အစိုးရတာဝန်ရှိသူများနှင့် လူငယ်များ တိုက်ရိုက်တွေ့ဆုံဆွေးနွေးနိုင်မည့် ပြည်ထောင်စုလူငယ်စင်တာ သြဂုတ်လအတွင်း ဖွင့်လှစ်မည်
လူငယ်များက အစိုးရတာဝန်ရှိသူများနှင့် တိုက်ရိုက်တွေ့ဆုံဆွေးနွေးနိုင်မည့် ပြည်ထောင်စုလူငယ်စင်တာအား သြဂုတ်လ အတွင်း ဖွင့်လှစ်မည်ဖြစ်ကြောင်း အဆိုပါစင်တာလုပ်ငန်းကော်မတီဝင်တစ်ဦးဖြစ်သူ ကိုသက်ဆွေဝင်းက ဇူလိုင် ၃၀ ရက်တွင် The Daily Eleven သို့ပြောကြားသည်။
"ကျွန်တော်တို့ အခုလူငယ်စင်တာလုပ်ငန်းကော်မတီကိုဖွဲ့ပြီးပြီ။ ဒီနေရာမှာ ကျွန်တော်တို့ဒါရိုက်တာအဖွဲ့ကို လူငယ်တွေနဲ့ချည်းပဲ ဖွဲ့စည်းထားတယ်။ နောက် အကြံပေးအဖွဲ့ကို အစိုးရတာဝန်ရှိသူတွေနဲ့ အရပ်ဘက်အဖွဲ့အစည်းက တာဝန်ရှိသူအချို့ ပါဝင်ဖွဲ့စည်းသွားမယ်။ ကျွန်တော်တို့ နောက်လူငယ်စင်တာကို ပြည်ထောင်စုလူငယ်စင်တာဆိုပြီး အမည်ပေးတယ်။ ကျွန်တော်တို့စင်တာဖွင့်ဖို့ အပတ်စဉ်တွေ့ဆုံခဲ့ပါတယ်။ အခုစင်တာနဲ့ပတ်သက်ပြီး လူငယ်ရေးရာမူဝါဒတွေက အတည်ဖြစ်သွားပြီဖြစ်သလို ဒါကို သြဂုတ်အတွင်းမှာစဖွင့်မယ်။ ဒီတစ်ပတ်စနေ (သြဂုတ် ၂ ရက်) မှာ အစိုးရတာဝန်ရှိသူတွေနဲ့စတင်တွေ့ဆုံပြီး လုပ်ငန်းစဉ်တွေစတင်မှာပါ" ဟု ကိုသက်ဆွေဝင်းက ပြောကြားသည်။
ပြည်ထောင်စုလူငယ်စင်တာအား ရန်ကုန်မြို့ အင်းစိန်မြို့နယ်တွင် ဖွင့်လှစ်ထားခြင်းဖြစ်ကာ အဆိုပါလူငယ်စင်တာတွင် ပြည်ထောင်စုဝန်ကြီးများနှင့် ၀န်ကြီးဌာနတာဝန်ရှိသူများမှ အပတ်စဉ် စနေနှင့် တနင်္ဂနွေတို့တွင် စင်တာသို့လာရောက်ကာ လူငယ်အဖွဲ့အစည်းများ၏ တင်ပြချက်များ၊ အမြင်များနှင့် လိုအပ်ချက်များအား လာရောက်နားထောင်သွားမည်ဖြစ်ပြီး မြန်မာနိုင်ငံ၏ ပထမဆုံးသော လူငယ်မူဝါဒရေးဆွဲရာတွင် အဆိုပါလူငယ်စင်တာမှ လူငယ်များနှင့် ဆွေးနွေးရရှိသည့်အချက်များအပေါ်မူတည်၍ ရေးဆွဲသွားနိုင်ရန် ရည်ရွယ်ကြောင်း သိရသည်။
"ဒါကျွန်တော်တို့နိုင်ငံမှာတော့ အစိုးရက ပထမဆုံး လူငယ်လှုပ်ရှားမှုတွေအတွက်လုပ်ပေးတဲ့နေရာပေါ့။ တိုင်းနဲ့ပြည်နယ်အသီးသီးမှာလည်း ဒီစင်တာခွဲတွေဖွင့်နိုင်အောင် ကျွန်တော်တို့လုပ်သွားမှာပါ" ဟု ကိုသက်ဆွေဝင်းက ဆက်လက်ပြောကြားသည်။
မြန်မာနိုင်ငံရှိလူငယ်များနှင့် သက်ဆိုင်ရာ လူငယ်ရေးရာဝန်ကြီးများ အမြဲဆက်သွယ်မှုရှိစေရန်နှင့် လူငယ်အသံများ သက်ဆိုင်ရာအစိုးရအဖွဲ့အစည်းများမှ သိရှိစေရန် ရည်ရွယ်ချက်ဖြင့် ဖွင့်လှစ်ခြင်းဖြစ်ကြောင်း သမ္မတဦးသိန်းစိန်က ပြောကြားထားသည်။
from Eleven Daily News http://ift.tt/1nJp6jV
Comments
Post a Comment