အခြေခံလစာ တိုးမြှင့်ပေးရန် Han Jen အထည်ချုပ်လုပ်သား ၆၀၀ ဆန္ဒပြ
ရန်ကုန်၊ ဇွန် ၄
မြန်မာနိုင်ငံတွင် အနည်းဆုံး လုပ်အားခ သတ်မှတ်နိုင်ခြင်း မရှိသေးရာ ရန်ကုန်တိုင်းဒေသကြီး ရွှေပြည်သာစက်မှုဇုန် အမှတ် (၂) မှ Han Jen အထည်ချုပ် အလုပ်သမား ၆၀၀ ဝန်းကျင် အခြေခံလစာ တိုးမြှင့်ပေးရန် ဇွန်လ ၂ ရက်နေ့မှ စတင်ကာ ဆန္ဒပြ တောင်းဆိုနေကြောင်း အလုပ်သမား ကိုယ်စားလှယ် ဒေါ်အိအိငြိမ်းက ပြောကြားသည်။
လက်ရှိ ရရှိနေသည့် အခြေခံလုပ်အားခ ကျပ်ခြောက်သောင်းကို နှစ်သောင်းကျပ် ထပ်မံတိုးမြှင့်ပေးရန်၊ တစ်နှစ်ပြည့် အလုပ်သမားများကို နှစ်တိုးကြေး ကျပ်သုံးထောင်ပေးရန်၊ အချိန်ပိုနှင့် အလုပ်ဆင်းချိန် တိတိကျကျ ခွဲခြားသတ်မှတ်ပေးရန်၊ လုပ်အားခကို လဆန်း ၅ ရက်နေ့တွင် ထုတ်ပေးရန်၊ အလုပ်ဆင်းရန် ပျက်ကွက်သည့် လုပ်သားများကို ရာထူးမချရန် အချက်တို့ကို တောင်းဆိုခြင်း ဖြစ်ကြောင်း အလုပ်သမားများထံမှ သိရှိရသည်။
နေစရိတ်နှင့် စားစရိတ်များက ဈေးတက်နေသဖြင့် အခြေခံလုပ်ခလစာ ကျပ်ခြောက်သောင်း ရရှိသော်လည်း နယ်ဝေးမှ လာသည့် အလုပ်သမားများအတွက် အဆင်မပြေသဖြင့် ဆန္ဒပြ တောင်းဆိုခြင်း ဖြစ်ကြောင်း ပဲခူးတိုင်းဒေသကြီး၊ ကဝမြို့နယ်မှ လာရောက် လုပ်ကိုင်သူလည်း ဖြစ်သူ ဒေါ်အိအိငြိမ်းက ဆိုသည်။
“အချိန်ပိုပါ အားလုံးပေါင်းမှ တစ်သိန်းကျော်ပဲ ရတယ်။ အိမ်ပို့ဖို့ ဘယ်လိုမှ အဆင်မပြေဘူး” ဟု ၎င်းက ရှင်းပြသည်။
လုပ်သားများ ဆန္ဒပြ တောင်းဆိုနေသည့် ကိစ္စနှင့် ပတ်သက်၍ Han Jen အထည်ချုပ်စက်ရုံ ရုံးအဖွဲ့သို့ ဆက်သွယ်မေးမြန်းရာ တယ်လီဖုန်း ဖြေဆိုသူက စက်ရုံတွင် တာဝန်ခံ ဖြေနိုင်သူများ မရှိဟု ပြန်လည် ဖြေကြားခဲ့သည်။
Han Jen အထည်ချုပ် စက်ရုံတွင် အလုပ်သမား ၈၄၈ ဦးရှိကြောင်း လုပ်သားများထံမှ သိရှိရသည်။
မြန်မာနိုင်ငံ၌ လုပ်ငန်း နယ်ပယ်စုံတွင် ပထမဆုံးအကြိမ်အဖြစ် သတ်မှတ်မည့် အနည်းဆုံး အခကြေးငွေ နှုန်းထားကို ယခုနှစ် စက်တင်ဘာလတွင် တရားဝင် သတ်မှတ်ပြဋ္ဌာန်းကာ လာမည့် ဒီဇင်ဘာလတွင် စတင် ကျင့်သုံးမည် ဖြစ်ကြောင်း အလုပ်သမား၊ အလုပ်အကိုင်နှင့် လူမှုဖူလုံရေး ဝန်ကြီးဌာနမှ ဒုတိယဝန်ကြီး ဦးထင်အောင်က ဇွန်လ ၂ ရက်နေ့က ပြည်ထောင်စုလွှတ်တော်တွင် ပြောကြားထားသည်။
from The Voice Weekly's Facebook Wall http://ift.tt/1xaFkWD
Comments
Post a Comment