တက္ကသိုလ်ဝင်တန်း အွန်လိုင်းအောင်စာရင်း ဇူလိုင်လ နောက်ပိုင်းမှသာ ထုတ်ပြန်မည်
ရန်ကုန်၊ ဇွန် ၇
ပညာရေးဝန်ကြီးဌာနက ၂၀၁၃-၂၀၁၄ တက္ကသိုလ်ဝင်တန်း အောင်စာရင်း ကြေညာချက်ကို သက်ဆိုင်ရာ စာဖြေဌာနများတွင် ဇွန်လ ၇ ရက်နေ့၌ ကြေညာမည် ဖြစ်သော်လည်း မြန်မာနိုင်ငံ စာစစ်ဦးစီးဌာန အွန်လိုင်း စာမျက်နှာတွင်မူ ဇူလိုင်လ နှောင်းပိုင်းမှ ကြေညာနိုင်မည် ဖြစ်ကြောင်း အဆိုပါဦးစီးဌာန ညွှန်ကြားရေးမှူးချုပ် ဦးမျိုးညွန့်က The Voice သို့ ပြောကြားသည်။
တက္ကသိုလ်ဝင်တန်း ဖြေဆိုသူ အားလုံး၏ စာရင်းအားလုံးကို ပြန်လည် စုစည်းရခြင်းကြောင့် အချိန်ကြန့်ကြာခြင်း ဖြစ်ကြောင်း ၎င်းထုတ်ပြန်မည့် ရက်အတိအကျကိုမူ မကြေညာနိုင်သေးကြောင်း ၎င်းက ထပ်လောင်း ပြောကြားသည်။
“ကျောင်းသား နှစ်သိန်းကျော်လောက်ကို ပြန်စုရတာဆိုတော့ တစ်လကြာမှ ထွက်ဖို့တောင် တော်တော်ကြိုးစားရမယ်” ဟု ဦးမျိုးညွန့်က ပြောဆိုသည်။
နိုင်ငံတကာတွင် စာမေးပွဲ အောင်စာရင်းများကို အွန်လိုင်းပေါ်တွင်သာ အချိန်နှင့် တစ်ပြေးညီ ထုတ်ပြန်ပေးသည့်အတွက် ကျောင်းသား၊ ကျောင်းသူများ ပိုမိုအဆင်ပြေနိုင်ကြောင်း၊ မြန်မာနိုင်ငံတွင်လည်း စာရွက်စာတမ်းများနှင့် သိမ်းဆည်းသော စနစ်များမှ နည်းပညာနှင့် သိမ်းဆည်းသော စနစ်သို့ ပြောင်းလဲသင့်ပြီ ဖြစ်ကြောင်း ပုဂ္ဂလိက ဆရာ၊ ဆရာမများအသင်း တာဝန်ခ ဒေါက်တာဘိုင်အိုက ပြောကြားသည်။
“ကျောင်းသားတွေ၊ မိဘတွေရဲ့ အချိန်နဲ့ ငွေကြေး ကုန်ကျမှုလည်း လျော့လာမယ်။ အွန်လိုင်းကသာ ကြည့်လို့ ရမယ်ဆို ကောင်းကျိုးတွေက အများကြီးပဲ” ဟု ၎င်းက ဆက်လက်ဆိုသည်။
အောင်စာရင်း ထုတ်ပြန်ချိန်တွင် အလုအယက် တိုးဝှေ့ ကြည့်ရှုရသည့် အခက်အခဲများကြောင့် အွန်လိုင်း အောင်စာရင်းကို တစ်ပြိုင်နက်တည်း ထုတ်ပြန်ပေးရန် လိုလားကြောင်း တက္ကသိုလ်ဝင်တန်း အောင်မြင်ခဲ့သူတစ်ဦးက ဆိုသည်။
တက္ကသိုလ်ဝင်တန်း အွန်လိုင်း အောင်စာရင်းကို ၂၀၁၁-၂၀၁၂ ပညာသင်နှစ်မှ စတင်ခဲ့သော်လည်း အောင်စာရင်း ထွက်ပြီး လအတန်ကြာမှသာ အွန်လိုင်း အောင်စာရင်းကို ကြေညာခဲ့သည်။ လက်ရှိအချိန်တွင် ၂၀၁၁-၂၀၁၂ ပညာသင်နှစ်နှင့် ၂၀၁၂-၂၀၁၃ ပညာသင်နှစ် အောင်စာရင်းများကို အဆိုပါ စာစစ်ဦးစီးဌာန ဝက်ဘ်ဆိုက်တွင် ဝင်ရောက် ကြည့်ရှုနိုင်သည်။
(မေမီ)
from The Voice Weekly's Facebook Wall http://ift.tt/TfY5bw
Comments
Post a Comment