အစိုးရနှင့် ကေအိုင်အိုကိုယ်စားလှယ်များ ပါဝင်သည့် ပဋိပက္ခ ညှိနှိုင်းဖြေရှင်းရေးအဖွဲ့၏ တတိယအကြိမ်မြောက်ဆွေးနွေးမှု မြစ်ကြီးနားမြို့၌ ပြုလုပ်
အစိုးရနှင့် ကချင်လွတ်မြောက်ရေးအဖွဲ့(KIO) ကိုယ်စားလှယ်များ ပါဝင်သော ပဋိပက္ခညှိနှိုင်းဖြေရှင်းရေး အဖွဲ့၏ တတိယအကြိမ်မြောက် ဆွေးနွေးမှုကို ဇူလိုင် ၅ ရက်က ကချင်ပြည်နယ် မြစ်ကြီးနားမြို့ရှိ ကေအိုင်အို ဆက်ဆံရေးရုံး၌ ပြုလုပ်ခဲ့ကြောင်း သတင်းရရှိသည်။
တပ်မတော်နှင့် ကေအိုင်အေတပ်များအကြား ဇွန်လအတွင်းက တိုက်ပွဲကြီးကြီးမားမားဖြစ်ပွားခြင်း မရှိသော်လည်း ဗန်းမော်မြို့နယ်အတွင်းရှိ နှစ်ဖက်တပ်များ နီးကပ်နေသည့် နေရာများတွင် ပစ်ခတ်မှုများ ဖြစ်ပွားခဲ့ရာ နှစ်ဖက်အကြား တိုက်ပွဲများ ဆက်လက်မဖြစ်ပွားရေး ဆောင်ရွက်ရန် ဆွေးနွေးခဲ့ကြသည်ဟု ဆွေးနွေးပွဲသို့ တက်ရောက်ခဲ့သည့် ငြိမ်းချမ်းရေးအကျိုးဆောင်အဖွဲ့ (PCG) မှ ဦးလမိုင်ဂွန်ဂျာက ပြောကြားသည်။
“ပဋိပက္ခဖြစ်ခဲ့တဲ့ မန်ဝိန်းကြီးတို့ ဘာတို့မှာဖြစ်ခဲ့တဲ့ ကိစ္စတွေနဲ့ ပတ်သက်ပြီး ညှိနှိုင်းခဲ့ကြတာပါ။ အခုလို ရှေ့တန်းမှာ ဖြစ်ခဲ့တဲ့ ကိစ္စမျိုးမဖြစ်အောင် ၀ိုင်းဝန်းထိန်းသိမ်းကြဖို့ ဒါတွေကို ပြောကြတာပါပဲ။ တကယ့်ထိပ်တိုက် အရင်တုန်းကလို တိုက်ပွဲကြီးကြီးမားမား ဖြစ်တာမျိုးတော့ မဟုတ်ဘူးပေါ့” ဟု ဦးလမိုင်ဂွန်ဂျာက ဆိုသည်။
အစိုးရနှင့် ကေအိုင်အို၏ ပဋိပက္ခ ညှိနှိုင်းဖြေရှင်းရေး အဖွဲ့တို့အကြား ယခုကဲ့သို့ တွေ့ဆုံဆွေးနွေးခြင်းသည် ငြိမ်းချမ်းရေးလုပ်ငန်းစဉ်ကို အထောက်အကူ ဖြစ်စေသည်ဟု ဦးလမိုင်ဂွန်ဂျာက ပြောကြားသည်။
“ငြိမ်းချမ်းရေးသွားမယ့် ခရီးစဉ်မှာ ပဋိပက္ခ ညှိနှိုင်းဖြေရှင်းရေးအဖွဲ့ နှစ်ဖက်စလုံးက အထောက်အကူ ဖြစ်ပြီးတော့မှ ဖြစ်ခါနီးဟာတွေမဖြစ်အောင် ဖြစ်ပြီးသားဟာတွေကိုလည်း နောက်နောင် မဖြစ်ကြအောင် တစ်ဦးနဲ့တစ်ဦး စည်းကမ်းချမှတ်ထားတဲ့အတိုင်း လိုက်နာကြဖို့အတွက် နှစ်ဦးနှစ်ဖက် သဘောတူတဲ့သဘော သူတို့ဆွေးနွေးသွားတာ ဖြစ်တဲ့အတွက် ငြိမ်းချမ်းရေး လုပ်ငန်းစဉ်မှာတော့ အထောက်အကူဖြစ်တယ်လို့ ဒီလိုပဲ မြင်တယ်ဗျ” ဟု ဦးလမိုင်ဂွန်ဂျာက ဆိုသည်။
တပ်မတော်နှင့် ကေအိုင်အေတို့အကြား ဖြစ်ပွားလျက်ရှိသော တိုက်ပွဲများကြောင့် ကချင်ဒေသခံများ စိုက်ပျိုးရေးလုပ်ငန်းများ ဆောင်ရွက်ရန် အခက်အခဲဖြစ်နေသည့် အခြေအနေများ ဖြေရှင်းပေးရန် ပဋိပက္ခ ညှိနှိုင်းဖြေရှင်းရေး အဖွဲ့ထံသို့ ငြိမ်းချမ်းရေးအကျိုးဆောင်အဖွဲ့ (PCG) မှ တင်ပြထားကြောင်း သိရသည်။
“ပြည်သူလူထုကလည်း သေနတ်သံတွေ မိုင်းသံတွေ ကြားတဲ့အခါကျတော့ စိုးရိမ်တာပေါ့။ စိုးရိမ်တော့ သူတို့ လုပ်ငန်းလုပ်ရတဲ့အခါမှာ အနှောင့်အယှက်ဖြစ်တယ်။ ဒါကြောင့်မို့ ဒီတပ်တွေကို သူ့နေရာနဲ့သူ နေပေးဖို့ ပြောတဲ့အချိန်မှာ သူတို့ကလည်း နှစ်ဖက်က ပြည်သူလူထုကို မထိခိုက်အောင် ပြည်သူလူထုကိုလည်းပဲ ကေအိုင်အေဘက်ကရော၊ တပ်ပိုင်းကရော လိုအပ်ရင် လိုအပ်သလို ၀ိုင်းဝန်းပူးပေါင်းကူညီဖို့ နှစ်ဦးနှစ်ဖက် ဒီလိုပဲ သဘောထားရှိပါတယ်တဲ့။ အဲဒီလိုပဲ ၀ိုင်းဝန်းလုပ်သွားကြရအောင်ဆိုပြီး နှစ်ဦးနှစ်ဖက်က သဘောတူတာပေါ့လေ” ဟု ဦးလမိုင်ဂွန်ဂျာက ပြောကြားသည်။
ကချင်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးသန်းအောင် ဦးဆောင်သည့် အစိုးရ၏ ပဋိပက္ခ ညှိနှိုင်းဖြေရှင်းရေး အဖွဲ့ဝင်များနှင့် ကေအိုင်အိုမှ ပဋိပက္ခ ညှိနှိုင်းဖြေရှင်းရေး အဖွဲ့ဝင်များသည် ပြီးခဲ့သည့် မေ ၂၈ ရက်နေ့က မြစ်ကြီးနားမြို့ရှိ ကေအိုင်အို ဆက်ဆံရေးရုံးတွင် ပထမဆုံးအကြိမ် တွေ့ ဆုံဆွေးနွေးခဲ့ကြပြီး ဇွန် ၁၈ ရက်နေ့တွင် မြစ်ကြီးနားမြို့ရှိ ပြည်နယ်ရဲတပ်ဖွဲ့မှူးရုံးတွင် ဒုတိယအကြိမ်မြောက် တွေ့ဆုံဆွေးနွေးမှု ပြုလုပ်ခဲ့ကြသည်။
from Eleven Daily News http://ift.tt/1vOmAJ2
Comments
Post a Comment