မြန်မာ-တရုတ် နယ်စပ်ဒေသများတွင် ခွင့်ပြုပေးထားသည့် နယ်စပ်ဖြတ်ကျော် သွားလာနေထိုင်ခွင့် လက်မှတ်များ မပါဘဲ နိုင်ငံဖြတ်ကျော်ကာ တရားမ၀င် ၀င်ရောက်နေထိုင်မှုများကို စီမံချက်ဖြင့် ဖမ်းဆီးစစ်ဆေးနေကြောင်း မူဆယ်မြို့မှရရှိသော သတင်းများအရ သိရသည်။
၂၀၁၄ ခုနှစ် ဇွန်လအတွင်း တရားမ၀င် ၀င်ရောက်လာသည့် တရုတ်နိုင်ငံသား ၄၀ ဦး ဖမ်းဆီးရရှိခဲ့ကြောင်း၊ ယင်းကဲ့သို့ အရေးယူမှုများ ဆောင်ရွက်နေသကဲ့သို့ အခြားတစ်ဖက်တွင်လည်း ယင်းကဲ့သို့ တရုတ်နိုင်ငံသားများ ခိုးဝင်လာမှုတွင် မြန်မာနိုင်ငံသားများ ပါဝင်ပတ်သက်မှု ရှိနေကြောင်း သိရသည်။
“ဇွန်လထဲမှာ ဖမ်းမိတဲ့အထဲမှာ တရုတ်နိုင်ငံသားက ၄၀၊ ကိုယ့်နိုင်ငံသားက သုံးယောက်ပါတယ်။ သူတို့က သွားသယ်လာတဲ့ သူတွေပေါ့။ အဲဒီအတွက် တစ်ဖက်မှာ ဒီလို နိုင်ငံဖြတ်ကျော် တရားမ၀င် ၀င်ရောက်မှုတွေကို အရေးယူနေသလို တစ်ဖက်ကလည်း လူထုကို အသိပညာပေးတာတွေ လုပ်နေကြပါတယ်။ ဟောပြောပွဲတွေလည်း ကျင်းပနေပါတယ်။ မြို့ထဲက ရပ်ကွက်အုပ်ချုပ်ရေးမှူးရုံးတွေ မြို့လယ် ထင်သာမြင်သာရှိတဲ့ နေရာတွေနဲ့ နိုင်ငံတော်ရဲ့ ၀င်ပေါက်ထွက်ပေါက် နေရာတွေမှာ သတိပေးဆိုင်းဘုတ်တွေကို ဗီနိုင်း စတာတွေနဲ့ ကပ်ထားပါတယ်၊ မူဆယ်-နမ့်ခမ်းဒေသမှာ တရားမ၀င် နိုင်ငံခြားသားကို ခေါ်ဆောင်ဝင်ရောက်လာပါက လ၀ကဥပဒေအရ သယ်ဆောင်လာတဲ့သူပါ အရေးယူခံရနိုင်တယ် ဆိုတာတွေကို အသိပညာပေး ဆောင်ရွက်နေပါတယ်” ဟု လ၀က (မူဆယ်) မှ တာဝန်ရှိသူတစ်ဦးက ပြောကြားသည်။
အလားတူ တရုတ်နိုင်ငံဘက်တွင်လည်း မြန်မာနိုင်ငံဘက်မှ တရားမ၀င် ၀င်ရောက်နေထိုင်သူများကို ဖမ်းဆီးစစ်ဆေးလျက်ရှိကြောင်း သိရသည်။ မြန်မာ-တရုတ် နယ်စပ်ဒေသများတွင် နှစ်နိုင်ငံ သဘောတူညီမှုအရ မြန်မာ-တရုတ်နိုင်ငံသားများအား နယ်စပ်ဖြတ်သန်းခွင့်လက်မှတ် (Border Pass-BP) နှင့် ယာယီနယ်စပ်ဖြတ်သန်းခွင့်လက်မှတ် (Temporary Border Pass-TBP) များဖြင့် ၀င်/ထွက်ခွင့်ပြုလျက်ရှိကြောင်း၊ BP ဖြင့် ခြောက်ညအိပ် ခုနစ်ရက်၊TBP ဖြင့် ခြောက်ညအိပ် ခုနစ်ရက်ခွင့်ပြုကြောင်း၊ မူဆယ်ခရိုင်အတွင်း အိမ်ထောင်စုလူဦးရေ စာရင်းရှိသူများအား တစ်နှစ်သက်တမ်းရှိ BP စာအုပ်များ ထုတ်ပေးလျက်ရှိပြီး ရပ်ဝေးမှ လာရောက်သူများအတွက် ခုနစ်ရက်သာ နေထိုင်ခွင့်ရှိသည့် TBP စာအုပ်များကို ထုတ်ပေးလျက်ရှိကြောင်း သိရသည်။
from Eleven Daily News http://ift.tt/VvYIPk
Comments
Post a Comment