(သြဂုတ်လ ၁၁ ရက်ထုတ် မဇ္ဈိမနေ့စဉ်သတင်းစာမှ အယ်ဒီတာ့အာဘော်)
အီဘိုလာရောဂါအတွက် ကျန်းမာရေးဝန်ကြီးသစ် အစွမ်းပြပါ
အနောက်အာဖရိက နိုင်ငံတစ်နိုင်ငံဖြစ်သော လိုင်ဘေးရီးယားတွင် ဖြစ်ပွားနေသည့် အီဘိုလာရောဂါသည် တစ်ကမ္ဘာလုံးသို့ ခြိမ်းခြောက်နေပြီဟု ကမ္ဘာ့ကျန်းမာရေးအဖွဲ့WHO က သတိပေး ပြောဆိုထားသည်။ ကုသရန် ဆေးမရှိသေးသည့် ရောဂါသည် ဖြစ်ပွားသူပေါင်း ၁,၇၀၀ ကျော်တွင် ၉၀၀ ကျော်ကို သေဆုံးစေခဲ့ပြီဟုလည်း WHO က ဆိုသည်။
WHO ၏ သတိပေးချက်နှင့်အတူ လိုင်ဘေးရီးယားနိုင်ငံတွင်လည်း ရောဂါဖြစ်ပွားရာဒေသများမှ လူဝင်ထွက်သွားလာမှုကို စစ်ဆေးထိန်းချုပ်နေပြီး နိုင်ငံအတွင်း အရေးပေါ်အခြေအနေကို ကြေညာထားသည်။ အလားတူ အမေရိကန်အစိုးရ၏ ရောဂါကာကွယ် ထိန်းချုပ်ရေးဌာနကလည်း အရေးပေါ် ကာကွယ်မှုများပြုလုပ်ရန် တပ်လှန့်ထားသည်။
မြန်မာနိုင်ငံတွင်လည်း အဆိုပါရောဂါကို ကာကွယ်ရန် ဆေးရုံများကို အသင့်ပြင်ထားပြီးဖြစ်သည်ဟု ကျန်းမာရေးဌာန အကြီးတန်းအရာရှိများက ထုတ်ဖော်ပြောဆိုသည်။ နေပြည်တော်၊ ရန်ကုန်၊ မန္တလေးအပါအ၀င် တိုင်းနှင့် ပြည်နယ်ရှိ ခရိုင်ကြီးများရှိ ဆေးရုံကြီး ၁၉ ရုံတွင် ပြင်ဆင်ထားပြီးဖြစ်သည်ဟု ဆိုသည်။
သို့သော် အီဘိုလာနှင့်ပတ်သက်သည့် သတင်းအချက်အလက်များကို ပြည်သူလူထု ကျယ်ကျယ်ပြန့်ပြန့် သိရှိရန် လိုအပ်နေသေးသည်။ သတင်းအချက်အလက်များ ပြည့်စုံစွာသိရှိရန် အားနည်းပါက ကြိုတင်ကာကွယ်မှုသည်လည်း ထိရောက်မှုရှိမည် မဟုတ်ပေ။
သတင်းအချက်အလက်များ ပျံ့နှံ့မှု အားနည်းသည့် နယ်ဒေသများနှင့် သာမန်ရောဂါများအတွက်ပင် ဆေးဝါးလုံလောက်မှု မရှိ၊ ဆေးရုံတက်လူနာများ ကိုယ်တိုင် လိုအပ်သည့် ဆေးဝါးများကို စိုက်ထုတ်ဝယ်ယူကုသနေရသည်ဟု ဝေဖန်ခံနေရသော အစိုးရဆေးရုံများအတွက် အီဘိုလာဗိုင်းရပ်စ်က သတိပေးလျက်ရှိသည်။
အလားတူပင် သံသယဖြစ်ဖွယ်လူနာများ တွေ့ရှိပါက အီဘိုလာရောဂါ ကူးစက်ခံစားနေရသူဟု မြန်မာ့ဆေးရုံ၊ ဆေးခန်းများက အတည်မပြုနိုင်သေးပေ။ ရောဂါဖြစ်ပွားနေသူဟု အတည်ပြုချက်ရယူနိုင်ရန် ပြည်ပနိုင်ငံများသို့ ပို့ဆောင်စစ်ဆေးရမည်ဖြစ်ရာ အချိန်နှင့် ကုန်ကျစရိတ်ကလည်း အကန့်အသတ်ဖြစ်နေသည်။ ဆိုခဲ့သော အချက်အလက်များအပေါ် မူတည်လျက် အီဘိုလာရောဂါလက္ခဏာ တစ်ခုခုပြနေသည့် လူနာတစ်ဦးဦးတွေ့ရှိသည်ဆိုပါမူ ကာကွယ်ရန်နှင့် ထိန်းချုပ်ရန် ခက်ခဲနေပေဦးမည်။
ရန်ကုန်၊ မန္တလေးကဲ့သို့သော မြို့ကြီးများတွင် ကြိုတင်ကာကွယ်ရန် လုပ်ဆောင်နေသကဲ့သို့ နယ်ဒေသများရှိ လူထုနှင့် ဆေးရုံများ၊ ဆေးခန်းများ၊ ကျန်းမာရေးဝန်ထမ်းများအားလည်း အသိပညာပေးရန်နှင့် ညွှန်ကြားချက်များ အခါအားလျော်စွာ ထုတ်ပြန်ပေးရန် ကျန်းမာရေးဝန်ကြီးဌာနတွင် တာဝန်ရှိသည်။
ရောဂါသည် တိရစ္ဆာန်များ၊ လူများမှ ထွက်သည့် သွေး၊ ခန္ဓာကိုယ်မှ ထွက်သည့် အရည်များကြောင့် ကူးစက်တတ်သည်ဟူသည့် WHO ၏ ထုတ်ပြန်ချက်ကို မြို့ပြနေလူထုသာမက ကျေးလက်ဒေသ လူထုသိရှိရန်လည်း လိုအပ်သည်။ အလားတူပင် ရောဂါခံစားနေရသူကို ကိုင်တွယ်ကုသရာမှ ရောဂါကူးစက်နိုင်သည်ကိုလည်း ကျန်းမာရေးဝန်ထမ်းများသာမက လူနာနှင့် ထိတွေ့မှုများသည့် မိသားစုဝင်များ သိရှိထားရန်လည်း လိုအပ်သည်။ရောဂါလက္ခဏာများအဖြစ် ဖျားနာခြင်း၊ ကိုယ်လက်ကိုက်ခဲခြင်း၊ ၀မ်းလျှောခြင်း၊ ချောင်းဆိုးခြင်းစသည့် လက္ခဏာများ နှစ်ရက်မှ ၂၁ ရက်အတွင်း ပြတတ်ပြီး အခြားရောဂါလက္ခဏာများနှင့် တူညီသည့် လက္ခဏာများ ပြသတတ်ခြင်းကြောင့် သတိပြုရန်လိုသည်ဟု WHO က ဆိုထားသည်။
အီဘိုလာရောဂါ ကာကွယ်ဆေးမပေါ်သေးသကဲ့သို့ ထိန်းချုပ်ရန်လည်း ခက်ခဲသည့် အခြေအနေတွင် ရောဂါပိုး အဓိက ၀င်ပေါက်များဖြစ်သည့် နိုင်ငံတကာဧည့်သည်များ ၀င်ထွက်သွားလာသည့် လေဆိပ်၊ သင်္ဘောဆိပ်ကမ်းများတွင် နိုင်ငံတွင်းသို့ ၀င်ထွက်သွားလာခွင့်ပြုမည့် ၀န်ထမ်းများသည်လည်း ပေါ့လျော့မနေသင့်ဘဲ အလေးထား စစ်ဆေးရန် ဂရုပြုလုပ်ဆောင်သင့်သည်။
ကြိုတင်ကာကွယ်ခြင်းနှင့် ကျန်းမာရေး အသိပညာတိုးတက်ရန် သတင်းအချက်အလက် ဖြန့်ဝေခြင်း၊ တိကျသည ညွှန်ကြားချက်များ ထုတ်ပြန်ခြင်း၊ ထုတ်ပြန်သည့်အချက်များကိုလည်း တိကျစွာလိုက်နာခြင်းတို့ဖြင့် ကြိုတင်ကာကွယ်ရန် လိုအပ်လှသည်။ ပြည်သူတို့အတွက် ကျန်းမာရေးဝန်ဆောင်မှု ညံ့ဖျင်းလှသည်ဟု ဝေဖန်ခံနေရသည့် ကျန်းမာရေးဝန်ကြီးဌာန၏ ၀န်ကြီးအသစ်၏ အစွမ်းကို ပြသရန် အချိန်တန်ပြီဖြစ်သည်။ #Mizzimadaily
from Mizzima - News in Burmese's Facebook Wall http://ift.tt/1nGMRUT
Comments
Post a Comment