မြန်မာနိုင်ငံ ဝူရှူးအဖွဲ့ချုပ်ဥက္ကဋ္ဌအဖြစ် Green Leap ဟိုတယ်ပိုင်ရှင် တာဝန်ယူမည်
ရန်ကုန်၊ ဇူလိုင် ၂
(၂၇) ကြိမ်မြောက် ဆီးဂိမ်းပြိုင်ပွဲတွင် ပါဝင်သည့် အားကစားနည်း ၃၃ မျိုးအနက် စတုတ္ထမြောက် အောင်မြင်မှု အရှိဆုံးဖြစ်သည့် ဝူရှူးအားကစားနည်း၏ လစ်လပ်လျက်ရှိသော အဖွဲ့ချုပ်ဥက္ကဋ္ဌ ရာထူးကို Green Leap ဟိုတယ်နှင့် Art Wave ဆောက်လုပ်ရေးကုမ္ပဏီ ဥက္ကဋ္ဌ ဦးသစ္စာက တာဝန်ယူ ဆက်ခံခဲ့ကြောင်း မြန်မာနိုင်ငံ ဝူရှူးအဖွဲ့ချုပ် အတွင်းရေးမှူး ဦးခွန်ဂျာအောင်က ပြောကြားသည်။
အဆိုပါရာထူးကို မေလအတွင်း စတင်လက်ခံခဲ့ခြင်းဖြစ်ပြီး ဥက္ကဋ္ဌသစ် လက်ထက် တစ်လအတွင်း လေ့ကျင့်ရေးပိုင်းတွင် တိုးတက်မှုအရှိဆုံး ကစားသမားများကို ဆုပေးခြင်း၊ အားကစားဝန်ကြီးဌာနက ထောက်ပံ့ပေးသောလစာကို အရည်အချင်းအလိုက် ထပ်ဆောင်း ချီးမြှင့်ငွေများ ပေးအပ်ခြင်းများ ပြုလုပ်ခဲ့သည်ဟု ၎င်းကပြောကြားသည်။
မြန်မာနိုင်ငံ ဝူရှူးအဖွဲ့ချုပ်အနေနှင့် ကိုရီးယားနိုင်ငံ အင်ချွန်းမြို့တွင် စက်တင်ဘာလအတွင်း ကျင်းပမည့် အာရှအားကစားပွဲတော်သို့ သွားရောက်ယှဉ်ပြိုင်မည် ဖြစ်ကြောင်း မြန်မာနိုင်ငံ ဝူရှူးအဖွဲ့ချုပ် နည်းပြ ဦးခင်စိုးက ပြောကြားသည်။
မြန်မာနိုင်ငံ ဝူရှူးအဖွဲ့ချုပ်ကို ၁၉၉၃ ခုနှစ်က စတင်တည်ထောင်ခဲ့ရာတွင် ဦးခင်မောင်လေးက ၁၉၉၃ ခုနှစ်မှ ၂၀၀၆ ခုနှစ်အထိ ဥက္ကဋ္ဌရာထူးကို ပထမဆုံး တာဝန်ယူခဲ့ပြီး လွယ်ဟိန်း ကုမ္ပဏီပိုင်ရှင်နှင့် ရတနာပုံအသင်း ပိုင်ရှင်ဖြစ်သည့် ဒေါက်တာစိုင်းဆမ်ထွန်းက ၂၀၀၆ ခုနှစ်မှ ၂၀၁၃ ခုနှစ်အထိ ဥက္ကဋ္ဌအဖြစ် တာဝန်ယူခဲ့ကာ ယခုဦးသစ္စာက တာဝန်ယူခဲ့ခြင်း ဖြစ်သည်။
မြန်မာနိုင်ငံ ဝူရှူးအဖွဲ့ချုပ်အနေနှင့် မြန်မာနိုင်ငံတွင် အိမ်ရှင်အဖြစ်ကျင်းပခဲ့သော (၂၇) ကြိမ်မြောက် SEA Games ပြိုင်ပွဲတွင် ရွှေတံဆိပ်ငါးခု၊ ငွေတံဆိပ်ငါးခု၊ ကြေးတံဆိပ်ငါးခုရရှိခဲ့ပြီး ပြိုင်ပွဲဝင်မြန်မာ အားကစားအဖွဲ့များအနက် စတုတ္ထ အအောင်မြင်ဆုံး အားကစားအဖွဲ့ ဖြစ်သည်။
from The Voice Weekly's Facebook Wall http://ift.tt/1qpXRew
Comments
Post a Comment