အကူအညီပေးရေးအဖွဲ့များ၏ ထောက်ပံ့ကူညီမှု အချိန်မီမရရှိသောကြောင့် ကေအိုင်အိုထိန်းချုပ် နယ်မြေအတွင်းရှိ ဒုက္ခသည်စခန်းအချို့ ရိက္ခာပြတ်လပ်မှု ဖြစ်ပေါ်နေ
အကူအညီပေးရေး အဖွဲ့များ၏ ထောက်ပံ့ကူညီမှု အချိန်မီမရရှိသောကြောင့် ကချင်လွတ်မြောက်ရေးအဖွဲ့ (ကေအိုင်အို) ထိန်းချုပ်နယ်မြေအတွင်းရှိ ဒုက္ခသည်စခန်းအချို့ ရိက္ခာပြတ်လပ်မှု ဖြစ်ပေါ်နေကြောင်း ကချင်ပြည်နယ် လိုင်ဇာမြို့အခြေစိုက် စစ်ဘေးဒုက္ခသည် ကူညီစောင့်ရှောက်ရေးကော်မတီ (IRRC) နှင့် စစ်ဘေးရှောင် ဒုက္ခသည်စခန်းအချို့မှ သိရသည်။
လက်ရှိတွင် ကေအိုင်အို ထိန်းချုပ်နယ်မြေအတွင်း၌ စစ်ဘေးရှောင်ဒုက္ခသည်စခန်း ၁ဝ ခုကျော်ရှိပြီး စစ်ဘေးဒုက္ခသည် ၈၂ဝဝဝ ဝန်းကျင်ရှိကာ လက်ရှိမိုးကာလဖြစ်သည့်အပြင် တပ်မတော်နှင့် ကေအိုင်အေတို့စစ်ပွဲ တစ်ကျော့ပြန်ဖြစ်ပွားခဲ့သည့် ၂ဝ၁၁ ခုနှစ် နှစ်လယ်ပိုင်းက စတင်ဆောက်လုပ်ခဲ့သော စစ်ဘေးဒုက္ခသည် နေအိမ်များမှာ ပျက်စီးနေသောကြောင့် ပြန်လည်ဆောက်လုပ်ရန် လိုအပ်နေသည်ဟု IRRC ဥက္ကဋ္ဌ ဦးဒွဲပီဆားက ပြောကြားသည်။
ဦးဒွဲပီဆားက“အဓိက အကြီးမားဆုံး အခက်အခဲက စားသောက်ရေးရိက္ခာပေါ့။ ဘာကြောင့်လည်းဆိုတော့ ဘာမှ ဝင်ငွေရှာမယ့်နေရာ မရှိဘူး။ လုပ်ကိုင်စားသောက်မယ့် နယ်မြေလည်း မရှိဘူး။ တောင်ယာခုတ်မယ့် လယ်လုပ်မယ့်နေရာလည်း မရှိဘူးဆိုတော့ ကျွန်တော်တို့က သူများရဲ့အကူအညီကို အားကိုးမျှော်ကိုးပြီးနေရတဲ့ အခြေအနေ ရှိနေတယ်။ ဒုတိယက နေရေး၊ ထိုင်ရေး၊ ကျန်းမာရေး ပညာရေး အဲဒါတွေက အဓိက အခက်အခဲတွေ ကြုံရတယ်” ဟုဆိုသည်။
“အရင်တုန်းက ဆန်၊ ဆီ၊ ပဲ စတာတွေ ဝေတယ်။ အခု တစ်လကျော်လောက်ရှိပြီ ဆန်မဝေသေးတာ။ လောလောဆယ် စားဖို့ဆန်က ရှိနေသေးတယ်။ ဟင်းအတွက်ကတော့ ခက်တယ်။ ယောက်ျားက အလုပ်ရှာဆိုပြီးထွက်သွားတာ တစ်နှစ်ကျော်ကြာပြီ ဘာသတင်းမှမရဘူး။ ကလေးငါးယောက် ရှိတယ်။ ကလေးထိန်းမယ့်သူမရှိတော့ အလုပ်ထွက်လုပ်လို့ကလည်း မရဘူး” ဟု လဂျားယန်မှ မရယ်ဆန်းက ပြောပြသည်။
“ဆန်က ပြတ်တယ်ဆိုတာထက် မရောက်သေးတာပါ။ ဝင်မယ့်ရက် မရောက်သေးလို့ပေါ့။ အခု ရပ်ကွက်ထဲမှာ ထမင်းမစားရတာမျိုးတော့ မရှိသေးပါဘူး။ ဝင်လာမယ့် အဖွဲ့အစည်းတွေ မဝင်လာသေးလို့” ဟု ဂျေယန်းစစ်ရှောင်စခန်းတာဝန်ခံ ဦးဝိုင်းဒူက ဆိုသည်။
စစ်ဘေးရှောင် ဒုက္ခသည်များအတွက် ရိက္ခာများကို NGO များ တိုက်ရိုက်ကူညီ ထောက်ပံ့ခြင်းမလုပ်ဘဲ Local NGO များကို လွှဲပြောင်းပေးအပ်ခြင်းဖြစ်ကြောင်း၊ Local NGO များက စခန်းအလိုက် တာဝန်ခွဲဝေပေးခြင်းဖြစ်ကြောင်း သိရသည်။
ဦးဒွဲပီဆားက “ဒုက္ခသည် ရှစ်သောင်းကျော်ရဲ့ စားဝတ်နေရေးအတွက် ပြည်တွင်းပြည်ပ အကူအညီပေးရေးအဖွဲ့တွေ ကူညီကြတယ်။ တချို့ဆိုရင် နည်းနည်းငွေရေးကြေးရေး အခက်အခဲကြောင့် ရမယ်ဆိုတဲ့အချိန်မှာ မရတဲ့အတွက်ကြောင့် ဒုက္ခသည်စခန်းမှာ ရိက္ခာပြတ်တာ လောလောဆယ် သတင်းကြားတဲ့ စခန်းတချို့ရှိတယ်။ အခုလောလောဆယ် သတင်းကြားရတာကတော့ မဂါးယန်ဆိုတဲ့ စခန်းပါ။ အပြင်ကနေ ကူညီတဲ့အဖွဲ့အစည်းတွေ ဆက်တိုက်မပေးနိုင်ဘူးဆိုရင်တော့ ဒုက္ခသည်တွေကို အစာအငတ်ထားပြီး လျစ်လျူရှုထားမှာ မဟုတ်ပါဘူး” ဟုဆိုသည်။
လက်ရှိတွင် မြန်မာ-တရုတ်နယ်စပ် လိုင်ဇာမြို့အနီးရှိ စစ်ရှောင်စခန်းများဖြစ်သော ဂျေယန်းနှင့် ဖွန်လွန်ယန်စခန်းများမှ စစ်ဘေးဒုက္ခသည်အချို့သည် တရုတ်နိုင်ငံသားများပိုင်သော ငှက်ပျောခြံ၊ လက်ဖက်ခြံ၊ ကော်ဖီခြံနှင့် ငရုတ်ကောင်းခြံများတွင် နေ့စားလုပ်ငန်းများ လုပ်ကိုင်လျက်ရှိသည်။
“တရုတ်တွေက သူတို့အချင်းချင်း ၅ဝ ယွမ်ပေးရင် ကျွန်တော်တို့ကို ၃ဝ လောက်ပေးတာပေါ့။ အလုပ်က အမြဲတမ်းရှိနေတာတော့ မဟုတ်ပါဘူး။ ရာသီအလိုက်ပါပဲ” ဟု ဂျေယန်းစခန်းမှ ကိုဒေါင်ဇင်ကဆိုသည်။
from Eleven Daily News http://ift.tt/1oHfRAI
Comments
Post a Comment