တောင်တရုတ်ပင်လယ်အရေး ဖြေရှင်းမှုတွင် သက်ဆိုင်ရာနိုင်ငံများ လိုက်နာရမည့် လုပ်ထုံးလုပ်နည်းများ အမြန်ဆုံးထွက်ပေါ်ရန် အရေးကြီးကြောင်း မြန်မာနိုင်ငံခြားရေးဝန်ကြီး ဦးဝဏ္ဏမောင်လွင် ပြောကြား
တောင်တရုတ်ပင်လယ်ဆိုင်ရာ ရေပိုင်နက်အငြင်းပွားမှု ဖြေရှင်းရာတွင် သက်ဆိုင်ရာနိုင်ငံများအလိုက် လိုက်နာရမည့် လုပ်ထုံးလုပ်နည်းများ (COC) အမြန်ဆုံး ပေါ်ထွက်လာရေးက အရေးကြီးကြောင်း မြန်မာနိုင်ငံခြားရေးဝန်ကြီး ဦးဝဏ္ဏမောင်လွင်က သြဂုတ် ၁၀ ရက်တွင် ပြောကြားလိုက်သည်။
သြဂုတ် ၅ ရက်မှ ၁၀ ရက်အထိ နေပြည်တော်၌ ပြုလုပ်ခဲ့သော (၄၇) ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးနှင့် ဆက်စပ်အစည်းအဝေးများ၊ အာဆီယံဒေသတွင်း ဖိုရမ်တို့နှင့် ပတ်သက်ပြီး သြဂုတ် ၁၀ ရက်ညပိုင်းက ပြုလုပ်ခဲ့သည့် သတင်းစာရှင်းလင်းပွဲ၌ ဦးဝဏ္ဏမောင်လွင်က ယင်းကဲ့သို့ ပြောကြားခဲ့ခြင်း ဖြစ်သည်။
အဆိုပါ သတင်းစာရှင်းလင်းပွဲတွင် သတင်းထောက်များက အစည်းအဝေးကာလအတွင်း တောင်တရုတ်ပင်လယ်အရေး တင်းမာမှုများကိုသာ မေးမြန်းခဲ့ကြသည်။
“ကျွန်တော်တို့ တောင်တရုတ်ပင်လယ်အရေးကို ပွင့်ပွင့်လင်းလင်း ဆွေးနွေးခဲ့တာတွေ ရှိပါတယ်။ အဓိက အခြေခံအကျဆုံးမူက အငြင်းပွားမှုတွေကို ငြိမ်းချမ်းစွာဖြေရှင်းဖို့ပါ ပဲ။ အငြင်းပွားမှုမှာ ပါဝင်နေတဲ့ နိုင်ငံတွေက သူတို့ရဲ့ စိုးရိမ်ပူပန်မှုတွေကို ပြောဆိုခဲ့ကြပါတယ်။ အငြင်းပွားတဲ့ နိုင်ငံတွေအချင်းချင်း ပြောဆိုဖို့ပါ။ အာဆီယံအဖွဲ့ဝင် နိုင်ငံတွေက ဒီပြဿနာဖြေရှင်းဖို့ နည်းလမ်းရှာရာမှာ ပံ့ပိုးကူညီဖို့ ဆောင်ရွက်ပါတယ်။ ပြီးရင် code of conduct ကိုလည်း အမြန်ဆုံးပြီးအောင် လုပ်ဆောင်ကြရမှာပါ” ဟု The Wall Street Journal က မေးမြန်းသော မေးခွန်းကို ပြန်ဖြေရာ၌ ဦးဝဏ္ဏမောင်လွင်က ထည့်သွင်းပြောကြားခဲ့သည်။
“အာဆီယံအဖွဲ့အနေနဲ့ ဒီဒေသမှာ တည်ငြိမ်မှု၊ အေးချမ်းမှု၊ ရေကြောင်းလုံခြုံမှု စတာတွေကို ဦးစားပေးပါတယ်။ ဒါကြောင့် ငြိမ်းချမ်းတဲ့အဖြေကိုရှာဖို့ ဆွေးနွေးပွဲတွေဖြစ်လာအောင် အာဆီယံနိုင်ငံတွေက ပံ့ပိုးကူညီပါတယ်။ အရေးကြီးတာက COC အမြန်ဆုံးပြီးဖို့နဲ့ လိုက်နာကြဖို့ပါပဲ” ဟု ဦးဝဏ္ဏမောင်လွင်က ဆက်လက်ပြောကြားသည်။
ထို့အပြင် တရုတ်နိုင်ငံဘက်ကလည်း တောင်တရုတ်ပင်လယ်အတွင်း နိုင်ငံများ လိုက်နာစောင့်ထိန်းရမည့် လုပ်ထုံးလုပ်နည်းဆိုင်ရာ ကြေညာချက် (DOC) အကောင်အထည်ဖော်နိုင်ရေးကို လိုလားနေသည်ဟု Channel News Asia ရုပ်သံလိုင်းမှ သတင်းထောက်မေးမြန်းသော မေးခွန်းကို ပြန်ဖြေရာ၌ ဦးဝဏ္ဏမောင်လွင်က ထည့်သွင်းပြောကြားသည်။
“တရုတ်ကလည်း DOC အကောင်အထည်ဖော်နိုင်ရေးကို လိုလားလျက်ရှိပါတယ်။ ဒါ့အပြင် ကျွန်တော်တို့အားလုံးက COC အမြန်ဆုံးပြီးနိုင်ရေးကိုလည်း ဆောင်ရွက်နေပါတယ်။ တစ်ဖက်က အခြားတစ်ဖက်ကို လွှမ်းမိုးနေတယ်ဆိုတာမျိုး မရှိပါဘူး။ ကျွန်တော်တို့ ASEAN Way လို့ခေါ်တဲ့ အခြေခံမူက ပြဿနာတွေကို ငြိမ်းချမ်းစွာ ဖြေရှင်းဖို့ပါပဲ” ဟု ဦးဝဏ္ဏမောင်လွင်က ဆိုပါသည်။
ခြောက်ရက်ကြာပြုလုပ်ခဲ့သော နေပြည်တော်အာဆီယံ ဆွေးနွေးပွဲများသို့ သက်ဆိုင်ရာနိုင်ငံများမှ တက်ရောက်သူကိုယ်စားလှယ် ၁၀၀၀ ကျော်ရှိခဲ့ပြီး ပြုလုပ်ခဲ့သည့် အစည်းအဝေး ၃၀ ကျော်အနက် ၁၅ ခုမှာ ၀န်ကြီးအဆင့် အစည်းအဝေးများဖြစ်ကြောင်း သိရသည်။
from Eleven Daily News http://ift.tt/1ykPPnS
Comments
Post a Comment