ပြည်တွင်း၊ ပြည်ပအော်ပရေတာများ ပူးပေါင်းလုပ်ကိုင်ရာတွင် ၀န်ထမ်းများအသွင်ကူးပြောင်းရေး စိန်ခေါ်မှု ဖြစ်လာနိုင်
စ, ချိုကို
ပြည်တွင်းဆက်သွယ်ရေး အော်ပရေတာများသည် ပြည်ပအော်ပရေတာများနှင့် အကျိုးတူးပူးပေါင်း၍ ဆက်သွယ်ရေးလုပ်ငန်းများ ၀န်ဆောင်မှုပေးရာတွင် ၀န်ထမ်းများ ပေါင်းစည်းရေးနှင့် ပြုပြင်ပြောင်းလဲရေး ကိစ္စရပ်များသည် အဓိကစိန်ခေါ်မှုများ ဖြစ်လာနိုင်သည်ဟု အကြံပေးကုမ္ပဏီများနှင့် စီးပွားရေးပညာရှင်များက ပြောသည်။
ဆက်သွယ်ရေးဝန်ဆောင်မှု လုပ်ငန်းများတွင် နည်းပညာ၊ ရင်းနှီးမြှုပ်နှံမှုသာမက ၀န်ဆောင်မှုပေးသည့် ၀န်ထမ်းများ၏ စွမ်းဆောင်ရည်သည်လည်း အဓိကကျလာနိုင်ပြီး အစိုးရ၀န်ထမ်းများ၏ ပုဂ္ဂလိကအဖွဲ့ အစည်းအသွင်သို့ ကူးပြောင်းရေးသည် အရေးကြီးသည်ဟု အမေရိကန်အခြေစိုက် အကြံပေးကုမ္ပဏီဖြစ် သည့် Deloitte Consulting (Myanmar) ရုံးက အုပ်ချုပ်မှု ဒါရိုက်တာ ဦးချစ်ထွန်းဖေက ပြောသည်။
ဦးချစ်ထွန်းဖေက“ဆက်သွယ်ရေး ဈေးကွက်ယှဉ်ပြိုင်မှုမှာ ၀န်ဆောင်မှုပေးတဲ့ ၀န်ထမ်းတွေရဲ့ အခန်းကဏ္ဍ က အရေးကြီးပါတယ်။ ဒါကြောင့် အစိုးရဌာနကနေ Organization အသွင်ကူးပြောင်းရေးမှာ ၀န်ထမ်းတွေ ရဲ့ အသွင်ကူးပြောင်းမှု၊ လေ့ကျင့်သင်ကြားပေးမှု၊ မူဝါဒပြောင်းလဲမှုတွေ အများကြီးလုပ်လာဖို့ လိုအပ် တယ်။ ဈေးကွက်ယှဉ်ပြိုင်မှုမှာလည်း ၀န်ထမ်းတွေရဲ့ စွမ်းဆောင်ရည်ကို မူတည်ပြီး အခြားအော်ပရေတာ တွေကို အနိုင်ရရှိလာနိုင်မှာ ဖြစ်ပါတယ်”ဟုပြောသည်။
မြန်မာ့ဆက်သွယ်ရေးလုပ်ငန်းသည် ပြည်ပအော်ပရေတာတစ်ခုဖြစ်သော ဂျပန်ဆက်သွယ်ရေးကုမ္ပဏီ KDDI နှင့် ပူးပေါင်းလုပ်ကိုင်ရန် မေလကုန်တွင် သဘောတူလက်မှတ်ရေးထိုးရန် ပြင်ဆင်ထားသော်လည်း ၀န်ထမ်းများ အသွင်ကူးပြောင်းရေး၊ ၀န်ထမ်းများ ရွေးချယ်ခန့်ထားရေး စည်းကမ်းချက်များကို ပြန်လည်သုံး သပ်ကာ ညှိနှိုင်းနေရသည့်အတွက် ပူးပေါင်းမှု လက်မှတ်ရေးထိုးရေး ခေတ္တနောက်ဆုတ်ကာ ဆိုင်းငံ့ထား ရကြောင်း ဆက်သွယ်ရေးညွှန်ကြားမှု ဦးစီးဌာန ညွှန်ကြားရေးမှူး ဦးသန်းထွန်းအောင်က မဇ္ဈိမကိုပြော ကြားထားသည်။
ထို့ပြင်ရတနာပုံတယ်လီပို့ အများပိုင် ကုမ်္ပဏီကလည်း ပြည်ပအော်ပရေတာတစ်ခုနှင့် ပူးပေါင်းလုပ်ကိုင်ရန် ဆောင်ရွက်နေသည်ဟု ကုမ္ပဏီ၏ဒါရိုက်တာ ဦးရှိန်းသူအောင်က ပြောသည်။
ပြည်တွင်း၊ ပြည်ပ အော်ပရေတာပူးပေါင်းရေးတွင် ကုမ္ပဏီနှစ်ဖက်စလုံးမှ အားနည်းချက်၊ အားသာချက် များ ရှိလာနိုင်မည်ဖြစ်သည်ဟု စီးပွားရေးပညာရှင် တစ်ဦးက သုံးသပ်ပြောကြားသည်။
အဆိုပါ စီးပွားရေးပညာရှင်က“ပြည်တွင်း၊ ပြည်ပကုမ္ပဏီနှစ်ခု ပူးပေါင်းတဲ့အခါ နှစ်ဖက်စလုံးမှာ အားသာ ချက်နဲ့ အားနည်းချက်တွေ ရှိလာနိုင်တယ်။ ပြည်ပကုမ္ပဏီတွေဆီက နည်းပညာ၊ ရင်းနှီးမြှုပ်နှံမှု၊ အုပ်ချုပ်မှု ပညာတွေ ရရှိလာနိုင်မှာဖြစ်သလို ပြည်တွင်းကုမ္ပဏီက ၀န်ထမ်းတွေကလည်း ဒေသကျွမ်းကျင်မှု၊ ဒီဝန် ဆောင်မှုရဲ့ဈေးကွက်ကို ကျွမ်းကျင်မှုတွေရှိနေတယ်။ ၀န်ထမ်းတွေကို လေ့ကျင့်သင်ကြားပေးမှုတွေ ဈေး ကွက်ယှဉ်ပြိုင်နိုင်အောင် လေ့ကျင့်သင့်ကြား၊ အသွင်ကူးပြောင်းမှုတွေ လုပ်ဖို့လိုအပ်လိမ့်မယ်”ဟု ဆိုသည်။
မြန်မာ့ဆက်သွယ်ရေးလုပ်ငန်းသည် ပုဂ္ဂလိကအော်ပရေတာအဖြစ်သို့ ပြောင်းလဲမည့် လုပ်ငန်းများတွင် ၀န်ထမ်းများကို လေ့ကျင့်သင်ကြားပေးရေးအတွက် အသုံးပြုရန် ကမ္ဘာ့ဘဏ်က ရယူထားသော ချေးငွေများ မှ ဒေါ်လာနှစ်သန်းကို သုံးစွဲသွားမည်ဟုလည်း ဆက်သွယ်ရေးနှင့် သတင်းအချက်အလက် နည်းပညာ ၀န်ကြီးဌာနမှ ဒု-၀န်ကြီးဦးသောင်းတင်က ပြောကြားထားသည်။
from Mizzima - News in Burmese's Facebook Wall http://ift.tt/1mAyGRb
Comments
Post a Comment