အီရတ်သို့ အမေရိကန်တပ်သားများ အိုဘားမား ထပ်မံစေလွှတ်
ဘဂ္ဂဒက်၊ ဇူလိုင် ၁
အီရတ်နိုင်ငံတွင် အစိုးရတပ်များနှင့် ဆွန်နီလက်နက်ကိုင် သူပုန်များကြား တိုက်ပွဲအရှိန် မြင့်တက်လျက်ရှိသဖြင့် ဘဂ္ဂဒက်ရှိ အမေရိကန်သံရုံးကို ကာကွယ်ရန် အမေရိကန်သမ္မတ အိုးဘားမားက အမေရိကန်တပ်သား ၂၀၀ ခန့်ကို အီရတ်နိုင်ငံသို့ ထပ်မံစေလွှတ်လိုက်ကြောင်း CNA သတင်းဌာနတွင် ဖော်ပြထားသည်။
“ဘဂ္ဂဒက်ရဲ့ လက်ရှိလုံခြုံရေး အခြေအနေအရ အမေရိကန်သံရုံး၊ သံရုံးဆက်စပ် အဆောက်အအုံတွေနဲ့ ဘဂ္ဂဒက် နိုင်ငံတကာလေဆိပ်တို့ရဲ့ လုံခြုံရေးကို အားဖြည့်ပေးနိုင်ဖို့အတွက် အမေရိကန်တပ်သား ၂၀၀ ခန့်ကို အီရတ်နိုင်ငံကို ထပ်မံစေလွှတ်ထားပါတယ်” ဟု တနင်္လာနေ့က လွှတ်တော်သို့ တင်သွင်းသော စာတစ်စောင်တွင် အိုဘားမားက ပြောကြားထားသည်။
“အမေရိကန်နိုင်ငံသားတွေနဲ့ ၎င်းတို့ရဲ့ ပိုင်ဆိုင်မှုတွေကို ကာကွယ်ဖို့အတွက် အခုလိုတပ်သားတွေ ထပ်မံစေလွှတ်ခဲ့တာ ဖြစ်ပြီး လိုအပ်ရင် တိုက်ခိုက်ခွင့်ပါပေးသွားမှာ ဖြစ်ပါတယ်” ဟု အိုဘားမားက ပြောကြားသည်။
အိုဘားမား ထပ်မံစေလွှတ်လိုက်သော အမေရိကန်တပ်သား ၂၀၀ ခန့် အီရတ်နိုင်ငံသို့ တနင်္ဂနွေနေ့က ရောက်ရှိခဲ့ပြီးနောက်တွင် အီရတ်ရှိ အမေရိကန်တပ်သား အရေအတွက်မှာ ၈၀၀ ခန့်သို့ ရောက်ရှိသွားခဲ့သည်။
အီရတ်နိုင်ငံတွင် ဆွန်နီ လက်နက်ကိုင် သူပုန်များက ရုတ်တရက် ထိုးစစ်ဆင် တိုက်ခိုက်လာခဲ့ပြီးနောက် ပြီးခဲ့သော တစ်လအတွင်းမှာပင် လူ ၂၀၀၀ နီးပါး အသက်ဆုံးရှုံးခဲ့ရသည်။
ထို့အတူ အစိုးရတပ်များကလည်း ဘာသာရေး အစွန်းရောက် လက်နက်ကိုင် သူပုန်များလက်သို့ ကျရောက်လျက်ရှိသော မြို့များထဲမှ တစ်မြို့ဖြစ်သည့် တီခရစ်မြို့ကို တနင်္လာနေ့က ပြန်လည် ထိုးစစ်ဆင်တိုက်ခိုက်ခဲ့သည်။
ဆဒမ်ဟူစိန်၏ ဇာတိမြို့ဖြစ်သော တီခရစ်မြို့၏ ဆင်ခြေဖုံးဒေသများကို အစိုးရတပ်ဖွဲ့ဝင်များက ပြန်လည် ထိန်းချုပ်နိုင်ခဲ့ပြီဟု အီရတ်စစ်တပ်မှ အရာရှိတစ်ဦးက ပြောကြားသည်။
တီခရစ်မြို့သည် ဘဂ္ဂဒက်မြို့မှ မြောက်ဘက် မိုင် ၁၀၀ ခန့်တွင်တည်ရှိပြီး ဇွန်လ ၁၁ ရက်နေ့က သူပုန်များလက်သို့ ကျရောက်သွားခဲ့ခြင်း ဖြစ်သည်။
မွတ်ဆလင်ဂိုဏ်းခွဲ နှစ်ခုဖြစ်သော ရှီးယိုက်နှင့် ဆွန်နီတို့အကြား ပဋိပက္ခများကို အခြေခံသည့် တိုက်ပွဲများကြောင့် အီရန်ပြည်သူ အများအပြား အိုးမဲ့အိမ်မဲ့ဘဝသို့ ရောက်ရှိခဲ့ပြီး ဝန်ကြီးချုပ် နူရီအယ်လ်မီလီကီမှာလည်း ဖိအားများနှင့် ရင်ဆိုင်ရလျက်ရှိသည်။
လက်ရှိအချိန်တွင် ဆီးရီးယားနှင့် အီရတ်နယ်စပ်ရှိ ဧရိယာ အများအပြားမှာ ဆွန်နီသူပုန်အဖွဲ့ဖြစ်သော ISIS လက်သို့ ကျရောက်လျက်ရှိပြီး ISIS အဖွဲ့က ၎င်းတို့ထိန်းချုပ်ထားသော ဧရိယာများကို စုပေါင်းကာ အစ္စလာမ္မစ် နိုင်ငံတော်အဖြစ် တနင်္ဂနွေနေ့က ကြေညာခဲ့သည်။
ကမ္ဘာ့နိုင်ငံများမှ ခေါင်းဆောင်များကမူ ရှီးယိုက်မွတ်ဆလင် တစ်ဦးဖြစ်သော လက်ရှိ အီရတ်ဝန်ကြီးချုပ် မီလီကီကို နုတ်ထွက်စေပြီး ညွှန့်ပေါင်းအစိုးရ တစ်ဖွဲ့ဖွဲ့ရန် အီရတ်ခေါင်းဆောင်များကို တွန်းအားပေးလျက် ရှိသည်။
from The Voice Weekly's Facebook Wall http://ift.tt/1onvDze
Comments
Post a Comment