နိုင်ငံတစ်ဝန်း အသက်မွေးဝမ်းကျောင်း ရက်တို သင်တန်းများ ဖွင့်မည် ရန်ကုန်၊ ဇွန် ၉...

နိုင်ငံတစ်ဝန်း အသက်မွေးဝမ်းကျောင်း ရက်တို သင်တန်းများ ဖွင့်မည်



ရန်ကုန်၊ ဇွန် ၉



တိုင်းဒေသကြီးနှင့် ပြည်နယ်အသီးသီး အလုပ်အကိုင် အခွင့်အလမ်း အမျိုးအစားအလိုက် အသက်မွေးဝမ်းကျောင်းဆိုင်ရာ ရက်တိုသင်တန်းများ (Mobile Vocational Training Unit) သင်ကြားပေးရန် အစီအစဉ် ရေးဆွဲလျက် ရှိကြောင်း စက်မှုဝန်ကြီးဌာန စက်မှုစီမံကိန်း ဦးစီးဌာန၏ လူ့စွမ်းအား အရင်းအမြစ်ဌာန လက်ထောက်ညွှန်ကြားရေးမှူး ဦးအောင်သူက The Voice သို့ ပြောကြားသည်။



ယင်းသင်တန်းများကို သက်ဆိုင်ရာ တိုင်းနှင့်ပြည်နယ် အစိုးရတို့က တောင်းဆိုလျှင် လိုက်လံ သင်ကြားပေးမည် ဖြစ်ပြီး ပထမဆုံး ရက်တိုသင်တန်းကို ပခုက္ကူမြို့နယ်တွင် ဇွန်လကုန်၌ စတင်မည် ဖြစ်ကြောင်း ၎င်းက ဆက်လက် ပြောဆိုသည်။



“အလယ်တန်းအောင်ပြီး ကျောင်းဆက်မတက်နိုင်တဲ့ ကလေးတွေကိုလည်း သင်တန်း ကောင်းကောင်းတက်ပြီး အလုပ်ရစေချင်တယ်။ ဒေသမှာ လိုအပ်နေတဲ့ သင်တန်းပေးတဲ့ အခါမှာလဲ တကယ်တတ်မြောက်ပြီး အသုံးဝင်မယ့် သင်တန်းဖြစ်ဖို့ အရေးကြီးတယ်။ တက်ရောက်တဲ့ သင်တန်းကိုလည်း ပြန်အသုံးချပြီး အလုပ်အကိုင် ရတဲ့အထိ ဖြစ်စေချင်ပါတယ်” ဟု ရန်ကုန်စီးပွားရေးတက္ကသိုလ် (လှိုင်နယ်မြေ) တွင် တက်ရောက်နေသော ဖွံ့ဖြိုးမှု လေ့လာရေး ဘာသာရပ် ကျောင်းသူ မမေသက်ဟန်က ဆိုသည်။



စက်မှုဝန်ကြီး ဌာနသည် ၁၉၇၉ ခုနှစ်က စတင်ပြီး စက်မှုသင်တန်း ၆ ကျောင်းကို ဖွင့်လှစ်သင်ကြားခဲ့ရာ ၂၀၁၂ ခုနှစ်အထိ သင်တန်းသား ၅၆၈၃ ဦးထိ မွေးထုတ်ပေးနိုင်ခဲ့ကြောင်း၊ မြန်မာ့စီးပွားရေး ဦးပိုင်လီမိတက်၊ မြန်မာ့စီးပွားရေးကော်ပိုရေးရှင်း (MEC)၊ ပုဂ္ဂလိက ကုမ္ပဏီများနှင့် ပူးတွဲ၍ အလုပ်အကိုင် ရှာဖွေပေးခြင်းတို့လည်း ဆောင်ရွက်ခဲ့ကြောင်း စက်မှုဝန်ကြီး ဌာနထံမှ သိရသည်။

from The Voice Weekly's Facebook Wall http://ift.tt/1kLFHBW