မန္တလေးတိုင်းအတွင်း စားသောက်ကုန်များ ထုပ်ပိုးမှု စစ်တမ်းကောက်ကာ ပညာပေးမည်
မန္တလေး၊ ဇွန် ၅
စားသုံးရန် မသင့်သော စားသောက်ကုန် ပစ္စည်းများကို ထုပ်ပိုးမှုပုံစံ အမျိုးမျိုးဖြင့် ဈေးကွက်အတွင်း ရောင်းချလျက်ရှိရာ မန္တလေးတိုင်းဒေသကြီး အတွင်း မြို့ကြီးများရှိ ဈေးကွက်များအတွင်း ရောင်းချနေသည့် စားသောက်ကုန်များတွင် ပါဝင်သည့် ပစ္စည်းများ၊ ထုတ်လုပ်သည့် နေရာနှင့် ရက်စွဲများ ရေးသားထားခြင်း ရှိ မရှိ၊ စားသောက်ကုန်ထုပ်ပိုးမှု ဥပဒေနှင့် ညီညွှတ်ခြင်း ရှိမရှိများနှင့် ပတ်သက်၍ စစ်တမ်းကောက်ယူကာ ပညာပေးသွားမည် ဖြစ်ကြောင်း အဆိုပါ တိုင်းဒေသကြီး ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာန တိုင်းဦးစီးမှူး ဦးဆွေတင့်ကြူးက ပြောကြားသည်။
ယင်းသို့ စစ်တမ်းကောက်ယူမှုကို ဇွန်လ နောက်ဆုံးပတ်တွင် စတင် ကွင်းဆင်းမည် ဖြစ်ပြီး စားသောက်ကုန် လက်ကားအရောင်းဆိုင်များကို အဓိကထား ဆောင်ရွက်သွားမည် ဖြစ်ကာ လက်လီဆိုင်အချို့ကိုလည်း စစ်တမ်း ကောက်ယူမည် ဖြစ်ကြောင်း ၎င်းကဆိုသည်။
အဆိုပါ ကောက်ယူ၍ ရရှိလာမည့် စစ်တမ်းများအရ လုပ်ငန်းရှင်များကို ပညာပေးခြင်း ဆောင်ရွက်သွားမည် ဖြစ်ကာ စားသုံးသူ အကာအကွယ်ပေးရေး နည်းဥပဒေ ထွက်ရှိလာပါက ဥပဒေနှင့်အညီ အရေးယူသွားမည် ဖြစ်ကြောင်း ၎င်းက ထပ်မံ ပြောကြားသည်။
စားသုံးသူ အကာအကွယ်ပေးရေး ဥပဒေတွင် စီးပွားရေးလုပ်ငန်းရှင်သည် ကုန်စည် သတင်းအချက်အလက် သို့မဟုတ် တံဆိပ် အမှတ်အသားပေါ်တွင် ဖော်ပြထားချက်နှင့် မကိုက်ညီသည့် ကုန်စည်၊ အရောင်းမြှင့်တင်ရေးနှင့် ကြော်ငြာပါ ဖော်ပြချက် ကိုက်ညီမှု မရှိသော ကုန်စည်၊ အမည်၊ အရွယ်အစား၊ အသားတင် အလေးချိန်၊ ထုထည်၊ ဖွဲ့စည်းပုံ၊ ထုတ်လုပ်သည့် ရက်စွဲ၊ လိပ်စာ၊ ရောင်းချသူအမည် စသည်တို့ကို ရိုက်နှိပ်ထားရမည်ဟု ပါရှိပြီး ယင်းသို့ ဆောင်ရွက်ခြင်း မရှိသည့် လုပ်ငန်းရှင်များကို စားသုံးသူ အငြင်းပွားမှု ဖြေရှင်းရေးအဖွဲ့၏ သတိပေးခြင်း၊ ပြင်းထန်စွာ သတိပေးခြင်းနှင့် လျော်ကြေးပေးစေခြင်း စသည်တို့ကို အရေးယူနိုင်သည့်အပြင် တရားရုံး၌ တရားစွဲတင်နိုင်ပြီး ပြစ်မှုထင်ရှား စီရင်ခံရလျှင် ထောင်ဒဏ် သုံးနှစ်ထိနှင့် ကျပ်သိန်း ၅၀ ထက် မပိုသည့် ဒဏ်ငွေ သို့မဟုတ် နှစ်ရပ်လုံး ချမှတ်ခြင်း ခံရမည်ဟု ဖော်ပြပါရှိသည်။
ပြီးခဲ့သည့် ဧပြီလက ပြည်တွင်းဈေးကွက် အတွင်း၌ ထုတ်လုပ် ရောင်းချခဲ့သည့် အချိုရည်တစ်ခုတွင် အများပြည်သူ ကျန်းမာရေး ထိခိုက်စေနိုင်သဖြင့် လုပ်ငန်းရှင်ကို ဥပဒေနှင့်အညီ ထုတ်လုပ်ရန် ခေါ်ယူ ပညာပေးထားကြောင်း ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာနထံမှ သိရသည်။
“လုပ်ငန်းရှင်တွေ စားသောက်ကုန်ကို ဘယ်လို ထုတ်လုပ်ရမယ် ဆိုတာ ဥပဒေမှာ ပါပြီးသားပါ၊ ကျွန်တော်တို့ စားသောက်ကုန် စစ်ဆေးတဲ့ နေရာမှာလည်း ဥပဒေနဲ့ ညီမညီကို စစ်သွားမှာပါ၊ အဓိကကတော့ စားသုံးသူပေါ့လေ၊ ရွေးချယ် စားတတ်အောင် ပညာပေး ဟောပြောပွဲတွေ လုပ်သွားမှာပါ” ဟု စားသုံးသူ ကာကွယ်ရေးအသင်း ဥက္ကဋ္ဌ ဦးဗအုပ်ခိုင်က ဆိုသည်။
စားသောက်ကုန်များ ဝယ်ယူရာတွင် တိကျစွာ ဖော်ပြထားမှု ရှိ မရှိ စစ်ဆေးပြီးမှသာ ဝယ်ယူလေ့ရှိကြောင်း မန္တလေးတက္ကသိုလ် ပါမောက္ခတစ်ဦးက စားသောက်ကုန် ဝယ်ယူမှုနှင့် ပတ်သက်၍ ပြောကြားသည်။
စားသုံးသူ အကာအကွယ်ပေးရေး ဥပဒေကို ၂၀၁၄ ခုနှစ် မတ်လက ပြဋ္ဌာန်းထားပြီး နည်းဥပဒေကို ရေးဆွဲလျက်ရှိကြောင်း ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာနထံမှ ထပ်မံသိရသည်။
စားသုံးသူ အခွင့်အရေး ကာကွယ်ပေးသည့် လုပ်ငန်းစဉ်များတွင် စားသုံးသူအတွက် ဆောင်ရွက်ပေးသည့် လူမှုရေး အဖွဲ့အစည်းများနှင့် ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာနတို့ ပူးပေါင်း ဆောင်ရွက်သွားမည် ဖြစ်ကြောင်း အဆိုပါဌာနထံမှ သိရသည်။
ယင်းအပြင် မိမိရပ်ကွက်အတွင်း တရားမဝင် စားသောက်ကုန်များ ထုတ်လုပ်နေပါက လာရောက်တိုင်ကြားနိုင်ပြီး ယင်းသို့ တိုင်ကြားမှသာ သွားရောက် စစ်ဆေးနိုင်မည် ဖြစ်ကြောင်း ဦးဆွေတင့်ကြူးက ဆိုသည်။
“စားသောက်ကုန်တွေ စစ်ဆေးပြီး ဥပဒေနဲ့ မညီတာ တွေ့ရင် ဌာနကို အကြောင်းကြားပေးရမှာပဲ၊ အသင်းတွေမှာ တရားစွဲဆိုခွင့်မှ မရှိတာ” ဟု စားသုံးသူများ ကာကွယ်ရေးအသင်းခွဲ မန္တလေးတိုင်း တာဝန်ခံ ဦးလှစိုးက ပြောကြားသည်။
မြန်မာနိုင်ငံရှိ စားသုံးသူများ ကာကွယ်ရေး အသင်းခွဲကို ငါးမြို့နယ်တွင် ယခုလအတွင်း ဖွဲ့စည်းမည် ဖြစ်ကြောင်း စားသုံးသူများ ကာကွယ်ရေးအသင်း ဥက္ကဋ္ဌ ဦးဗအုပ်ခိုင်က ပြောကြားသည်။
from The Voice Weekly's Facebook Wall http://ift.tt/1ozcdq5
Comments
Post a Comment