ဧရာဝတီတိုင်းဒေသကြီး အစိုးရ ပုသိမ်ဒေသခံ သတင်းထောက်တစ်ဦးကို ခုံဖွဲ့ စစ်ဆေး ပုသိ...

ဧရာဝတီတိုင်းဒေသကြီး အစိုးရ ပုသိမ်ဒေသခံ သတင်းထောက်တစ်ဦးကို ခုံဖွဲ့ စစ်ဆေး



ပုသိမ်၊ ဇွန် ၅



ဧရာဝတီတိုင်းဒေသကြီး အစိုးရအဖွဲ့၏ အမိန့်ဖြင့် ပုသိမ်ဒေသခံ သတင်းထောက်တစ်ဦးကို ဇွန်လ ၃ ရက်နှင့် ၄ ရက်နေ့တွင် ခုံဖွဲ့ စစ်ဆေးခဲ့ကြောင်း ပုသိမ်မြို့နယ် ပြန်ကြားရေးနှင့် ပြည်သူ့ဆက်ဆံရေး ဦးစီးဌာန ဦးစီးမှူး ဒေါ်နုနုရီက ပြောကြားသည်။



Reporter Journal ၏ ပုသိမ်မြို့ခံ သတင်းထောက် ဦးငြိမ်းသူကို ပုသိမ်မြို့ အမှတ် (၈) ရပ်ကွက် နယ်မြေအမှတ် (၁၉) ရာအိမ်မှူး ဦးမောင်ရွှေက ဂုဏ်သိက္ခာ ညိုးနွမ်းစေမှုဖြင့် တိုင်းဒေသကြီး ဝန်ကြီးချုပ်ထံ တိုင်ကြားခဲ့ခြင်းကြောင့် စစ်ဆေးခဲ့သည်ဟု ၎င်းက ပြောဆိုခဲ့သော်လည်း အရေးယူခြင်း ရှိ၊ မရှိကိုမူ ပြောဆိုခဲ့ခြင်း မရှိခဲ့ပေ။



ရပ်ကွက်အတွင်း အိမ်၊ ခြံ၊ မြေ အရောင်းအဝယ် ပြုခြင်း၊ ခြံခတ်ခြင်းတို့တွင် သက်သေအဖြစ် ပါဝင်ခဲ့သည်ကို ကိုယ်တိုင်ဆောင်ရွက်သည့် ပုံစံဖြစ်အောင် ရေးသားခဲ့သောကြောင့် ဂုဏ်သိက္ခာ ထိခိုက်၍ တိုင်ကြားခဲ့ခြင်း ဖြစ်သည်ဟု အမှတ် (၈) ရပ်ကွက်၊ နယ်မြေခွဲ (၁၉) ရာအိမ်မှူး ဦးမောင်ရွှေက ပြောကြားသည်။



မြန်မာနိုင်ငံ စာနယ်ဇင်းကောင်စီ (ယာယီ) က ထုတ်ပြန်ထားသည့် သတင်းမီဒီယာ ကျင့်ဝတ်အပိုဒ် (၁၀-၃) တွင် မီဒီယာများအနေနှင့် အများပြည်သူ အကျိုးစီးပွားနှင့် ဆက်စပ်သည့် မည်သည့် အကြောင်းအရာကိုမဆို လွတ်လပ်စွာ ဖော်ပြခွင့်နှင့် ဝေဖန်သုံးသပ်ခွင့် ရှိသည်ဟု ဖော်ပြထားသောကြောင့် အများပြည်သူပိုင် လမ်းပေါ်တွင် အိမ်ဆောက်သည့် ကိစ္စ၊ ခြံတိုင်စိုက်ပြီး ကာရံခဲ့သည့် ကိစ္စများကို ရေးသားဖော်ပြခဲ့ခြင်း ဖြစ်ကြောင်း Reporter Journal ၏ ပုသိမ်မြို့ခံ သတင်းထောက် ဦးငြိမ်းသူက ပြောဆိုသည်။



စည်ပင်သာယာရေး ကော်မတီပိုင် မြေပေါ်တွင် အိမ်အရောင်းအဝယ် ပြုခြင်း၊ ဈေးပိုင် မြေနေရာများကို အရောင်းအဝယ် လုပ်ခြင်း၊ ချောင်းနံဘေး မြေပေါ်တွင် ခြံတိုင် စိုက်ထူခြင်းများကို ရပ်ကွက်လူကြီး တစ်ဦးအနေနှင့် တာဆီးပေးရမည် ဖြစ်သော်လည်း အားပေးအားမြှောက် လုပ်ခဲ့ခြင်းများ ရှိခဲ့သည်ဟု အမှတ် (၈) ရပ်ကွက်၊ နယ်မြေခွဲ (၁၉) ဆယ်အိမ်မှူး ဦးစန်းဌေးက ပြောကြားသည်။



သတင်းမီဒီယာသမား တစ်ဦးအနေနှင့် အများပြည်သူအတွက် ရေးသား ဖော်ပြရာ၌ နစ်နာမှု ရှိပါက မြန်မာနိုင်ငံစာနယ်ဇင်းကောင်စီ (ယာယီ) ထံ တိုင်ကြားနိုင်သည့်အပြင် တရားရုံးတွင်လည်း တရားစွဲဆိုခွင့် ရှိသည်ဟု သတင်းမီဒီယာ ဥပဒေ၌ ပြဋ္ဌာန်းထားကြောင်း၊ ယခုကဲ့သို့ အာဏာပိုင် အဖွဲ့အစည်းကို တိုင်ကြားခြင်းသည် အမြင်မရှင်းစရာ ဖြစ်ကြောင်း မြန်မာနိုင်ငံစာနယ်ဇင်းကောင်စီဝင် ဦးမြင့်ကျော်က မှတ်ချက်ပြုသည်။



ဧရာဝတီတိုင်းဒေသကြီး၊ ပုသိမ်မြို့၊ ရကအ (၈) နယ်မြေ၊ ဧရာမင်းရပ်ကွက်၌ နယ်မြေခွဲ (၁၉) ရာအိမ်မှူး ဦးမောင်ရွှေ၊ ရပ်ကွက်သားတစ်ဦးနှင့် ရာမည မီးရထား သံလမ်းဘေးတွင် နေထိုင်သည့် ဦးခင်မောင်ဦးတို့က ဧရာမင်းရပ်ကွက်၊ အနောက်ဘက် ချောင်းနံဘေးနားတွင် ရှိသည့် မြေများကို သက်ဆိုင်ရာများသို့ အသိပေးခြင်း မရှိ၊ တရားဝင် စေခိုင်းခြင်းလည်း မရှိဘဲ ခြံတိုင်များ စိုက်ထူခဲ့ခြင်း၊၂၀၁၃ ခုနှစ် ဒီဇင်ဘာလ အတွင်းကလည်း ဧရာမင်းရပ်ကွက် (၃) လမ်းရှိ လမ်းမကြီးပေါ်တွင် ကျူးကျော် ဆောက်လုပ်ထားသော အိမ်နှင့် ရပ်ကွက် မီးသတ် ရေကန်တို့ကို အရောင်းအဝယ် ပြုလုပ်ရာတွင် နယ်မြေလူကြီး ဦးမောင်ရွှေအနေဖြင့် တားမြစ်ခဲ့ခြင်း မရှိသည့်အပြင် စာချုပ်တွင် လက်မှတ်ရေးထိုးပေးခဲ့ကြောင်း ၂၀၁၄ ခုနှစ်၊ မေလ ၁ ရက်နေ့ထုတ် The Reporter ဂျာနယ်တွင် ဖော်ပြထားချက်ကို ဦးမောင်ရွှေက တိုင်ကြားခဲ့ခြင်း ဖြစ်သည်။



လက်ရှိအချိန်၌ ယင်းသို့ ခုံရုံးဖွဲ့ စစ်ဆေးချက်များကို မြို့နယ်၊ ခရိုင် အုပ်ချုပ်ရေးမှူးများနှင့် တိုင်းဒေသကြီး အစိုးရအဖွဲ့သို့ ဇွန်လ ၅ ရက်နေ့က တင်ပြခဲ့ပြီ ဖြစ်ကြောင်း၊ အရေးယူမည်၊ မယူမည်ကိုမူ တိုင်းဒေသကြီး အစိုးရအဖွဲ့က လုပ်ဆောင်မည် ဖြစ်ကြောင်း စစ်ဆေးရေးအဖွဲ့ ခေါင်းဆောင်လည်း ဖြစ်သည့် ပုသိမ်မြို့နယ်၊ ပြန်ကြားရေးနှင့် ပြည်သူ့ဆက်ဆံရေး ဦးစီးဌာန မြို့နယ်ဦးစီးမှူး ဒေါ်နုနုရီက ပြောဆိုသည်။

from The Voice Weekly's Facebook Wall http://ift.tt/1upJl7j