ရုရှားအပေါ် ပိတ်ဆို့အရေးယူမှု ထပ်မံပြုလုပ်ရန် ဂျီ-၇ နိုင်ငံခေါင်းဆောင်များ စီစဉ်
ဘရပ်ဆဲလ်၊ ဇွန် ၅
ယူကရိန်းအပေါ် ရုရှား၏ လုပ်ရပ်များကြောင့် ရုရှားအပေါ် ပိတ်ဆို့အရေးယူမှုများ ထပ်မံချမှတ်ရန် စက်မှုဖွံ့ဖြိုးပြီး နိုင်ငံခုနစ်နိုင်ငံမှ ခေါင်းဆောင်များက ပြင်ဆင်လျက် ရှိကြောင်း BBC သတင်းတွင် ဖော်ပြထားသည်။
ဘယ်လ်ဂျီယံနိုင်ငံ ဘရပ်ဆဲလ်မြို့တွင် ကျင်းပလျက် ရှိသည့် စက်မှုဖွံ့ဖြိုးပြီး နိုင်ငံများ ထိပ်သီးဆွေးနွေးပွဲတွင် စက်မှုထိပ်သီးနိုင်ငံ ရုရှား ပါဝင်ခြင်း မရှိသောကြောင့် ဂျီ-၇ ထိပ်သီးဆွေးနွေးပွဲအဖြစ် ကျင်းပလျက်ရှိပြီး အဆိုပါ ဆွေးနွေးပွဲက ရုရှားအပေါ် အရေးယူပိတ်ဆို့မှု ထပ်မံပြုလုပ်ရန် ကြိုးပမ်းခဲ့ကြခြင်း ဖြစ်သည်။
ရုရှားသည် ယူကရိန်း၏ အချုပ်အခြာအာဏာကို ဆက်လက်ချိုးဖောက်မှုများ ရှိနေခြင်းကိုလည်း ဂျီ-၇ နိုင်ငံခေါင်းဆောင်များ၏ ပူးတွဲထုတ်ပြန်ချက်တွင် ပြစ်တင် ပြောဆိုခဲ့သည်။
ယခင်က စက်မှုဖွံ့ဖြိုးပြီးနိုင်ငံ ရှစ်နိုင်ငံ ထိပ်သီးဆွေးနွေးပွဲ ဂျီ-၈ ဆွေးနွေးပွဲကို ကျင်းပလေ့ ရှိသော်လည်း ယူကရိန်းနိုင်ငံ ကရိုင်းမီးယား ဒေသကို ရုရှား လက်အောက်သို့ သွတ်သွင်းခဲ့ပြီးနောက် ရုရှားကို စက်မှုထိပ်သီး နိုင်ငံများ စာရင်းမှ ထုတ်ပစ်ခဲ့ခြင်းကြောင့် စက်မှုထိပ်သီး နိုင်ငံ ခုနစ်နိုင်ငံ ဂျီ-၇ သာ ကျန်ရှိတော့ခြင်း ဖြစ်သည်။
ယခု ဘရပ်ဆဲလ်တွင် ကျင်းပသည့် စက်မှုဖွံ့ဖြိုးပြီးနိုင်ငံများ ထိပ်သီးဆွေးနွေးပွဲ ဂျီ-၇ ဆွေးနွေးပွဲတွင် ရုရှားပါဝင်ခြင်း မရှိသော်လည်း ရုရှားသမ္မတ ပူတင်သည် ပြင်သစ်နိုင်ငံ ပါရီတွင် ပြုလုပ်မည့် ဒီ-ဒေး အထိမ်းအမှတ်ပွဲကို တက်ရောက်၍ အမေရိကန်သမ္မတ အိုဘားမားမှ လွဲ၍ ခေါင်းဆောင် တစ်ဦးချင်းစီနှင့် တွေ့ဆုံ ဆွေးနွေးမည် ဖြစ်သည်။
ပြင်သစ်နိုင်ငံတွင် ကျင်းပမည့် ဒီ-ဒေး အထိမ်းအမှတ် အခမ်းအနားသို့ အမေရိကန်သမ္မတ အိုဘားမားလည်း တက်ရောက်မည် ဖြစ်သော်လည်း ရုရှားသမ္မတ ပူတင်နှင့် တွေ့ဆုံဆွေးနွေးခြင်း ရှိမရှိမှာမူ မသိရသေးပေ။
ယူကရိန်းကိစ္စနှင့် ပတ်သက်၍ အဆင့်သုံးဆင့် ချဉ်းကပ်မှုဖြင့် လုပ်ဆောင်သွားမည် ဖြစ်ကြောင်း၊ ပထမအဆင့်အနေနှင့် ယူကရိန်းကို စီးပွားရေး အကူအညီ ပေးမည်ဖြစ်ပြီး၊ ဒုတိယအဆင့်တွင် ရုရှားနှင့် တွေ့ဆုံ ဆွေးနွေးသွားမည် ဖြစ်ကြောင်း၊ ရုရှားနှင့် ဆွေးနွေးရာတွင် မအောင်မြင်ပါက ရုရှားအပေါ် ပိုမိုပြင်းထန်သော ပိတ်ဆို့အရေးယူမှုများ ပြုလုပ်ရန် စီစဉ်ထားကြောင်း ဂျာမနီအဓိပတိ အင်ဂျလာမာကယ်က ပြောကြားသည်။
ပြင်သစ်တွင် ကျင်းပမည့် ဒီ-ဒေး အခမ်းအနားတွင် ယူကရိန်းသမ္မတသစ် ပိုရိုရှန်ကိုလည်း တက်ရောက်မည် ဖြစ်ရာ၊ ရုရှားသမ္မတ ပူတင်နှင့် တွေ့ဆုံဆွေးနွေး၊ မဆွေးနွေးမှာ မသေချာသေးပေ။
ရုရှားသမ္မတ ပူတင်က ပြင်သစ် ရုပ်မြင်သံကြားနှင့် တွေ့ဆုံ ဆွေးနွေးရာတွင် ၎င်းအနေနှင့် မည်သည့် ခေါင်းဆောင်ကိုမျှ ရှောင်ဖယ်နေမည် မဟုတ်ကြောင်း၊ သို့သော် ယူကရိန်းသမ္မတသစ် အနေနှင့် ယူကရိန်း အရှေ့ပိုင်းရှိ လက်နက်ကိုင်များနှင့် တွေ့ဆုံဆွေးနွေးရန် အမှန်တကယ် လိုလားရန် လိုအပ်ကြောင်း ပြောကြားသည်။
ယူကရိန်းအရှေ့ပိုင်းတွင် အင်္ဂါနေ့က ရုရှားလိုလားသူ လက်နက်ကိုင်များက နယ်ခြားစောင့်တပ် ဌာနချုပ်နှင့် အမျိုးသားစောင့် တပ်ဌာနချုပ် နှစ်ခုကို သိမ်းပိုက်လိုက်သည်။
ထို့ပြင် ခွဲထွက်ရေး တောင်းဆိုနေသော ဒိုနက်စ်ပြည်နယ်နှင့် ကပ်လျက်ရှိသော ကရာစနီလီမန်နှင့် စလိုဗီယန်နက်စ်မြို့များတွင် တိုက်ပွဲများ ဆက်လက်ဖြစ်ပွားလျက် ရှိသည်။
from The Voice Weekly's Facebook Wall http://ift.tt/1mhZ95H
Comments
Post a Comment