ပုတီးကုန်းမြိုတွင် ကျောင်းဝရန်တာ ပြို၍ ကျောင်းသား ၁၇ ဦး ဒဏ်ရာရ
ပြည်၊ ဇွန် ၂
ပြည်ခရိုင် ပုတီးကုန်းမြို့တွင် ၂၀၁၄-၁၅ ပညာသင်နှစ်အတွက် ပထမဆုံး ကျောင်းစဖွင့်ရက် ဖြစ်သည့် ဇွန်လ ၂ ရက် နံနက်ပိုင်းက နှစ် ၆၀ သက်တမ်းရှိ အထက်တန်း နှစ်ထပ်ကျောင်းဆောင်၏ ဝရန်တာပြို၍ ကျောင်းသား ၁၇ ဦး ဒဏ်ရာရရှိခဲ့ကြောင်း ပုတီးကုန်းမြို့မ ရဲတပ်ဖွဲ့စခန်းထံမှ စုံစမ်းသိရှိရသည်။
ကျောင်းစတင် ဖွင့်လှစ်ချိန်တွင် တက်ရောက်ရမည့် အဋ္ဌမတန်း “ဃ” စာသင်ခန်းမှာ တံခါးမဖွင့်သေး၍ အခန်းရှေ့ ဝရန်တာတွင် ကျောင်းသားများ စုရုံး စောင့်ဆိုင်းနေစဉ် ပြိုကျသွားခဲ့ခြင်း ဖြစ်ကြောင်း ပုတီးကုန်းဆေးရုံတွင် ကုသနေရသည့် ဒဏ်ရာရ ကျောင်းသားများထံမှ စုံစမ်းသိရှိရသည်။
နံနက် ၈ နာရီ ဝန်းကျင်တွင် ကျောင်းတက်ချိန် မတိုင်မီ ဝရန်တာ ပြိုကျခဲ့ရာ အဋ္ဌမတန်း ကျောင်းသား၊ ကျောင်းသူများ ထိခိုက်ဒဏ်ရရာခဲ့ပြီး ကိုးဦးမှာ အတွင်းလူနာ၊ ရှစ်ဦးမှာ ပြင်ပလူနာအဖြစ် ဆေးရုံတွင် ကုသနေရကြောင်း ပုတီးကုန်း တိုက်နယ်ဆေးရုံမှ တာဝန်ကျ ဆရာဝန်တစ်ဦးက ပြောကြားသည်။
“အတွင်းလူနာတွေက စိုးရိမ်ရတဲ့ အခြေအနေ မရှိဘူး။ အတွင်းလူနာထဲက ကျောင်းသားတစ်ယောက်က ခါးနာနေတာကြောင့် မိဘက စိတ်ပူပြီး ရန်ကုန်ဆေးရုံကြီးကို ပို့တယ်။ ပွန်းပဲ့ထိခိုက် ဒဏ်ရာတွေရယ်၊ ကြောက်လန့်တာတွေရယ်ကြောင့် ဆေးရုံ ရောက်လာကြတယ်” ဟု ၎င်းကဆိုသည်။
ပြိုကျခဲ့သည့် ကျောင်းအဆောက်အအုံကို အမှတ် (၆၆) ထောက်ပံ့ရေးနှင့် ပို့ဆောင်ရေးတပ်မှ စစ်အင်ဂျင်နီယာများ လာရောက် စစ်ဆေးသွားခဲ့ပြီး နှစ်ကာလ သက်တမ်း ၆၀ ခန့် ရှိနေပြီ ဖြစ်ပြီး သံကူကွန်ကရစ် အမျိုးအစား အဆောက်အအုံမှာ အန္တရာယ် ရှိနိုင်သည့်အနေအထားတွင် ရှိကြောင်း လာရောက်စစ်ဆေးသည့် အင်ဂျင်နီယာများက သုံးသပ်ပြောကြားခဲ့သည်။
၁၉၅၂ ခုနှစ်က စတင် ဆောက်လုပ်ခဲ့သည့် RC နှစ်ထပ်ကျောင်းဆောင်တွင် ပညာသင်ကြားရမည့် အဋ္ဌမတန်း စာသင်ခန်း သုံးခန်းနှင့် နဝမတန်း စာသင်ခန်း နှစ်ခန်းရှိ ကျောင်းသား ၂၀၀ ခန့်ကို ကျောင်းခန်းမဆောင်သို့ ပြောင်းရွှေ့၍ သင်ကြားပို့ချလျက် ရှိကြောင်း ပုတီးကုန်း အထက်တန်းကျောင်းထံမှ စုံစမ်းသိရှိရသည်။
from The Voice Weekly's Facebook Wall http://ift.tt/S0Leso
Comments
Post a Comment