ရဲတပ်ဖွဲ့နှင့် အုပ်ချုပ်ရေးမှူးတို့ ခွင့်မပြုသော်လည်း မကွေးတွင် ပုဒ်မ ၄၃၆ ပြင်ဆင်ရေး ဟောပြော
မကွေး၊ ဇွန် ၉
နိုင်ငံတကာက ပြင်ဆင်ရန် အခက်ခဲဆုံး အခြေခံဥပဒေဟု ဆိုသော၂၀၀၈ ဖွဲ့စည်းပုံ အခြေခံဥပဒေတွင် ပုဒ်မ ၄၃၆ ပြင်ဆင်ရေး ဟောပြောပွဲကို ရဲတပ်ဖွဲ့နှင့် မြို့နယ်အုပ်ချုပ်ရေးမှူးတို့က ခွင့်ပြုပေးခဲ့ခြင်း မရှိသော်လည်း အမျိုးသားဒီမိုကရေစီအဖွဲ့ချုပ် (NLD) ပါတီနှင့် ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းတို့ ဦးဆောင်ကာ မကွေးမြို့ရှိ အေးစေတီဘုရား ရင်ပြင်တွင် ဇွန်လ ၉ ရက်နေ့က ဟောပြောပွဲ ပြုလုပ်ခဲ့ကြောင်း ယင်းအဖွဲ့ဝင်များက ပြောကြားသည်။
ယင်းဟောပြောပွဲ ဖြစ်မြောက်ရေးအတွက် သက်ဆိုင်ရာ ရဲတပ်ဖွဲ့နှင့် မြို့နယ်အုပ်ချုပ်ရေးမှူးတို့ထံ ခွင့်ပြုချက် တင်ခဲ့သော်လည်း ခွင့်မပြုကြောင်း၊ စတိတ်ခုံနှင့် ဗီနိုင်းပိုစတာတို့ကို့ ဖျက်ပေးရန် မြို့နယ်အုပ်ချုပ်ရေးမှူးက ပြောဆိုခဲ့သော်လည်း အခမ်းအနားကို ဖြစ်မြောက်အောင် လုပ်ဆောင်ခဲ့ခြင်း ဖြစ်သည်ဟု အမျိုးသားဒီမိုကရေစီအဖွဲ့ချုပ် ပါတီ အတွင်းရေးမှူး ဦးနေမျိုးကျော်က ထုတ်ဖော် ပြောကြားသည်။
အေးစေတီဘုရား ဂေါပက အဖွဲ့ကလည်း အေးစေတီဘုရား ရင်ပြင်တော်နှင့် ဝတ္တကမြေအတွင်း ဘာသာရေးနှင့် သက်ဆိုင်ခြင်း မရှိသည့် ပြောဆိုပြုမှု ဆောင်ရွက်ခြင်းများကို တားမြစ်ကြောင်း ဗီနိုင်းပိုစတာဖြင့် တားမြစ်ခဲ့သည်။
“ပုဒ်မ ၄၃၆ ရဲ့ တားမြစ်ချက်တွေ၊ ဟန့်တားတာတွေ၊ ကန့်သတ်ထားတာတွေက (အခြေခံဥပဒေ ပြင်ဆင်ရေးအတွက်) ခက်ခဲအောင် ပြုလုပ်ထားတဲ့အတွက် ဒီပုဒ်မ ၄၃၆ ဟာ မဖြစ်မနေ စတင်ဖွင့်ရမယ့် သော့ခလောက်ကြီး တစ်ခုဖြစ်ပါတယ်” ဟု အမျိုးသားဒီမိုကရေစီအဖွဲ့ချုပ် ပါတီ ဗဟိုဥပဒေပြု အထောက်အကူပြု ကော်မတီဝင် ဦးအောင်သိန်းက ပြောဆိုသည်။
၈၈ မျိုးဆက် ကျောင်းသားခေါင်းဆောင် ဦးဌေးကြွယ်ကလည်း ပုဒ်မ ၄၃၆ ကို တပ်မတော်သား လွှတ်တော်ကိုယ်စားလှယ် တစ်ဦး၏ ထောက်ခံဆန္ဒမဲ မရဘဲ ပြင်၍ ရနိုင်မည် မဟုတ်ကြောင်း၊ တပ်မတော်ကသာ တိုင်းပြည်၏ အနာဂတ်ကို အဆုံးအဖြတ် ပေးနိုင်သည် ဆိုသော အသိကို စတင် ပြင်ဆင်လိုကြောင်း ၎င်းက ရှင်းပြသည်။
ဖွဲ့စည်းပုံ အခြေခံဥပဒေ ပုဒ်မ ၄၃၆ ပြင်ဆင်ရေး ဟောပြောပွဲသို့ မကွေးတိုင်း အတွင်းရှိ ချောက်၊မင်းဘူး၊ ရေနံချောင်း၊ အောင်လံ၊ ပွင့်ဖြူနှင့် စကုမြို့နယ်တို့မှ ဒေသခံများ လာရောက် နားထောင်ခဲ့ကြသည်။
ပုဒ်မ ၄၃၆ ၏ ပြဋ္ဌာန်းချက်ကို ပြည်ထောင်စုလွှတ်တော် ကိုယ်စားလှယ်အားလုံး၏ သုံးပုံနှစ်ပုံက ပြင်ဆင်ရန် သို့မဟုတ် ပြည်ထောင်စုလွှတ်တော် ကိုယ်စားလှယ်အားလုံး၏ ထက်ဝက်ကျော်က ပြင်ဆင်ရန် သဘောတူ လက်ခံပြီးနောက် ပြည်လုံးကျွတ် ဆန္ဒခံယူပွဲ အထမြောက်ပါက ဆန္ဒမဲပေးသူ ဦးရေ၏ ထက်ဝက်ကျော်၏ ဆန္ဒမဲဖြင့် ပြင်ဆင်ရန် ဆိုသော ပြဋ္ဌာန်းချက်ကို အစားထိုး ပြင်ဆင်လိုကြောင်း NLD ပါတီက ထုတ်ပြန်ထားသည်။
from The Voice Weekly's Facebook Wall http://ift.tt/1mAu5hN
Comments
Post a Comment