နိုင်ငံတစ်ဝန်း တီဘီရောဂါရှာဖွေရေး စီမံချက်မြို့နယ် ခြောက်ခု ထပ်တိုးမည် ရန်ကုန်၊...

နိုင်ငံတစ်ဝန်း တီဘီရောဂါရှာဖွေရေး စီမံချက်မြို့နယ် ခြောက်ခု ထပ်တိုးမည်



ရန်ကုန်၊ ဇွန် ၆



ပြင်သစ်အခြေစိုက် The Union ကျန်းမာရေး လူမှုအဖွဲ့အစည်းက မြန်မာနိုင်ငံတွင် ရောဂါစမ်းသပ် စစ်ဆေးမှု မခံယူရသေးသော တီဘီရောဂါ ဝေဒနာရှင်များကို လိုက်လံရှာဖွေ ကုသရန် စီမံချက်မြို့နယ် ခြောက်ခုကို ယခုနှစ် ဇွန်လတွင် ထပ်မံတိုးချဲ့မည် ဖြစ်ကြောင်း အဆိုပါအဖွဲ့ ရေစကြိုမြို့နယ် တာဝန်ခံ ဦးရဲဝင့်အောင်က The Voice သို့ ပြောကြားသည်။



အဆိုပါ စီမံချက်မြို့နယ်များတွင် ၂၀၁၆ ခုနှစ်အထိ တီဘီရောဂါ စမ်းသပ်ရှာဖွေ ကုသရေး အစီအစဉ်များ ဆောင်ရွက်ရန် လျာထားကြောင်း၊ မြန်မာနိုင်ငံတွင် The Union က တီဘီရောဂါနှင့် ပတ်သက်၍ ထောက်ပံ့နေသော မြို့နယ်သည် ၂၀၁၄ ခုနှစ်တွင် ၁၃ မြို့နယ်အထိ ရှိနေပြီ ဖြစ်ကြောင်း ၎င်းက ထပ်လောင်း ပြောကြားသည်။



The Union ၏ တီဘီရောဂါ စမ်းသပ်ရှာဖွေရေး လုပ်ငန်းစဉ်အတွက် ကျန်းမာရေး ဝန်ကြီးဌာန၊ အမျိုးသား တီဘီရောဂါ တိုက်ဖျက်ရေး စီမံချက်နှင့် ပူးတွဲစီစဉ်ခြင်း ဖြစ်သည်။



“လူတော်တော်များများက ဖျားနာ၊ ချောင်းဆိုး ပြင်းထန်မှ ဆေးရုံ၊ ဆေးခန်း လာကြတာ။ ဒီလူတွေသာ တီဘီလူနာ ဖြစ်မယ်ဆိုရင် ဆေးရုံ မလာမချင်း ဘေးပတ်ဝန်းကျင်မှာ အလွယ်တကူ ကူးစက်နေမှာ” ဟု ဦးရဲဝင့်အောင်က ပြောဆိုသည်။



တီဘီရောဂါရှိသူ တစ်ဦးသည် အကာအကွယ်မပြု၊ မကုသဘဲ နေထိုင်မည် ဆိုပါက တစ်နှစ်အတွင်း လူ ၁၀ ဦးမှ ၁၅ ဦးအထိ ပြန့်ပွားစေနိုင်ကြောင်း ၎င်းက သတိပေး ပြောကြားသည်။



ထပ်မံ တိုးမြှင့်ထားသော မြို့နယ်များတွင် ရေစကြို၊ မြိုင်၊ လားရှိုး၊ တောင်ကြီး၊ မုံရွာနှင့် စစ်ကိုင်းတို့ ပါဝင်ပြီး ယခင်က မန္တလေးတိုင်းဒေသကြီး အတွင်းရှိ မြို့ခုနစ်ခုတွင်သာ စီမံချက်ချ ဆောင်ရွက်ခဲ့ကြောင်း The Union က သိရသည်။



ကျန်းမာရေး ဝန်ကြီးဌာနက ဆောင်ရွက်နေသော တီဘီရောဂါ တိုက်ဖျက်ရေး စီမံချက် မြို့နယ်များနှင့် ပတ်သက်၍ အမျိုးသားတီဘီရောဂါ တိုက်ဖျက်ရေး စီမံကိန်းသို့ မေးမြန်းခဲ့သော်လည်း အသေးစိတ် ပြန်လည် ဖြေကြားခြင်း မရှိခဲ့ချေ။



မြန်မာနိုင်ငံသည် အရှေ့တောင်အာရှဒေသတွင် တီဘီရောဂါဖြစ်ပွားနှုန်း အမြင့်ဆုံး နိုင်ငံဖြစ်ပြီး နှစ်စဉ် လူဦးရေ ၁၈၀,၀၀၀ နီးပါး အသစ်ထပ်မံ ကူးစက်လျက်ရှိကြောင်း ကမ္ဘာ့ကျန်းမာရေးအဖွဲ့ (WHO) က ထုတ်ပြန်ထားသည်။



(နေဇာကျော်)

from The Voice Weekly's Facebook Wall http://ift.tt/1k3AKPY