အဝေးသင်တက္ကသိုလ် နောက်ကျကျောင်းအပ်နှံသူများကို ဇွန်လ ၂၀ ရက်နေ့အထိ ပြန်လက်ခံ
ရန်ကုန်၊ ဇွန် ၁၀
ရန်ကုန်နှင့် မန္တလေး အဝေးသင် တက္ကသိုလ်တို့တွင် သတ်မှတ်ထားသော ကျောင်းအပ်ရက် ကျော်လွန်သွားသူ ပထမနှစ် ကျောင်းသား၊ ကျောင်းသူများကို အကြောင်းပြချက် ခိုင်လုံပါက ယခုပညာသင်နှစ်အတွက် ပြန်လည် လက်ခံပေးရန် စီစဉ်ထားပြီး ဇွန်လ ၂၀ ရက်နေ့ နောက်ဆုံးထား ကျောင်းအပ်ရမည် ဖြစ်ကြောင်း ရန်ကုန် အဝေးသင် တက္ကသိုလ် ပါမောက္ခချုပ် ဒေါက်တာ လှတင့်က The Voice သို့ ပြောကြားသည်။
ကျောင်းအပ်နှံရက် ကျော်လွန်သွားသူများ စုစည်းကာ အဝေးသင် တက္ကသိုလ် ပါမောက္ခချုပ်များထံ စုစည်းတင်ပြသည့်အတွက် ၎င်းတို့ကို ပြန်လည် လက်ခံပေးခြင်း ဖြစ်ကြောင်း ၎င်းကထပ်လောင်း ပြောကြားသည်။
ရန်ကုန် အဝေးသင်တက္ကသိုလ်၊ ဒဂုံတက္ကသိုလ် ဌာနခွဲတွင် ကျောင်းအပ်ခွင့် မရသော ကျောင်းသား၊ ကျောင်းသူ တစ်ထောင်ဝန်းကျင် ရှိသော်လည်း ကျောင်းပြန်အပ်နှံခွင့် လျှောက်ထားသူ ၆၀ ဦးခန့်သာ ရှိသေးကြောင်း ဒဂုံတက္ကသိုလ် အုပ်ချုပ်ရေး တာဝန်ရှိသူက ပြောကြားသည်။
“၁၀ ရက်နေ့က စလက်ခံတယ်။ ဇွန်လ ၂၀ ရက်က နောက်ဆုံးဖြစ်တဲ့အတွက် ရက်ကျော်ပြီးမှ လာအပ်ရင် လုံးဝလက်ခံမှာ မဟုတ်ဘူး” ဟု ၎င်းက ထပ်လောင်း ပြောဆိုသည်။
မူလကျောင်းအပ်နှံ ခွင့်ပြုရက်မှာ ပြီးခဲ့သည့် မတ်လကုန်တွင် ပြီးဆုံးခဲ့ပြီ ဖြစ်သည်။
ရန်ကုန်အဝေးသင် တက္ကသိုလ် ဒဂုံတက္ကသိုလ် ဌာနခွဲတွင် ကျောင်းအပ်နှံရန် နောက်ကျသူ တစ်ထောင်ခန့် ရှိကြောင်း ဒဂုံတက္ကသိုလ် ကျောင်းသားသမဂ္ဂ ဥက္ကဋ္ဌ ကိုမင်းသုခက ပြောကြားသည်။
ရန်ကုန်နှင့်မန္တလေး အဝေးသင် တက္ကသိုလ်တို့တွင် ပထမနှစ် ကျောင်းသား၊ ကျောင်းသူ ငါးသောင်းဝန်းကျင် ရှိပြီး အဝေးသင်တက္ကသိုလ် ဌာနခွဲ ၂၅ ခု ဖွင့်လှစ်ထားသည်။
from The Voice Weekly's Facebook Wall http://ift.tt/1pja3Pb
Comments
Post a Comment