သြဂုတ်လ ၁၀ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
#emg_editorials
တရုတ်၊ အမေရိကန်၊ အာဆီယံနှင့် တောင်တရုတ်ပင်လယ်အရေး
အာဆီယံဒေသတွင်း လုံခြုံရေးဆိုင်ရာ ဆွေးနွေးပွဲကျင်းပနေစဉ်အတွင်း မြန်မာနိုင်ငံသို့ရောက်ရှိနေသော အမေရိကန် နိုင်ငံခြားရေးဝန်ကြီး ဂျွန်ကယ်ရီသည် တရုတ်နှင့် ၎င်းထက် အင်အားပိုမိုနည်းပါးသော အိမ်နီးချင်းနိုင်ငံများအကြား ဖြစ်ပွားနေသည့် တောင်တရုတ်ပင်လယ်အရေးနှင့် ပတ်သက်၍ တင်းမာမှုများ လျော့ပါးစေရန် ကြိုးပမ်းနေသည်ဟု ဆိုသည်။
သို့သော် ယင်းကို တရုတ်တို့ဘက်က တင်းတင်းမာမာ ပြန်လည်တုံ့ပြန်ခဲ့သည်။ တရုတ်နိုင်ငံခြားရေးဝန်ကြီး ဝမ်ယီသည် ဩဂုတ် ၉ ရက်က ထိုင်းနိုင်ငံကိုယ်စားလှယ်များနှင့် သီးခြားတွေ့ဆုံပြီးနောက် ပြုလုပ်သည့် သတင်းစာရှင်းလင်းပွဲတွင် “တောင်တရုတ်ပင်လယ်အရေးဟာ ဒီကိစ္စနဲ့ တိုက်ရိုက်သက်ဆိုင်နေတဲ့ နိုင်ငံတွေကသာ ဖြေရှင်းရမယ့်ကိစ္စပါ” ဟု ပြောကြားခဲ့သည်။
တောင်တရုတ်ပင်လယ် အရေးနှင့်ပတ်သက်၍ တရုတ်နှင့် အငြင်းပွားနေသော အာဆီယံအဖွဲ့ဝင်နိုင်ငံ လေးနိုင်ငံရှိပြီး ယင်းတို့မှာ ဖိလစ်ပိုင်၊ ဗီယက်နမ်၊ ဘရူနိုင်းနှင့် မလေးရှားတို့ဖြစ်သည်။ အင်ဒိုနီးရှားသည်လည်း ယင်းအငြင်းပွားမှုအတွင်းသို့ ပါဝင်လာဖွယ်ရှိနေသည်။ တရုတ်တို့အနေဖြင့် ၎င်းထက် အင်အားများစွာသေးငယ်သော အိမ်နီးချင်းနိုင်ငံများအပေါ် အလွယ်တကူ လွှမ်းမိုးနိုင်မည်ဖြစ်သောကြောင့် တစ်နိုင်ငံချင်းအနေဖြင့်သာ ဖြေရှင်းလိုပြီး အာဆီယံတစ်ဖွဲ့လုံးနှင့် ထိပ်တိုက်မတွေ့လိုပေ။
တောင်တရုတ်ပင်လယ်အရေး ဖြစ်ပေါ်နေချိန်တွင် အမေရိကန်ကလည်း အရှေ့တောင်အာရှဒေသသို့ ပြန်လည်ဦးလှည့်လာသည်။ တရုတ်တို့အင်အား ကြီးထွားလာမှုကြောင့် မဟာဗျူဟာအရ စိန်ခေါ်မှုနှင့် ရင်ဆိုင်လာရသော အမေရိကန်သည် သူ၏နိုင်ငံခြားရေး မူဝါဒကို ပြန်လည်ထိန်းညှိရန် ကြိုးပမ်းလာသည်။ ပွင့်လင်းမြင်သာမှုနည်းပါးသော တရုတ်တို့၏ ခြေလှမ်းများကို ကာကွယ်ရန်အတွက် အမေရိကန်က အရှေ့တောင်အာရှ ဒေသတွင်းနိုင်ငံများကို အားပေးအားမြှောက် ပြုလာခဲ့သည်။ အမေရိကန်နိုင်ငံခြားရေးဝန်ကြီး ဂျွန်ကယ်ရီသည် ယခုဆွေးနွေးပွဲတွင်လည်း အရှေ့တောင်အာရှမှ ထိပ်တန်းခေါင်းဆောင်များနှင့် တွေ့ဆုံကာ တွေ့ဆုံဆွေးနွေးမှုများ ပြုလုပ်ခဲ့သည်။
အမေရိကန်အာဏာပိုင်များက ကယ်ရီသည် တောင်တရုတ်ပင်လယ်အရေးတွင် ပါဝင်သော တရုတ်နှင့် အခြားနိုင်ငံများကို တင်းမာမှုများလျော့ပါး စေရန်အတွက် ဆောင်ရွက်ကြရန် တောင်းဆိုမည်ဖြစ်ပြီး အငြင်းပွားနေသော နယ်မြေတစ်ဝိုက် ကျင့်ဝတ်ဆိုင်ရာကိစ္စများကို ဆက်လက်ညှိနှိုင်းကြရန်လည်း တောင်းဆိုမည်ဟုဆိုသည်။ အမေရိကန်နှင့် အခြားနိုင်ငံများသည် တောင်တရုတ်ပင်လယ်အရေး တင်းမာမှုများ မြင့်မားလာပြီး နိုင်ငံတကာ ရေကြောင်းသွားလာမှု အဟန့်အတား ဖြစ်မည်ကိုလည်းကောင်း၊ ပဋိပက္ခများဆီသို့ ဦးတည်သွားမည်ကိုလည်းကောင်း စိုးရိမ်နေခြင်းဖြစ်သည်။ သို့သော် တရုတ်တို့က တောင်တရုတ်ပင်လယ်အရေးတွင် အင်အားကြီးအမေရိကန် ပါဝင်လာမည်ကို လုံးဝလိုလားခြင်း မရှိပေ။
တောင်တရုတ်ပင်လယ် အရေးတွင် ဝင်ရောက်ဖိအားပေးလာသည့် အမေရိကန်က ယင်းသည် စူပါပါဝါတို့၏ တိုက်ပွဲတစ်ရပ် မဟုတ်ဟု ပြောကြားထားသော်လည်း တရုတ်တို့က အမေရိကန်သည် ဝင်ရောက်ခြေရှုပ်ခြင်း ဖြစ်သည်ဟုလည်းကောင်း သူ၏ဩဇာကြီးမားမှုကို ဆက်လက်ထိန်းသိမ်းရန် ကြိုးပမ်းမှုတစ်ရပ် အဖြစ်လည်းကောင်း ရှုမြင်ထားသည်။ ယင်းကဲ့သို့သော အနေအထားတွင် အာဆီယံအဖွဲ့၏ အလှည့်ကျဥက္ကဋ္ဌနေရာကို ရယူကာ ယခုနှစ်၌ အာဆီယံကိုဦးဆောင်နေသည့် မြန်မာနိုင်ငံ၏ အခန်းကဏ္ဍသည် အရေးပါလှသည်။ သို့သော် နိုင်ငံတွင်းရှိ ကြီးမားသော ပြဿနာများကိုပင် ဖြေရှင်းနိုင်ခြင်း မရှိသေးသည့် မြန်မာနိုင်ငံအတွက် တောင်တရုတ်ပင်လယ် အရေးသည် အလွန့်အလွန် ကြီးမားသော စိန်ခေါ်မှုကြီး ဖြစ်နေသည်။ မည်သို့ပင်ဖြစ်စေ မြန်မာနိုင်ငံအနေဖြင့် အာဆီယံကို ဦးဆောင်သူအဖြစ် ယင်းစိန်ခေါ်မှုကို ရှောင်လွှဲ၍ မရသောကြောင့် အာဆီယံနိုင်ငံများနှင့်အတူ ညီညွတ်စွာရပ်တည်လျက် လိမ္မာပါးနပ်စွာ ကူညီဖြေရှင်းပေးနိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
from Eleven Media Group's Facebook Wall http://ift.tt/1myhSLh
Comments
Post a Comment