သစ်တောထွက်ပစ္စည်း စိုက်ပျိုးထုတ်လုပ်သူ ၂၆ ဦး နီပေါသို့ လေ့လာရေး သွားရောက်မည်
ရန်ကုန်၊ ဇွန် ၈
သစ်တောဖုံးလွှမ်းမှု ဧရိယာ တဖြည်းဖြည်း လျော့ကျလာသည့်အပြင် အစုအဖွဲ့ပိုင်သစ်တော (CF) တည်ထောင်မှု အောင်မြင်မှု နည်းပါးနေဆဲ ဖြစ်သော မြန်မာနိုင်ငံမှ သစ်တောထွက်ပစ္စည်း စိုက်ပျိုးထုတ်လုပ်သူ ၂၆ ဦးသည် ဒေသခံ အစုအဖွဲ့ပိုင် သစ်တောများ အောင်မြင် ဖြစ်ထွန်းနေသော နီပေါနိုင်ငံသို့ ဇွန်လ ၉ ရက်မှ ၁၆ ရက်နေ့အထိ လေ့လာရေး သွားရောက်မည် ဖြစ်ကြောင်း မြန်မာ့ပတ်ဝန်းကျင် ထူထောင်ထိန်းသိမ်းရေးကွန်ရက် (MERN) အမှုဆောင်အရာရှိချုပ် ဦးအောင်သန့်ဇင်က ပြောကြားသည်။
ယင်းခရီးစဉ်တွင် မြန်မာနိုင်ငံမှ သစ်တောထွက် ပစ္စည်းများနှင့် သစ်တော အခြေခံထုတ်ကုန် ပြုလုပ်နေသော ဒေသခံများ၊ အစုအဖွဲ့ပိုင် သစ်တောစိုက်ပျိုးနေသူများ၊ သစ်တောဦးစီးဌာနမှ အရာရှိများ၊ လွှတ်တော် ကိုယ်စားလှယ်များ ပါဝင်မည် ဖြစ်ကြောင်း ၎င်းက ဆက်လက် ပြောကြားသည်။
နီပေါတွင် ရေရှည်စီမံကိန်းများ သေချာရေးဆွဲကာ အစုအဖွဲ့ပိုင် သစ်တောများကို တိုင်းအဆင့် မြို့နယ်အဆင့်၊ ကျေးရွာအဆင့် သစ်တော အသုံးပြုသူများအဖွဲ့ဟု ဖွဲ့စည်းပြီး ပူပေါင်း လုပ်ဆောင်ခြင်းအပြင် ဥပဒေ အားကောင်းခြင်းကြောင့် နီပေါတွင် CF အောင်မြင်ခြင်း ဖြစ်ကြောင်း ပတ်ဝန်းကျင် ထိန်းသိမ်းရေးများ ပြုလုပ်နေသော အဖွဲ့ဖြစ်သည့် ဗဟုသုတရပ်ဝန်းမှ သစ်တောပညာရှင် ဦးအေးမိုးနိုင်က ပြောကြားသည်။
နီပေါနှင့် မြန်မာနိုင်ငံ နှစ်နိုင်ငံအကြား သစ်တောနှင့် ဆက်စပ်သည့် နည်းပညာများ ဖလှယ်ရေး ဆွေးနွေးမည် ဖြစ်ပြီး သစ်တောကဏ္ဍ ဖွံ့ဖြိုးရေး နှစ်နိုင်ငံလုံးမှ အစုအဖွဲ့ပိုင် သစ်တောအသုံးပြုသူ အဖွဲ့များ ပူးပေါင်း ဆောင်ရွက်မည် ဖြစ်ကြောင်း MERN အမှုဆောင်အရာရှိချုပ် ဦးအောင်သန့်ဇင်က ပြောကြားသည်။
“ကိုယ့်ဒေသမှာ ငြိမ်းချမ်းလာတာနဲ့အမျှ သစ်တော တော်တော်ပြောင်နေပြီ။ ဒီမှာက သစ်ကို တန်ဖိုးထားရမှန်း မသိဘူး။ တရားဥပဒေစိုးမိုးမှု အားနည်းတယ်။ တရုတ်မှာဆိုရင် မရဘူး။ သစ်ပင်သေး သေးလေးတောင် လက်ဆော့ပြီး မချိုးရဘူး” ဟု ကချင်ပြည်နယ် ခေါင်လံဖူးမြို့နယ် လွှတ်တော်ကိုယ်စားလှယ် ဦးဒိန်ခန်ဒါဝိက ပြောကြားသည်။
ကချင်ပြည်နယ်ရှိ အစုအဖွဲ့ပိုင် သစ်တောများသည် ကျေးရွာ ထင်းစိုက်ပျိုးနိုင်သည် အထိသာ ရှိသေးသောကြောင့် ပြုန်းတီးနေသော သစ်တောများ တည်မြဲရန် အမြန်ဆုံး အစားထိုး ပြန်လည် စိုက်ပျိုးနိုင်ရန် ကြိုးစားရမည် ဖြစ်ကြောင်း နီပေါခရီးစဉ်တွင် ပါဝင်သူ ၎င်းက ဆက်လက် ပြောကြားသည်။
from The Voice Weekly's Facebook Wall http://ift.tt/1pUV9Pa
Comments
Post a Comment