ရခိုင်အမျိုးသားပါတီ ညီလာခံသို့ ဧရာဝတီတိုင်းဒေသကြီးရှိ ရခိုင်တိုင်းရင်းသားများ ကိုယ်စားပြုကိုယ်စားလှယ်များ တက်ရောက်ခွင့်ရရှိမည်ဖြစ်သဖြင့် ရခိုင်အမျိုးသားပါတီ၏ ဧရာဝတီတိုင်းပါတီအား ဖွဲ့စည်းရန် ဆောင်ရွက်လျက်ရှိကြောင်း ပါတီခေါင်းဆောင် ဦးအေးသာအောင်က The Daily Eleven သို့ ပြောကြားသည်။
ဧရာဝတီတိုင်းဒေသကြီး ပါတီဖွဲ့စည်းရန်အတွက် ရပ်/ကျေးပါတီများ ဖွဲ့စည်းရေးအား ချောင်းသာကမ်းခြေ၊ ငွေဆောင်ကမ်းခြေ၊ ဟိုင်းကြီးမြို့နယ်ခွဲ၊ မော်တင်စွန်းဒေသများရှိ ရခိုင်တိုင်းရင်းသား အများစုနေထိုင်ရာ ကျေးရွာများတွင် ဟောပြောစည်းရုံးရေး လုပ်ငန်းများကို ဇူလိုင် ၂၄ ရက်မှ ၂၇ ရက်ထိ ပြုလုပ်ခဲ့ကြောင်း သိရသည်။
“ပုသိမ်ကမ်းခြေအပါအ၀င် ဧရာဝတီတိုင်းက အခုကျင်းပမယ့် ပါတီညီလာခံမှာ ညီလာခံကိုယ်စားလှယ် ခုနစ်ယောက်ထိ တက်ခွင့်ရှိပါတယ်။ ခုနစ်ယောက်ကို ညီလာခံတက်ဖို့အတွက် ဘယ်လိုရွေးမယ်။ ဘယ်လိုစုဖွဲ့မယ်။ ကျေးလက်ဒေသမှာ အဖွဲ့တွေဖွဲ့ပြီးတော့ ပုသိမ်မှာစုစည်းပြီး ဧရာဝတီတိုင်းမှာ ရခိုင်အမျိုးသားပါတီ ဖွဲ့ရမယ်။ ပြီးရင် ညီလာခံကိုယ်စားလှယ် ဘယ်လိုစနစ်တကျ ရွေးမယ်ဆိုတာကို အဲဒီ ရခိုင်တိုင်းရင်းသားအများစုနေတဲ့ ဒေသတွေကိုသွားပြီး စည်းရုံးပြောကြားတယ်” ဟု ဦးအေးသာအောင်က ပြောကြားသည်။
ရခိုင်အမျိုးသားပါတီ၏ ပထမအကြိမ် ပါတီညီလာခံကို ရခိုင်ပြည်နယ် သံတွဲမြို့ ငပလီကမ်းခြေဒေသတွင် စက်တင်ဘာ ၂၅ ရက်မှ ၂၉ ရက်အထိ ငါးရက်ကြာ ပြုလုပ်မည်ဖြစ်ပြီး ညီလာခံ၌ ပါတီဗဟိုကော်မတီ၊ ဗဟိုအလုပ်အမှုဆောင်ကော်မတီ၊ ပါတီဥက္ကဋ္ဌတို့အား ရွေးချယ်ခြင်းများ ပြုလုပ်မည်ဖြစ်ကြောင်း သိရသည်။
ထို့ပြင် ရခိုင်အမျိုးသားပါတီ ရုံးဖွင့်လှစ်ထားသော မြို့နယ်များတွင် သြဂုတ် ၃၁ ရက် နောက်ဆုံးထားကာ မြို့နယ်ညီလာခံများ ပြုလုပ်သွားမည်ဖြစ်ပြီး အဆိုပါ မြို့နယ်ညီလာခံများမှတစ်ဆင့် မြို့နယ်ကိုယ်စားလှယ်များ ရွေးချယ်မည်ဖြစ်ကြောင်း သိရသည်။
ရခိုင်ဒီမိုကရေစီအဖွဲ့ချုပ်နှင့် ရခိုင်တိုင်းရင်းသားများ တိုးတက်ရေးပါတီတို့အား ပူးပေါင်း၍ ပေါ်ပေါက်လာသည့် ရခိုင်အမျိုးသားပါတီမှာ လက်ရှိတွင် ရခိုင်ပြည်နယ် စစ်တွေမြို့၌ ရုံးချုပ်အား အခြေစိုက်ထားပြီး ရခိုင်ပြည်နယ်အတွင်းရှိ မြို့နယ်အားလုံး၌လည်း ရုံးခွဲများ ဖွင့်လှစ်ထားသည့်အပြင် ရန်ကုန်မြို့၌ ပါတီရုံးဖွင့်ထားသည်။
from Eleven Daily News http://ift.tt/1qi4fCr
Comments
Post a Comment