အစိုးရကို ဆန္ဒပြခဲ့သောကြောင့် မြို့နယ်ခုနစ်ခုမှ စုစုပေါင်းထောင်ဒဏ် ငါးနှစ်ချမှတ်ခံထားရသည့် ကိုထင်ကျော်အား မရမ်းကုန်းမြို့နယ်တရားရုံးက အလုပ်ကြမ်းနှင့် ထောင်ဒဏ်တစ်နှစ် ထပ်မံချမှတ်
ပြည်ထောင်စုအစိုးရကို အယုံအကြည်မရှိကြောင်း ဆန္ဒထုတ်ဖော်ခဲ့သည့်အတွက် ဒီမိုကရေစီရေး စဉ်ဆက်မပြတ်လှုပ်ရှားမှုအင်အားစု (MDCF) အဖွဲ့မှ ခေါင်းဆောင် ကိုထင်ကျော်အား မရမ်းကုန်းမြို့နယ်တရားရုံးက ဩဂုတ် ၁၁ ရက် နေ့လယ်ပိုင်းတွင် အလုပ်ကြမ်းနှင့် ထောင်ဒဏ်တစ်နှစ် ချမှတ်ခဲ့ကြောင်း သိရသည်။
ပြီးခဲ့သည့် ဧပြီ ၁၉ ရက် နံနက်ပိုင်းခန့်တွင် မရမ်းကုန်းမြို့နယ် သမိုင်းလမ်းဆုံ၌ ဒီမိုကရေစီရေး စဉ်ဆက်မပြတ်လှုပ်ရှားမှုအင်အားစု (MDCF) အဖွဲ့ခေါင်းဆောင် ကိုထင်ကျော်သည် ပြည်ထောင်စုအစိုးရအား အယုံအကြည်မရှိကြောင်း၊ ပြည်သူသာလျှင် အရှင်သခင်ဖြစ်ကြောင်းကို ဆန္ဒပြဟောပြောခဲ့ပြီး လက်ကမ်းစာစောင်ဝေငှမှုဖြင့် ၎င်းအား မရမ်းကုန်းမြို့နယ်ရဲစခန်းမှ အမှုဖွင့်ကာ တရားစွဲဆိုခဲ့ကြောင်း သိရသည်။
ကိုထင်ကျော်ကို မရမ်းကုန်းမြို့နယ်တရားရုံးမှ ရုံးချိန်းသုံးချိန်း ချိန်းဆိုပြီး နိုင်ငံတော်အကြည်ညိုပျက်စေမှု ပုဒ်မ ၅ဝ၅(ခ)ဖြင့် ယခုလို ဩဂုတ် ၁၁ ရက်တွင် အမိန့်ချခဲ့ခြင်းဖြစ်ကြောင်း သိရသည်။
ထို့ပြင် ကိုထင်ကျော်သည် အဆိုပါရုံးချိန်းတွင် အမိန့်ချမှတ်ခံရပြီးနောက် ပြန်ထွက်လာစဉ် အာဏာရှင်အစိုးရကိုဆန့်ကျင်သည့် အနေဖြင့် လက်သုံးချောင်းထောင် ဆန္ဒပြခဲ့ပြီး ပြည်သူများကလည်း ၎င်းနှင့်အတူ ထိုသို့ဆန္ဒပြခဲ့ကြသည်။
“ကိုထင်ကျော် အခုဒီရုံးနဲ့ဆိုရင် စုစုပေါင်း ထောင်ဒဏ်ခြောက်နှစ်ရှိသွားပါပြီ။ ကိုထင်ကျော် ဘယ်နှနှစ်ပဲကျသည်ဖြစ်စေ အစ်မတို့ကတော့ အဲ့ဒါကို သိပ်ဦးစားမပေးပါဘူး။ သူ့ရဲ့လုပ်ရပ်ပေါ်မှာပဲ လိုက်လံဆောင်ရွက်ပေးတာပါ။ ကိုထင်ကျော်က အထဲမှာဆိုတော့ စီးပွားရေးအနေနဲ့ ကိုယ့်ဈေးဆိုင်လေးပဲ ပြန်ဖွင့်ရတာပဲ။ သာမန်စီးပွားရေးလောက်နဲ့ပဲ ရပ်တည်ပါတယ်”ဟု ကိုထင်ကျော်၏ဇနီးဖြစ်သူ မသန်းသန်းမော်က ဆိုသည်။
လက်ရှိတွင် ကိုထင်ကျော်အား နိုင်ငံတော်အကြည်ညိုပျက်စေမှု ပုဒ်မ ၅ဝ၅(ခ) ဖြင့် တောင်ဥက္ကလာပမြို့နယ်တရားရုံးက အလုပ်ကြမ်းနှင့် ထောင်ဒဏ်ခြောက်လ၊ ဒဂုံမြို့သစ်မြောက်ပိုင်းမြို့နယ်တရားရုံးက အလုပ်ကြမ်းနှင့် ထောင်ဒဏ်တစ်နှစ်၊ ဒဂုံမြို့သစ် အရှေ့ပိုင်းမြို့နယ်တရားရုံးက အလုပ်ကြမ်း နှင့် ထောင်ဒဏ်တစ်နှစ်၊ ဒဂုံမြို့သစ်တောင်ပိုင်းမြို့နယ်တရားရုံးက အလုပ်ကြမ်းနှင့်ထောင်ဒဏ်တစ်နှစ်နှင့် သင်္ဃန်းကျွန်းမြို့နယ်တရားရုံးက အလုပ်ကြမ်းနှင့် ထောင်ဒဏ်တစ်နှစ် တို့ကိုချမှတ်ထားခဲ့ပြီး စုစုပေါင်း ပုဒ်မ ၅ဝ၅ (ခ) ဖြင့် လေးနှစ်ခြောက်လ ချမှတ်ထားပြီး ဖြစ်ကြောင်းသိရသည်။
ထို့ပြင် ငြိမ်းစုစီပုဒ်မ(၁၈)ဖြင့် ကိုထင်ကျော်အား ကျောက်တံတားမြို့နယ်တရားရုံးက အလုပ်ကြမ်းနှင့် ထောင်ဒဏ်သုံးလအားလည်းကောင်း၊ ဗဟန်းမြို့နယ်တရားရုံးက ထောင်ဒဏ်သုံးလတို့ ချမှတ်ထားပြီး ပုဒ်မ (၁၈)ဖြင့် စုစုပေါင်း ထောင်ဒဏ်ခြောက်လ ချမှတ်ထားပြီးဖြစ်ကြောင်း သိရသည်။ (MD CF) အဖွဲ့မှ ခေါင်းဆောင် ကိုထင်ကျော်မှာ ယခု မရမ်းကုန်းမြို့နယ်အပါအဝင် စုစုပေါင်း ထောင်ဒဏ်ခြောက်နှစ် ကျခံနေရပြီဖြစ်ကြောင်း သိရသည်။
from Eleven Media Group's Facebook Wall http://ift.tt/1ypdovW
Comments
Post a Comment