မန္တလေးမြို့တွင် ဖြစ်ပေါ်ခဲ့သည့် လူစုလူဝေးဖြင့် ဆူပူအကြမ်းဖက်မှု ဖြစ်စဉ်များနှင့် ပတ်သက်၍ ပဋိပက္ခများ ထပ်မံမဖြစ်ပွားစေရန်အတွက် ဘာသာပေါင်းစုံ တွေ့ဆုံဆွေးနွေးပွဲ ဒုတိယနေ့၌ သဘောထားကြေညာချက်ရှစ်ချက် ထုတ်ပြန်
မန္တလေးတွင် ဖြစ်ပေါ်ခဲ့သည့် လူစုလူဝေးဖြင့် ဆူပူအကြမ်းဖက်မှု ဖြစ်စဉ်များနှင့် ပတ်သက်၍ ပဋိပက္ခများ ထပ်မံမဖြစ်ပွားစေရန်အတွက် ဘာသာပေါင်းစုံ တွေ့ဆုံဆွေးနွေးပွဲ ဒုတိယနေ့၌ သဘောထားကြေညာချက် ရှစ်ချက်အား ထုတ်ပြန်ကြေညာခဲ့သည်။
ဘာသာပေါင်းစုံ တွေ့ဆုံဆွေးနွေးပွဲအား မန္တလေးမြို့ ချမ်းအေးသာစံမြို့နယ်အတွင်းရှိ အိုရီယမ်တယ်ဟောက်စ် ခန်းမ၌ ဇူလိုင် ၅ ရက် မွန်းလွဲ ၁ နာရီခန့်က ပထမအကြိမ် ပြုလုပ်ခဲ့ပြီး ဇူလိုင် ၆ ရက်တွင် ဘာသာပေါင်းစုံ ချစ်ကြည်ညီညွတ်ရေးအဖွဲ့ (ဗဟို)နှင့် မန္တလေးတိုင်းဒေသကြီး ဘာသာပေါင်းစုံ ချစ်ကြည်ညီညွတ်ရေးအဖွဲ့တို့ ပူးပေါင်းဆွေးနွေးမှုများ ပြုလုပ်ခဲ့ကြသည်။
“မန္တလေးမှာ လတ်တလော ဖြစ်ခဲ့တဲ့ ဖြစ်စဉ်တွေက မှုခင်းဖြစ်စဉ်ကနေ စတင်ခဲ့တာပါ။ စတင်ဖြစ်ခဲ့တဲ့ နေရာမှာ လုံခြုံရေး အကာအကွယ်အောက်ကို ရောက်ရှိဖို့ လိုအပ်တယ်။ လုံခြုံရေး အကာအကွယ်အောက်ကို ရောက်ပြီးပေမယ့်လည်း အခြားနေရာတွေမှာ ဖြစ်ပေါ်လာနိုင်တာကြောင့် ဖြစ်နိုင်ခြေရှိတဲ့ နေရာတွေကို လုံခြုံရေး ချထားပေးဖို့ လိုပါတယ်။ အဲဒီလိုလုပ်တာ နောက်ကျသွားမယ်ဆိုရင် ပြဿနာဟာ ကြီးထွားလာနိုင်တယ်” ဟု ဘာသာပေါင်းစုံ ချစ်ကြည်ညီညွတ်ရေးအဖွဲ့ (ဗဟို)ဥက္ကဋ္ဌ ဦးစိန်ဝင်းအောင်က ပြောကြားသည်။
ဘာသာပေါင်းစုံ ချစ်ကြည်ညီညွတ်ရေးအဖွဲ့ (ဗဟို)နှင့် မန္တလေးတိုင်းဒေသကြီး ဘာသာပေါင်းစုံ ချစ်ကြည်ညီညွတ်ရေးအဖွဲ့တို့ ပူးပေါင်းပြုလုပ်ခဲ့သည့် ဆွေးနွေးပွဲတွင် လတ်တလော ဖြစ်ပွားနေသည့် ပဋိပက္ခဖြစ်စဉ်များ ငြိမ်းချမ်းရေးအတွက် ဆွေးနွေးမှုများ ပြုလုပ်ခဲ့ကြသည်။
ပဋိပက္ခတွင် ပါဝင်ပတ်သက်၍ ဥပဒေကျူးလွန်ခဲ့ကြသူများနှင့် ပဋိပက္ခကို နောက်ကွယ်မှ ကြိုးကိုင်ဆောင်ရွက် နေကြသူများအား လျင်မြန်စွာဖော်ထုတ်ပြီး ဥပဒေနှင့်အညီ ပြတ်သားစွာ အရေးယူပေးပါရန် သက်ဆိုင်ရာသို့ တိုက်တွန်း . . . . .
ဆွေးနွေးပွဲအပြီး၌ ထုတ်ပြန်ကြေညာခဲ့သည့် ကြေညာချက် ရှစ်ချက်မှာ
၁။ ဘာသာပေါင်းစုံ ချစ်ကြည်ညီညွတ်ရေးအဖွဲ့ အဆင့်ဆင့်သည် ပဋိပက္ခနှင့် ဆက်စပ်လျက် ဖြစ်ပေါ်နေသော ကောလာဟလများကို ချေဖျက်သည့်အနေဖြင့် သတင်းအမှန်ဖြင့် မြန်မြန်ဆန်ဆန်တုံ့ပြန်ရန်၊ မလိုလားအပ်သော ပြဿနာများ ထပ်မံမဖြစ်ပွား စေရေးအတွက် ရရှိသော သတင်းအချက်အလက်များကို အထက်အဖွဲ့အစည်း အဆင့်ဆင့်သို့ ချက်ချင်းတင်ပြပြီး ဒေသဆိုင်ရာ အာဏာပိုင် အဖွဲ့အစည်းများနှင့် ပူးပေါင်းကူညီ ဆောင်ရွက်ကြမည့်အကြောင်း အတည်ပြုကြသည်။
၂။ သတင်းမီဒီယာများ အနေဖြင့် ပဋိပက္ခများနှင့် ပတ်သက်၍ သတင်းရေးသားရာတွင် မိမိရေးသားလိုက်သော သတင်းကြောင့် မီးလောင်ရာလေပင့် ဆိုသလို ပဋိပက္ခကို ပိုမိုမဖြစ်ပွားစေရန်အတွက် ကျင့်ဝတ်နှင့်အညီ သတင်းမှန်များကို ရေးသားကြရန်နှင့် ရပ်ရွာတည်ငြိမ်အေးချမ်းမှုကို ၀ိုင်းဝန်းကူညီ ဆောင်ရွက်ပေးရန် တိုက်တွန်းသည်။
၃။ မန္တလေးမြို့တွင် မကြာသေးမီက ဖြစ်ပွားခဲ့သည့် ပဋိပက္ခကို မကြီးထွားစေရန်နှင့် ရပ်ရွာတည်ငြိမ် အေးချမ်းစေရေးအတွက် ဆရာတော်ကြီးများ၊ သံဃာတော်များနှင့် ဘာသာပေါင်းစုံမှ ဘာသာရေးခေါင်းဆောင်များက ၀ိုင်းဝန်းထိန်းသိမ်း စောင့်ရှောက်မှု ပေးကြသည့်အတွက် မန္တလေးမြို့တွင် တည်ငြိမ်အေးချမ်းမှု မြန်မြန်ဆန်ဆန် ရရှိလာခြင်းကြောင့် ဆရာတော်ကြီးများ၊ သံဃာတော်များနှင့် ဘာသာပေါင်းစုံမှ ဘာသာရေးခေါင်းဆောင်များအား ဘာသာပေါင်းစုံ ချစ်ကြည်ညီညွတ်ရေးအဖွဲ့က အထူးကျေးဇူးတင်ရှိကြောင်း မှတ်တမ်းတင်သည်။
၎။ မန္တလေးမြို့တွင် အေးချမ်းသာယာမှုများ ရရှိစေရေးအတွက် ဘာသာပေါင်းစုံ ချစ်ကြည်ညီညွတ်ရေးအဖွဲ့ဝင် ခရစ်ယာန်အသင်းအဖွဲ့များက ၀တ်ပြုဆုတောင်းမှုများ ပြုလုပ်ပေးကြခြင်းကို ဘာသာပေါင်းစုံ ချစ်ကြည်ညီညွတ်ရေးအဖွဲ့က ကျေးဇူးတင်ကြောင်း မှတ်တမ်းတင်သည်။
၅။ ပဋိပက္ခတွင် ပါဝင်ပတ်သက်၍ ဥပဒေကျူးလွန်ခဲ့ကြသူများနှင့် ပဋိပက္ခကို နောက်ကွယ်မှ ကြိုးကိုင်ဆောင်ရွက် နေကြသူများအား လျင်မြန်စွာဖော်ထုတ်ပြီး ဥပဒေနှင့်အညီ ပြတ်သားစွာ အရေးယူပေးပါရန် သက်ဆိုင်ရာသို့ တိုက်တွန်းသည်။
၆။ ရာဇ၀တ်မှုကို ရာဇ၀တ်ကြောင်းအရ ဥပဒေဖြင့် ကျောသားရင်သား မခွဲခြားဘဲ ထိရောက်စွာ အရေးယူ ဆောင်ရွက်ပေးရန် တိုက်တွန်းသည်။
၇။ ရာဇ၀တ်မှုကြောင့် ဖြစ်ပေါ်လာသော ပဋိပက္ခများကို လုံခြုံရေး အပြည့်အ၀ဖြင့် ထိရောက်လျင်မြန်စွာ စီမံဆောင်ရွက်ပေးပါရန် တိုက်တွန်းသည်။
၈။ မြန်မာနိုင်ငံအတွင်း မှီတင်းနေထိုင်ကြသူ ပြည်သူအပေါင်းသည် ဘာသာအယူအဆ တစ်ဦးနှင့်တစ်ဦး ကွဲပြားခြားနားကြရုံမျှဖြင့် မတူညီကြသူများဟု တစ်ဦးနှင့်တစ်ဦး တစ်ဖွဲ့နှင့်တစ်ဖွဲ့ မရှုမြင်ကြဘဲ တစ်အူတုံဆင်း ညီရင်းအစ်ကို မောင်နှမများပမာ ရင်းနှီးချစ်ကြည်စွာ ဆက်ဆံကြရန် ထပ်မံမေတ္တာရပ်ခံသည်။ ဒီမိုကရေစီ၏ တန်ဖိုးတစ်ခုဖြစ်သော ကွဲပြားခြားနားခြင်းများအတွက် ညီညွတ်သဟဇာတဖြစ်စွာ နေထိုင်တတ်ခြင်း အလေ့အထကို မွေးမြူကြရန် တိုက်တွန်းသည်ဟု ထုတ်ပြန်ကြေညာခဲ့ကြသည်။
from Eleven Daily News http://ift.tt/1lLBsCe
Comments
Post a Comment