ဝန်ကြီးဦးအုန်းမြင့် အလိုမရှိကြောင်း ဆန္ဒပြသူကို အလုပ်ကြမ်း နှင့် ထောင်တစ်လ အမိန့်ချ
ရေခဲ(ပြည်)
ပြည်၊ မဇ္ဈိမ။ ။ မွေးမြူရေးနှင့် ရေလုပ်ငန်းဝန်ကြီးဌာန ပြည်ထောင်စုဝန်ကြီး ဦးအုန်းမြင့်အား ရာထူးမှနုတ်ထွက်ပေးရန် မကွေးတိုင်း သရက်ခရိုင် အောင်လံမြို့နယ်တွင် ဦးဆောင်ဆန္ဒပြခဲ့သူ အောင်လံ အမျိုးသားဒီမိုကရေစီ အဖွဲ့ချုပ် တွဲဖက် အတွင်းရေးမှူး ကိုမြတ်ကိုအား အောင်လံမြို့နယ်တရားရုံးက ဇူလိုင်လ ၄ရက်တွင် အလုပ်ကြမ်း နှင့် ထောင်ဒဏ်တစ်လ ချမှတ်လိုက်သည်။
" ဒီနေ့ ဆယ်နာရီ ရုံးချိန်းသွားတော့ တစ်နာရီ ပြန်ချိန်းတယ်။ နှစ်နာရီလောက်မှာ အမိန့်ချသွားတယ်။ အပေါ်က စာရွက်နဲ့ လုပ်သွားတာ။ အမိန့်ချပြီးပြီးချင်းပဲ သရက်ထောင်ကို တန်းခေါ်သွားတယ်။ ဘာမှတောင် မှတ်ချက်ပေးမသွားနိုင်ဘူး " ဟု ကိုမြတ်ကို ၏ ညီဖြစ်သူ ကိုထွန်းလွင်က မဇ္ဈိမသို့ပြောသည်။
မွေးမြူရေးနှင့် ရေလုပ်ငန်းဝန်ကြီးဌာန ပြည်ထောင်စုဝန်ကြီး ဦးအုန်းမြင့်ကို ရာထူးမှ နုတ်ထွက်ပေးရန် မကွေးတိုင်း သရက်ခရိုင် အောင်လံမြို့နယ်တွင် ၂၀၁၄ခုနှစ်၊ ဖေဖော်ဝါရီလ ၁၀ရက်က ကိုမြတ်သူ ဦးဆောင်သော မြို့သူမြို့သား တစ်ထောင်ကျော်က ဆန္ဒဖော်ထုတ်ခဲ့သည်။
ယင်းအမှုကို အောင်လံမြို့နယ်တရားရုံးတွင် မြို့နယ်တရားသူကြီး ဒေါ်နွဲ့နွဲ့ဦးက လေးလကျော်ကြာ စစ်ဆေးခဲ့ပြီး ဇူလိုင်လ ၄ရက်တွင် ထောင်ဒဏ်တစ်လ အမိန့်ချမှတ်လိုက်ခြင်း ဖြစ်သည်။
ထို့အပြင် ဝန်ကြီးဦးအုန်းမြင့် ရာထူးမှ နုတ်ထွက်ပေးရန်အတွက် ပဲခူးတိုင်း ပြည်ခရိုင် ပြည်မြို့တွင်လည်း တရားလွှတ်တော်ရှေ့နေ ဦးမြင့်အေးက တစ်ကိုယ်တော်ဆန္ဒထုတ်ဖော်ခဲ့၍ ငြိမ်းချမ်းစွာစုဝေးခွင့် နှင့် ငြိမ်းချမ်းစွာ စီတန်းလှည့်လည်ခွင့် ဆိုင်ရာ ဥပဒေပုဒ်မ (၁၈)ဖြင့် တရားဆွဲခံထားရသည်။
ဝန်ကြီးဦးအုန်းမြင့်က မကွေးတိုင်း၊ သစ်ရာကောက်ကျေးရွာမှ ရွာသားများနှင့်တွေ့ဆုံစဉ် “ဘယ်ကောင်မှ ဂရု မစိုက်ဘူး။ ကြိုက်တဲ့ကောင်ပြော၊ ရေးချင်တဲ့ကောင်ရေး ကျွန်တော်ကလည်း ပုဆိုးလှန်ပြလိုက်မယ်။ ဒီလိုမျိုး နေခဲ့တဲ့ကောင်လေ၊ သေမှာတောင် မကြောက်တဲ့ကောင်၊ ကျွန်တော်က ဘာကိုကြောက်ရမလဲ” ဟု ပြောဆိုခဲ့သည်။ ယင်းအပြင် နယ်လှည့်ပါးရိုက်နေသည်ဆိုသည့် စကားများ မကျေနပ်၍ ရန်ကုန်၊ မန္တလေး၊ မကွေးတိုင်းနှင့် ပြည်မြို့တို့တွင် ဆန္ဒပြပွဲများ ပြုလုပ်ခဲ့ခြင်း ဖြစ်သည်။
ပုံစာ- ဦးအုန်းမြင့် ရာထူးမှ နုတ်ထွက်ပေးရန် ဖေဖော်ဝါရီလက အောင်လံမြို့တွင် ဆန္ဒထုတ်ဖော်စဉ်။ (ဓာတ်ပုံ- ရေခဲ၊ပြည်)
from Mizzima - News in Burmese's Facebook Wall http://ift.tt/1s8cKS6
Comments
Post a Comment