စစ်တွေ ဘင်္ဂါလီဒုက္ခသည်စခန်းတွင် လူအုပ်ဖြင့်ရန်ပြု၍ ရဲကပစ်ခတ်၊ တစ်ဦးသေ
ရန်ကုန်၊ သြဂုတ် ၈
ရခိုင်ပြည်နယ် စစ်တွေမြို့ရှိ ဘင်္ဂါလီ များနေထိုင်သည့် မှန်စီ ဒုက္ခသည်စခန်းတွင် ဖြစ်ပွားသည့် ရုန်းရင်းဆန်ခတ်မှုကို ထိန်းသိမ်းရာတွင် ရဲတပ်ဖွဲ့ဝင်များကို လူအုပ်စုလိုက် ရန်ပြုသဖြင့် ပစ်ခတ် ဟန့်တားခဲ့ရာ တစ်ဦးသေဆုံးကြောင်း ပြည်ထဲရေးဝန်ကြီးဌာနက ထုတ်ပြန်သည်။
အသက် ၂၁ နှစ်အရွယ် အလူလာလုံ နှင့် အသက် ၁၃ နှစ်အရွယ် လာဘာဟူစွန်း ဆိုသူနှစ်ဦးသည် သြဂုတ်လ ၆ ရက်နေ့က အဆိုပါ ဒုက္ခသည်ကယ်ဆယ်ရေး စခန်းရှိ ကွမ်းယာဆိုင်တွင် ဈေးလာဝယ်စဉ် ၄င်းတို့ နှစ်ဦးသည် ပစ္စည်းခိုးဝှက်တတ်သူများဟု ဆိုကာ လူအုပ်စုတစ်ခုက ဖမ်းဆီး ခေါ်ဆောင်ရာမှ ရုန်းရင်းဆန်ခတ်မှု စတင် ဖြစ်ပွားခဲ့ခြင်းဖြစ်ကြောင်း စစ်တွေမြို့နယ် ရဲတပ်ဖွဲ့မှူးက ပြောကြားသည်။
"ကောင်လေးနှစ်ယောက်ကို သူခိုးဆိုပြီး ကြိုးတုပ် ခေါ်သွားတယ်။ လိုက်သွားတဲ့ ရဲတွေကိုလည်း ခဲတွေနဲ့ ပစ်တယ်။ လေးဂွတွေနဲ့ ပစ်တယ်။ ဓားတွေနဲ့ ပြန်ပြီး ခုခံတယ်" ဟု ၄င်းက ဆိုသည်။
အဆိုပါ ပြဿနာကို ရဲတပ်ဖွဲ့က သွားရောက် ဖြေရှင်းရာတွင် လူ ၇၀ ရှိသည့် လူအုပ်က တုတ်၊ ဓား၊ လေးခွများ ကိုင်ဆောင်၍ ဆူပူအော်ဟစ်နေသဖြင့် လူစုခွဲရန် သတိပေးခဲ့ကြောင်း၊ လူအုပ်စုက ယင်းအမိန့်ကို မလိုက်နာသည့်အပြင် ဖမ်းထားသည့် လူနှစ်ဦးကို လယ်ကွင်းသို့ ဆွဲခေါ်ပြီး သတ်ဖြတ်ရန် လုပ်ဆောင်၍ သေနတ် ငါးချက်ပစ်ခတ် ဟန့်တားခဲ့ကြောင်း ပြည်ထဲရေး ဝန်ကြီးဌာနက ထုတ်ပြန်ထားသည်။
သို့သော်လည်း ရပ်တန့်ခြင်းမရှိဘဲ လူနှစ်ဦးကို ဆက်လက်ဆွဲခေါ်သွားသဖြင့် အဓိကရုဏ်းနှိမ်နင်းရေး ၁၂ ဗို့ သေနတ်ဖြင့် တစ်ချက် ထပ်မံပစ်ခတ်ခဲ့ကြောင်း၊ ယင်းသို့ ပစ်ခတ်သော်လည်း နောက်မဆုတ်ဘဲ အော်ဟစ်ဆဲဆိုပြီး ခဲဖြင့် ပစ်ပေါက်သဖြင့် သေနတ်လေးချက် ထပ်မံပစ်ခတ်ခဲ့ရာ လူအုပ်အနည်းငယ် ရှင်းလင်းသဖြင့် ဖမ်းဆီးခံထားရသူ နှစ်ဦးကို ကယ်ဆယ်နိုင်ခဲ့ကြောင်း ယင်းထုတ် ပြန်ချက်တွင် ပါရှိသည်။
ယင်းနောက် အသက် ၃၀ အရွယ် ရှောင်ရှအာလောင်ဆိုသူက ရဲတပ်ဖွဲ့ဝင် များကို ဓားဖြင့် ဝင်ခုတ်သဖြင့် ရဲက ပစ်ခတ်ခဲ့ရာ သေဆုံးခဲ့ပြီး ဓားကိုင်ထား သူနှစ်ဦးဖြစ်သည့် အဒူကဖူ၊ အဇူမာလစ် တို့ကို ဖမ်းဆီး အရေးယူထားကြောင်း စစ်တွေမြို့ မြို့မ ရဲတပ်ဖွဲ့စခန်းမှ သိရှိရသည်။
ခဲများဖြင့် ပစ်ခတ်ခံရသဖြင့် ရဲတပ်ဖွဲ့ဝင် အချို့လည်း ထိခိုက်ဒဏ်ရာ ရရှိခဲ့ကြောင်း အဆိုပါ ရဲတပ်ဖွဲ့စခန်းမှ တာဝန်ကျ ရဲအရာရှိတစ်ဦးက ပြောကြားသည်။
ဖမ်းဆီးထားသူနှစ်ဦးကို ၃၄၂ (မတရားချုပ်နှောင်မှု)၊ ၃၃၃ (တာဝန် ထမ်းဆောင်နေသည့် ပြည်သူ့ဝန်ထမ်း အပြင်းအထန် နာကျင်စေမှု)၊ ၁၄၈ (သေစေသည့် လက်နက်ဖြင့် ရုန်းရင်းဆန်ခတ်မှု)၊ ၃၅၃ (ပြည်သူ့ဝန်ထမ်းကို ဟန့်တားနှောင့်ယှက်မှု)၊ ၁၁၄ (အားပေးကူညီမှု)၊ ၃၂၅ (အပြင်းအထန် နာကျင်စေမှု) တို့ဖြင့် အမှုဖွင့် အရေးယူထားကြောင်း ၄င်းကဆိုသည်။
from The Voice Weekly's Facebook Wall http://ift.tt/1kOx9MQ
Comments
Post a Comment