မြင်းခြံဒေသတွင် မိုးခေါင်မှုများ ဆက်လက်ဖြစ်ပေါ်လျက်ရှိရာ ယခုလကုန်အထိ မိုးရွာသွန်းမ...

မြင်းခြံဒေသတွင် မိုးခေါင်မှုများ ဆက်လက်ဖြစ်ပေါ်လျက်ရှိရာ ယခုလကုန်အထိ မိုးရွာသွန်းမှုမရှိပါက ကျေးရွာများတွင် သောက်သုံးရေနှင့် စိုက်ပျိုးရေအတွက် အခက်ကြုံရမည်



မြင်းခြံဒေသတွင် ယခုနှစ်အတွင်း မိုးခေါင်မှုများဖြစ်ပေါ်လျက်ရှိရာ ဩဂုတ်လကုန်သည်အထိ လုံလောက်သောမိုးရွာသွန်းမှု မရှိပါက ကျေးရွာများတွင် သောက်သုံးရေနှင့် စိုက်ပျိုးရေအတွက် အခက်ကြုံရမည်ဖြစ်ကြောင်း သိရသည်။



ဒေသအတွင်း ယခုနှစ်မိုးဦးကာလနှင့် မိုးလယ်ကာလများတွင် မိုးရွာသွန်းမှုများမရှိဘဲ မိုးခေါင်မှုများ ဆက်လက်ဖြစ်ပေါ်လျက်ရှိပြီး မိုးနှောင်း(မိုးကုန်)ကာလများသို့ ရောက်ရှိနေပြီဖြစ်သော်လည်း မိုးရွာသွန်းမှု အလွန်နည်းပါးသဖြင့် ကျေးရွာများတွင် သောက်သုံးရေနှင့် စိုက်ပျိုးရေအတွက် အခက်ကြုံနေရ ကြောင်း သိရသည်။ ထို့ပြင် မိုးရွာသွန်းမှုမရှိသည့်အတွက် ကျေးရွာအချို့တွင် ကျွဲနွားများအတွက် သောက်သုံးရန်ရေနှင့် အစားအစာ ရှားပါးမှုများလည်း ကြုံတွေ့နေရကြောင်း ဒေသခံတောင်သူများက ဆိုသည်။



“ဒီနှစ် မိုးခေါင်တဲ့အတွက် လယ်ယာ လုပ်ငန်းခွင်လည်း မဝင်နိုင်ခဲ့ပါဘူး။ မိုးမရွာတဲ့အတွက် စိုက်ပျိုးရေလည်း မရပါဘူး။ မိုးမရွာတဲ့အတွက် ဆည်မြောင်းချောင်းကန်တွေမှာလည်း ရေမရှိတော့ပါဘူး။ အခုဆိုရင် ဝါခေါင်လကုန်ပါတော့မယ်။ အရင်နှစ်က မိုးခေါင်တုန်းကတောင် မိုးအတော်အသင့် ရွာခဲ့တဲ့အတွက် ဒီလိုအချိန်တွေမှာဆို ကန်တွေ၊ ဆည်တွေမှာ ရေပြည့်လုနီးပါး ရှိနေပါပြီ။ ဒီ နှစ်တော့ မိုးခေါင်လွန်းတဲ့နှစ်လို့ သတ်မှတ် လို့ရပါတယ်။ မိုးဦး၊ မိုးလယ်၊ မိုးနှောင်း ကာလတွေရောက်လာတဲ့အထိ မိုးရွာတာ နည်းလွန်းတဲ့အတွက် ရွာမှာတူးဖော်ထားတဲ့ ကန်တွေမှာ ရေက ခန်းလုနီးပါးရှိနေပါပြီ။ ဒီလကုန်တဲ့အထိ မိုးမရွာဘူးဆိုရင်တော့ လာ မယ့်နွေမရောက်ခင်မှာဘဲ သောက်သုံးရေပြတ် လပ်မှုနဲ့ ကျွန်တော်တို့တွေ စတင်ကြုံတွေ့ရ မှာပါ” ဟု တောင်သာမြို့နယ် တမံကြီးကျေး ရွာမှ ဒေသခံတောင်သူများက ဆိုသည်။



မိုးခေါင်သည့်ဖြစ်စဉ်များကြောင့် ဒေသတွင်းအပူချိန်မြင့်တက်မှုများရှိနေပြီး ကန်ရေများနှင့် တွင်းရေများ ဆက်လက်ခန်းခြောက်မှု များရှိနေကြောင်း ဒေသခံများက ဆိုသည်။ လက်ရှိအချိန်တွင် ကျေးရွာအချို့၌ သောက် သုံးရေပြတ်လပ်မှုများ ဆက်လက်ကြုံတွေ့နေ ရသဖြင့် သောက်သုံးရေအတွက် ရေကန်ကြီး များရှိရာ တစ်မိုင်ကျော်ခန့်အထိ ရေသယ်ယူနေရကြောင်း သိရသည်။



“ရွာမှာတော့ သောက်ရေအတွက် နေ့စဉ် တစ်မိုင်ကျော်ရေသွားခပ်နေရပါပြီ။ ကျွဲ နွားအတွက် သောက်ရေရှားပါး လာတဲ့အတွက် ကျွန်တော်တို့အသုံးပြုပြီးသား ချက်ပြုတ် ထားတဲ့ရေတွေကိုပဲ ကျွဲနွားတွေအတွက် သောက်ရေအဖြစ် ပြန်သုံးနေရပါတယ်။ မိုး ခေါင်လွန်းတဲ့အတွက် အချို့ဆိုရင် ရေရနိုင် မယ့်နေရာတွေကိုတောင် မိသားစုလိုက်ရွှေ့ ပြောင်းတာတွေ လုပ်နေပါပြီ။ ဒီလကုန်တဲ့ အထိမိုးမရွာရင်တော့ လာမယ့်နွေမရောက်ခင် မှာဘဲ သောက်သုံးရေအတွက် အရမ်းခက်ခဲတဲ့ အခြေအနေမျိုးကို စတင်ကြုံတွေ့ရမှာဖြစ်ပါ တယ်။ အပူရှိန်တွေ ဆက်လက်မြင့်တက်နေ တော့ တွင်းရေတွေပါ သောက်သုံးရေအတွက် အချိန်ပေးပြီး ငင်နေရပါတယ်” ဟု စံဦးကျေးရွာမှ လူ့အခွင့်အရေး မြှင့်တင်သူများအဖွဲ့မှ ဦးကျော်မင်းက ဆိုသည်။



မြင်းခြံဒေသသည် အခြားအရပ်ဒေသ များနှင့်မတူညီဘဲ မိုးဦးကျသည့်အချိန်မှာ နယုန်လဆန်း၌စတင်ပြီး မိုးနှောင်းကာလမှာ တော်သလင်းလဆန်း အထိသာဖြစ်ကြောင်း ဒေသခံတောင်သူများ၏ ပြောပြချက်များအရ သိရသည်။ ဝါခေါင်လကုန်သည်အထိ မိုးရွာသွန်းမှုမရှိပါက အဆိုပါဒေသ၌ မိုးရွာသွန်း ခြင်းမရှိတော့ကြောင်း ဒေသခံတောင်သူများက ဆက်လက်ရှင်းပြသည်။



မြင်းခြံဒေသတွင်းရှိ စွန်းလွန်းဆည်မှ ခန်းခြောက်နေသော ရေပေးမြောင်းတစ်ခုအား သြဂုတ်လဆန်းက တွေ့ရစဉ် (ဓာတ်ပုံ-မိုးဟိန်း)







from Eleven Media Group's Facebook Wall http://ift.tt/1uH3Zm4