာဉ်၊ ၆၂၃၊ ၆၂ဝ၊ ၉ဝ၆ ရေယာဉ် ငါးစီးတို့သည် ဒဂုံမီးပြအထက် အောက်တစ်လျှောက်နှင့် ကမ်းသာယာတစ်လျှောက် အပိုင်းလိုက်ရှာဖွေ မှုကို ဆက်လက်ရှာဖွေသွားမည်ဖြစ်ပြီး ရှာဖွေရာတွင် ပင်လယ်ပြင်တွင် တွေ့ရှိရသည့် ရေလုပ်သားများနှင့် ပင်လယ်ပြင်တွင် မျောပါပျက်စီးနေသည့် ဖောင်များပေါ်တွင်သာ ရှာဖွေမည်ဖြစ်ကာ ကမ်းနှင့် ရွာများသို့ ကပ်ရောက်သွားသည့် ဖောင်များအား ရှာဖွေမှုပြုလုပ်သွားမည်မဟုတ်ကြောင်း သိရသည်။

သတင်း-ရဲခေါင်ညွန့်

ဓာတ်ပုံ- myanmar NAVY၊ ဖိုးထောင်

Myanmaalinn

http://ift.tt/1nAnMka

from သစ်ထူးလွင် (နေ့စဉ်သတင်း) - Thit Htoo Lwin http://ift.tt/1w6NDz0