ဖားကန့်ဒေသမှ ကျောက်စိမ်းလုပ်ငန်းများ ဇွန်လ ၁၂ ရက်နေ့ အပြီးဖယ်ရှားရမည်
မြစ်ကြီးနား၊ ဇွန် ၁၁
ကချင်ပြည်နယ် ဖားကန့်ဒေသတွင် ကျောက်စိမ်းလုပ်ငန်း လုပ်ကိုင်ကြသူများနှင့် ရေမဆေး ကျောက်ရှာသူများ အားလုံး ဇွန်လ ၁၂ ရက် နောက်ဆုံးထား ဖယ်ရှားပေးရမည်ဟု ဖားကန့်ဒေသ လုံခြုံရေးနှင့် တရားဥပဒေစိုးမိုးရေး ကြီးကြပ်မှု ကော်မတီက ကြေညာချက် ထုတ်ပြန်ထားကြောင်း ဖားကန့်ဒေသခံများနှင့် ကျောက်စိမ်းလုပ်ငန်း လုပ်ကိုင်ကြသူများထံမှ စုံစမ်း သိရှိရသည်။
အဆိုပါ ထုတ်ပြန်ချက်တွင် မိုးကာလ ရောက်ပြီဖြစ်၍ ကျောက်စိမ်း ထုတ်လုပ်ခွင့်ရ လုပ်ကွက် ဧရိယာများအတွင်း တရားမဝင် ကျောက်စိမ်းတူးဖော်ခြင်း၊ ရွှေ မျှောတိုက်ခြင်း၊ ရေပန်းထိုးခြင်းများကြောင့် သဘာဝဘေးအန္တရာယ် ကျရောက်နိုင်သဖြင့် လုပ်ကွက် ဧရိယာများတွင် တရားမဝင် နေထိုင်ခြင်းနှင့် ဆောက်လုပ်ထားသော အဆောက်အအုံများကို ဇွန်လ ၁၂ ရက်နေ့တွင် နောက်ဆုံးထား ဖယ်ရှားပေးရမည် ဖြစ်ကြောင်းနှင့် လိုက်နာခြင်း မရှိပါက သတ္တုတွင်း ဝန်ကြီးဌာန ကျောက်မျက် ဥပဒေ၊ တည်ဆဲဥပဒေများအရ ထိရောက်စွာ အရေးယူမည်ဟု ဖော်ပြပါရှိကြောင်း ဖားကန့်ဒေသခံ ကျောက်စိမ်း လုပ်ငန်းရှင်တစ်ဦးက ပြောကြားသည်။
ဖားကန့်ဒေသရှိ နယ်မြေခံ တပ်ကလည်း ဖားကန့်ဒေသ တစ်ဝိုက်တွင် ၁၂ ရက် နောက်ဆုံးထား ထွက်ခွာရမည့် အကြောင်း ကြေညာဆိုင်းဘုတ်များနှင့် ကျောက်စိမ်းလုပ်ကွက် အချို့တွင် ကန့်သတ်နယ်မြေ မကျူးကျော်ရ ဟူသော ဆိုင်းဘုတ်များကို စိုက်ထူထားပြီး အချို့ လုပ်ကွက် ဧရိယာများတွင် လုံခြုံရေး တင်းကျပ်စွာ ချထားကြောင်း မှော်ဆီဇာ ကျောက်စိမ်းမှော်မှ ကျောက်စိမ်း လုပ်ငန်းရှင်တစ်ဦးက ပြောကြားသည်။
“ကြေညာဆိုင်းဘုတ်တွေ ထူပြီး နောက်တစ်နေ့မှာပဲ မှော်ဆီဇာက ကြိုင်ကြိုင် လုပ်ကွက်မှာ မျှောထိုးနေတဲ့ ရေမဆေး ၁၇ ယောက် အဖမ်းခံရတယ်။ တချို့တွေကလည်း ပြန်ကုန်ပြီး တချို့အောက်ပိုင်းက လာတဲ့သူတွေကျတော့ လမ်းစရိတ်လည်း မရှိ၊ အခက်အခဲ ရှိတော့ ဘာပဲဖြစ်ဖြစ် လာဖမ်းတဲ့အခါကျမှ အဖမ်းခံရရင်လည်း ခံရပါစေ ဆိုပြီး နေတဲ့သူတွေလည်း ရှိတယ်။ ဒီရက်ပိုင်း ညဘက်တွေမှာလည်း ကင်းလှည့်ပြီး လိုက်ဖမ်းနေတယ်” ဟု ၎င်းကဆိုသည်။
ယင်းကဲ့သို့ ရေမဆေး ကျောက်ရှာဖွေသူများ ဖယ်ရှားရန် ထုတ်ပြန်ချက်တွင် အမိန့်အမှတ်၊ ကြေညာစာအမှတ် စသည်များ မပါရှိဘဲ ဒေသတွင်း ကော်မတီတစ်ခုက ထုတ်ပြန်ထားခြင်းသာ ဖြစ်သည့်အတွက် နိုင်ငံတော်အစိုးရ၏ အစီအစဉ် ဟုတ်ခြင်း၊ မဟုတ်ခြင်းမှာ မေးခွန်းထုတ်စရာ ဖြစ်နေကြောင်း ဖားကန့် ဒေသခံများနှင့် ကျောက်စိမ်းလုပ်ငန်းရှင်များက ထောက်ပြ ပြောဆိုသည်။
အဆိုပါ ထုတ်ပြန်ချက်သာမက လက်ရှိ ဖားကန့်မြို့၏ ဒေသတွင်း အခြေအနေများကို သိရှိနိုင်ရန် ဖားကန့်မြို့နယ် အုပ်ချုပ်ရေးမှူးရုံးသို့ ဖုန်းဆက်မေးမြန်းခဲ့ရာ တစ်ဖက်မှ ဖုန်းလက်ခံဖြေကြားမည့်သူ မရှိသဖြင့် တစ်ဖန် ဖားကန့်မြို့နယ် နယ်မြေခံ ရဲစခန်းမှူးထံ ဆက်သွယ်ရာတွင်လည်း စက်ပိတ်ထားခဲ့သည်။
ဖားကန့်ဒေသတွင် ယခုကဲ့သို့ တစ်နိုင်တစ်ပိုင် ကျောက်စိမ်း လုပ်ငန်းရှင်များနှင့် ရေမဆေး ကျောက်ရှာဖွေသူများအား ဖမ်းဆီးခြင်း၊ နေရပ်ပြန်ပို့ခြင်းများကို မကြာခဏ ပြုလုပ်လေ့ ရှိသော်လည်း ယခုတစ်ကြိမ်တွင်မူ ယခင်ကထက် ပိုမိုတင်းကျပ်စွာ လုပ်ဆောင်လာနိုင်ဖွယ်ရာ ရှိပြီး ကျောက်စိမ်းလုပ်ငန်းအပေါ် မှီခိုလုပ်ကိုင်နေရသော ရွှေ့ပြောင်း လုပ်သားများအတွက်လည်း ပိုမိုခက်ခဲလာနိုင်ကြောင်း ရေမဆေး ကျောက်ရှာဖွေသူများက ပြောကြားသည်။
from The Voice Weekly's Facebook Wall http://ift.tt/1oWqLjJ
Comments
Post a Comment