ဧရာဝတီသတင်းဌာနမှ သတင်းထောက် ပိုင်နက်ကျူးလွန်မှုဖြင့် အမှုဖွင့်ခံရ
ရန်ကုန်၊ ဇွန်လ ၁
ဧရာဝတီမြစ်ဝကျွန်းပေါ် သတင်းများကို ဦးစားပေး ဖော်ပြနေသော ဧရာဝတီသတင်းဌာနမှ အကြီးတန်း သတင်းထောက် တစ်ဦးဖြစ်သော ဦးကျော်ထွန်းကို ကို လှိုင်သာယာမြို့နယ် ခြေမြန်တပ်ရင်း (၅၃၂) က ပိုင်နက်ကျူးလွန်မှု (ပုဒ်မ ၄၄၇) ဖြင့် ဇွန်လ နံနက် ၁၂ နာရီတွင် အမှုဖွင့်ထားကြောင်း ကာယကံရှင်က The Voice သို့ ပြောကြားသည်။
ခြေမြန်တပ်ရင်း အမှတ် (၅၃၂) တပ်ပိုင်မြေပေါ်တွင် အငှားချကာ လုပ်ကိုင်နေသော လယ်ယာမြေပေါ်ရှိ အိမ်ကို အကြမ်းဖက် ဖျက်ဆီးမည်ဟု ကြားရသဖြင့် မေလ ၃၁ ရက်၌ အဆိုပါ အိမ်တွင် စောင့်ဆိုင်းနေစဉ် ည ၈ နာရီခန့်တွင် ခြေမြန်တပ်ရင်း အမှတ် (၅၃၂) မှ သံတုတ်များ၊ ဓားများဖြင့် အရပ်ဝတ် လူအင်အား သုံးဆယ်ခန့် အိမ်ကို ဝိုင်းလာသဖြင့် ဓာတ်ပုံရိုက်ခြင်း ဖြစ်ကြောင်း ၎င်းကဆိုသည်။
သို့သော် ဓာတ်ပုံရိုက်ကူးသည့် အတွက်ဟု ဆိုကာ ၎င်းကိုင်ဆောင်သည့် Nikon အမျိုးအစား ကင်မရာကို လုယူကာ အိမ်အောက်သို့ ဆွဲချပြီး လူသုံးဦးခန့်က ဝိုင်းထိုးကာ လူငါးဦးက ဆိုင်ကယ်ဖြင့် ခြေမြန်တပ်ရင်း အမှတ် (၅၃၂) သို့ ခေါ်ဆောင်သွားကြောင်း၊ ၎င်း၏ အိတ်အတွင်းမှ ပစ္စည်းများကို ဓာတ်ပုံရိုက် မှတ်တမ်းတင်ပြီး လှိုင်သာယာမြို့မ ရဲစခန်းသို့ ခေါ်ဆောင်ကာ ပိုင်နက်ကျူးလွန်မှုဖြင့် တရားစွဲဆိုခြင်း ဖြစ်ကြောင်း ထပ်မံပြောကြားသည်။
အိမ်ကို ဝိုင်းရံလာသော လူအုပ်မှာ စစ်သားများဟု ယူဆဖွယ် ရှိပြီး ဆံပင်ပုံစံများမှာ စစ်သားဆံပင်ပုံ ဖြစ်ကြောင်း၊ အဆိုပါ လူအုပ်စုကို အမိန့်ပေးသူမှာ ခြေမြန်တပ်ရင်း အမှတ် (၅၃၂) မှ ဗိုလ်ကြီး သော်ဇင်အောင် ဖြစ်ပြီး ရဲစခန်းသို့ ခေါ်ဆောင်သွားကာ တပ်ထောက်ဗိုလ်ကြီး ကျော်စိုးလွင်က တရားလိုပြုလုပ်ပြီး အမှုဖွင့်ခြင်း ဖြစ်ကြောင်း ဦးကျော်ထွန်းက ပြောကြားသည်။
“အခုက အာမခံရထားတယ်။ ဒါပေမဲ့ ကျွန်တော့် ကင်မရာကြိုးလည်း ပြတ်တယ်။ အထိုးလည်း ခံရတဲ့အတွက် အမှုပြန်ဖွင့်ထားတယ်။ ခေါင်းစဉ်တော့ မတပ်ရသေးဘူး” ဟု ထပ်မံပြောကြားသည်။
ယခုဖြစ်ပွားသည့် လယ်ယာမြေမှာမှာ ၁၉၉၅ ခုနှစ်မှ စတင်ကာ ယခု ခြေမြန်တပ်ရင်း အမှတ် (၅၃၂) သို့ စပါးတင်းပေး၍ နေထိုင်ခဲ့ခြင်း ဖြစ်ပြီး မေလ ၂၈ ရက်နေ့တွင် အဆိုပါတပ်မှ အင်အား ၂၀ ခန့်ဖြင့် အိမ်သို့ဖျက်ရန် လာရောက်ခဲ့သော်လည်း ဓာတ်ပုံရိုက်မည် ဆိုသဖြင့် မဖျက်ဘဲ ပြန်သွားခဲ့ခြင်း ဖြစ်ပြီးကာ မေလ ၃၁ ရက်တွင်မှ အိမ်ကို အင်အားသုံး ဝိုင်းခဲ့ခြင်းဖြစ်ကြောင်း အခင်းဖြစ် လယ်ယာမြေပိုင်ရှင် ဦးအောင်မင်းနိုင်က ပြောကြားသည်။
ယခု အမှုမှ တပ်ထောက်ဗိုလ်ကြီး ကျော်စိုးလွင်သည် တပ်ပိုင်မြေအတွင်း ကင်းလှည့်နေစဉ် ဦးကျော်ထွန်းက ဓာတ်ပုံ ရိုက်နေသည်ကို တွေ့ရသဖြင့် ဇွန်လ နံနက် ၁၂ နာရီတွင် ပိုင်နက်ကျူးလွန်မှု (ပုဒ်မ ၄၄၇) ဖြင့် အမှုဖွင့်ခဲ့ကြောင်း လှိုင်သာယာမြို့မ ရဲစခန်းမှ တာဝန်ကျ ရဲအရာရှိတစ်ဦးက ပြောကြားသည်။
from The Voice Weekly's Facebook Wall http://ift.tt/1rAQnbb
Comments
Post a Comment