မင်းရဲကျော်စွာ ယာဉ်ရပ်နားစခန်း လှိုင်မှတစ်ဆင့် ထပ်မံ ပြောင်းရွှေ့ရမည်ကို စိုးရိမ်
ရန်ကုန်၊ ဇွန် ၁၅
လမ်းမတော်မြို့နယ်ရှိ မင်းရဲကျော်စွာ ယာဉ်ရပ်နားစခန်း (ယာယီ) ပြောင်းရွှေ့ရမည့် လှိုင်မြို့နယ် အမှတ် ၁၃ ရပ်ကွက်ရှိ မြေနေရာမှာ မြန်မာ့စီးပွားရေးဘဏ် ပိုင်ဆိုင်သည့် မြေဖြစ်ခြင်းကြောင့် ထပ်မံ ပြောင်းရွှေ့ရမည်ကို စိုးရိမ်ကြောင်း အဆိုပါ ယာဉ်ရပ်နားစခန်း အတွင်းရှိ မော်တော်ယာဉ် ဝယ်ရောင်းများထံမှ စုံစမ်းသိရှိရသည်။
လှိုင်မြို့နယ် ၁၃ ရပ်ကွက် မြေနေရာမှာ မြန်မာ့စီးပွားရေးဘဏ်ပိုင် ဖြစ်ပြီး အဆိုပါနေရာတွင် ဝန်ထမ်းအိမ်ရာ တိုက်ခန်းများ တည်ဆောက်ရန် အဆိုပြုလွှာများ ခေါ်ယူထားကြောင်း နိုင်ငံပိုင်သတင်းစာများ၏ ဖော်ပြချက်များအရ သိရသည်။
“အခုနေရာ (မင်းရဲကျော်စွာ) က စည်ပင်ပိုင်မြေ မဟုတ်လို့ ပြောင်းရပါတယ်။ ထပ်ပြောင်းမယ့် နေရာကလည်း ဘဏ်ပိုင်မြေ ဖြစ်နေပြန်တယ်။ နေရာ အတည်တကျ ထားပေးသင့်ပါတယ်” ဟု အဆိုပါ ယာဉ်ရပ်နားစခန်း အတွင်းရှိ မော်တော်ယာဉ်ဝယ်ရောင်း ဦးအေးကျော်က ပြောကြားသည်။
မင်းရဲကျော်စွာ ယာဉ်ရပ်နားစခန်းကို ဇွန်လကုန် အပြီးသတ် ပြောင်းရွှေ့ရမည်ဟု ရန်ကုန်မြို့တော် စည်ပင်သာယာရေးကော်မတီက ပြောကြားထားသော်လည်း ၎င်းတို့မှာ စခန်းသစ်တွင် အားလုံးပြီးစီးမှသာ ပြောင်းရွှေ့နိုင်မည် ဖြစ်ကြောင်း မင်းရဲကျော်စွာ ယာဉ်ရပ်နားစခန်း အတွင်းရှိ ဝယ်ရောင်းများက ပြောဆိုသည်။
“အားလုံးပြီးမှ ပြောင်းလို့ ရမှာပါ။ ကျွန်တော်တို့ကားတွေ ဗွက်နစ်နေလို့ မရပါဘူး” ဟု မော်တော်ယာဉ်ဝယ်ရောင်း ဦးအောင်ကျော်စိုးက ဆိုသည်။
အမှတ် ၁၃ ရပ်ကွက်အတွင်းရှိ ယာဉ်ရပ်နား စခန်းသစ်တွင် ယခုရက်ပိုင်းအတွင်း မိုးကြီးခြင်းကြောင့် ရေများ ဝင်ရောက်ပြီး ပြုပြင်မှုများ နှောင့်နှေးကြောင်း ရန်ကုန်မြို့တော် စည်ပင်သာယာရေး ကော်မတီထံမှ သိရသည်။
မင်းရဲကျော်စွာ ယာဉ်ရပ်နားစခန်းသည် ကျန်းမာရေး ဝန်ကြီးဌာနပိုင် မြေနေရာ ဖြစ်ပြီး ဆေးရုံ ဆောက်လုပ်မည် ဖြစ်၍ ဖယ်ရှားပေးရမည် ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီထံမှ သိရသည်။
လှိုင်မြို့နယ် ၁၃ ရပ်ကွက်ရှိ မြန်မာ့စီးပွားရေးဘဏ်ပိုင် မြေနေရာတွင် ဝန်ထမ်းအိမ်ရာ တိုက်ခန်းများ တည်ဆောက်ရန်အတွက် အကျိုးတူ ဆောင်ရွက်လိုသည့် မြန်မာနိုင်ငံသားပိုင် ကုမ္ပဏီများ ဇူလိုင်လ ၅ ရက်နေ့ နောက်ဆုံးထား လျှောက်ထားရန် နိုင်ငံပိုင်သတင်းစာများမှ တစ်ဆင့် အဆိုပြုလွှာ ခေါ်ယူထားသည်။
from The Voice Weekly's Facebook Wall http://ift.tt/1shzT8g
Comments
Post a Comment