ဒဂုံမြို့သစ်နှင့် သန်လျင်တွင် ပွဲစားများက တာဝန်ရှိသူများနှင့် ပူးပေါင်းပြီး စာချုပ်တုများ ဖန်တီးနေခြင်းကြောင့် မြေပိုင်ဆိုင်မှု အငြင်းပွားမှုများ ရှိနေ
ဒဂုံမြို့သစ် မြို့များဖြစ်သည့် မြောက်ဒဂုံ၊ တောင်ဒဂုံ၊ အရှေ့ဒဂုံ၊ ဒဂုံဆိပ်ကမ်းမြို့နယ်နှင့် သံလျင်မြို့များတွင် ပွဲစားများက အိုးအိမ်ဦးစီးဌာန တာဝန်ရှိသူများ၊ စည်ပင်တာဝန်ရှိသူများနှင့် ပူးပေါင်းပြီး သေဆုံးသူများ အမည်ကိုသုံးကာ မိမိကို ရောင်းချခဲ့သယောင် စာချုပ်တုများပြုလုပ်ပြီး ပြန်လည်ရောင်းချခြင်းကြောင့် အငြင်းပွားမှုများ ဆက်တိုက်ပေါ်ပေါက်ပြီး အမှုအခင်း ရင်ဆိုင်နေရကာ အမှန်တကယ် ၀ယ်ယူထားသူများ နစ်နာနေကြောင်း သိရသည်။
“ကျွန်တော်တို့ မှတ်ပုံတင်ခွင့် မရခြင်းရဲ့ အကျိုးဆက်အနေနဲ့ လူတွေက အမှန်တကယ် ပိုင်ရေးဆိုင်ခွင့် မရဘဲနဲ့ မသမာသူတွေက လက်တစ်လုံးခြားလုပ်နိုင်တဲ့ အခြေအနေတွေ ယနေ့လက်ရှိ ပေါ်ပေါက်နေတာလေး ရှိပါတယ်။ ဒဂုံမြို့သစ် တောင်ပိုင်းမြို့နယ်မှာ၊ ဒဂုံမြို့သစ် ဆိပ်ကမ်းမြို့နယ်မှာ ဒဂုံမြို့သစ် အရှေ့ပိုင်းမှာ ဒဂုံမြို့ လေးမြို့နယ်မှာရော သန်လျင်မှာရော ရပ်ကွက်ထဲမှာရှိတဲ့ ပွဲစားတစ်ပိုင်း လူလည်တွေက ဘာတွေလုပ်နေသလဲဆိုတော့ အိုးအိမ်ရုံးနဲ့ပေါင်းပြီးတော့ လူတွေရဲ့ သေစာရင်းတွေ ရအောင်ယူပါတယ်။ အိုးအိမ်ကရတဲ့ သေသွားတဲ့သူတွေရဲ့စာရင်း ရရှိပြီး သေသူကတစ်ဆင့် ရောင်းလိုက်တယ်ဆိုပြီးတော့ ပါမစ်မြေတွေ၊ ဂရန်မြေတွေ ဒီမြေတွေကို အရောင်းအ၀ယ် လုပ်ထားတယ်ဆိုတဲ့ စာချုပ်တွေကို လက်ထဲမှာ ကိုင်ထားပါတယ်။ ပြီးတဲ့အခါကျတော့ ရပ်ကွက်အုပ်ချုပ်ရေးတွေ မြို့နယ်ထွေအုပ်တွေရယ် စည်ပင်တွေရယ်ပေါင်းပြီးတဲ့ အခါကျတော့ ဘယ်သူပိုင်ဆိုင်တဲ့မြေ ဘယ်သူပိုင်ဆိုင်တဲ့မြေ ဖြစ်ပါတယ်ဆိုပြီးတော့ ဆိုင်းဘုတ်တွေ စိုက်ထူပါတယ်။ တကယ်ပိုင်ဆိုင်တဲ့သူတွေ အိုးအိမ်ကပေးထားတဲ့ စလစ်တွေ ပါမစ်တွေ ဒါတွေနဲ့ ပတ်သက်ပြီးတော့ အမှန်တကယ် ကိုင်ထားတဲ့သူတွေ ပေါ်လည်းပေါ်လာတဲ့ အခါကျရော ဒီမှာကျွန်တော်ကို မိတ္တူနဲ့ ရောင်းသွားတာပါ။ ပါမစ်ရဲ့ မိတ္တူတွေ စလစ်ရဲ့မိတ္တူတွေနဲ့ ဟောဒီမှာ သေသွားသောသူက ရောင်းတယ်။ ဘယ်သူ ဘယ်သူက ရောင်းသွားတယ်ပေါ့။ အဲ့ဒီလူက ဘယ်သူဘယ်သူ စုံစမ်းလိုက်တဲ့ အခါကျတော့ အဲ့ဒီသေသွားတဲ့သူ။ သေသွားတဲ့သူက ရောင်းသွားတယ်ဆိုတော့ သက်သေထူစရာမရှိဘူး ဖြစ်နေတယ်။ ဒီမှာ ပိုင်ရေးဆိုင်ခွင့်အရ နှစ်ဖက်အငြင်းပွားတဲ့အခါမှာ တရားရုံးရောက်ရင်လည်း နှစ်ဖက်ကြားထဲမှာ ၀ယ်ထားသူက နောက်ဆုံးဝယ်တဲ့သူထက်ကို စောနေတဲ့အတွက်ကြောင့် နှစ်ဖက်အငြင်းပွားမှုတွေဟာလည်း အမှုရှည်ကြာမှာ စိုးတဲ့အတွက်ကြောင့် တကယ်ပိုင်ရေးဆိုင်ခွင့်ရှိတဲ့သူ မစို့မပို့လျော်ကြေးနဲ့ ဒါမှမဟုတ်လည်း တစ်ဝက်ကြေးနှုန်းတွေနဲ့ တစ်ဝက်နှုန်း ထွက်သွားကြရတယ်” ဟု Purple Equity Law Firm မှ ရှေ့နေဦးဖိုးဖြူက ပြောကြားသည်။
အိမ်ခြံမြေ ရောင်းဝယ်ရာတွင် ၀ယ်ယူသူမှ ၀ယ်ယူသည့်တန်ဖိုး၏ ၃၈ ရာခိုင်နှုန်းကို အခွန်ဆောင်နိုင်မှသာ အမည်ပေါက် တရားဝင်ပိုင်ဆိုင်ခွင့်ရှိမည် ဖြစ်သောကြောင့် အများစုမှာ အရပ်စာချုပ်များဖြင့်သာ အရောင်းအ၀ယ် ပြုလုပ်လေ့ရှိကြသည်။
“ဒီလိုနည်းနဲ့ ဒေသအာဏာပိုင်တွေနဲ့ မရှိသော သေတဲ့သူဆီက ၀ယ်ထားသောဆိုတဲ့ စာချုပ်တွေနဲ့ မသမာတဲ့သူတွေက သိန်းကိုထောင်နဲ့ချီပြီးတော့ ရပ်ကွက်တွေထဲမှာ ချမ်းသာနေတာမျိုးတွေကို ကျွန်တော်တွေ့ရတယ်။ အဲ့ဒါဘာလဲဆိုရင် မှတ်ပုံမတင်သော စာချုပ်တွေကို ကျွန်တော်တို့တွေ အသိအမှတ်ပြုထားလို့ပဲ အာဏာပိုင်တွေ မှတ်ပုံမတင်တဲ့ စာချုပ်တွေကို အသိအမှတ်ပြုထားလို့ပဲ။ လွှတ်ထားလို့ပဲ” ဟု ဦးဖိုးဖြူက ပြောကြားသည်။
အခွန်နှုန်းထားတွေကြောင့်လည်း တရားဝင်မှတ်ပုံတင် စာချုပ်ချုပ်ဆိုနိုင်ကြခြင်းမရှိဘဲ ဖြစ်နေပြီး အစိုးရအနေဖြင့် မှတ်ပုံတင်ခြင်းကို အခွန်နှုန်းထား လျှော့ချထားပြီး မြေယာပိုင်ဆိုင်ခွန်၊ အိမ်ရာပိုင်ဆိုင်ခွန်များကိုသာ အခွန်ကောက်ခံသင့်ကြောင်း ဦးဖိုးဖြူ က ပြောကြားသည်။
from Eleven Media Group's Facebook Wall http://ift.tt/1t86Kd4
Comments
Post a Comment