မြန်မာ့ဆေးဝါးစက်ရုံ ပိုလျှံမြေကိစ္စ မြေယာစီမံခန့်ခွဲမှု ကော်မတီ အဆင့်ဆင့် စစ်ဆေးမည်
မန္တလေး၊ ဇွန် ၂
မြန်မာ့စီးပွားရေး ဦးပိုင်လီမိတက်က လုပ်ကိုင်လျက်ရှိသော မန္တလေးတိုင်းဒေသကြီး ပြင်ဦးလွင်မြို့ရှိ မြန်မာ့ဆေးဝါးစက်ရုံပိုင် ပိုလျှံမြေများများနှင့် ပတ်သက်ပြီး မူလတောင်သူများနှင့် အငြင်းပွားနေသည့် ကိစ္စ ကျေးရွာ/မြို့နယ်/ခရိုင် မြေယာစီမံခန့်ခွဲမှု ကော်မတီများက ဇွန်လ ပထမပတ်အတွင်းမှ စတင်ကာ ပြန်လည်စိစစ် ပေးသွားမည် ဖြစ်ကြောင်း မြန်မာ့ဆေးဝါးစက်ရုံ (ပြင်ဦးလွင်) စက်ရုံမှူး ဦးသန်းထူးက The Voice သို့ ပြောကြားသည်။
မန္တလေးတိုင်းဒေသကြီး ဝန်ကြီးချုပ် ဦးရဲမြင့် ပြီးခဲ့သည့် မေလကုန်ခန့်တွင် ရောက်လာပြီး ယင်းမြေယာကိစ္စများကို ပြန်လည်စိစစ်ပေးရန် ညွှန်ကြားချက်အရ မြေယာစီမံခန့်ခွဲမှု ကော်မတီ အဆင့်ဆင့်က ဆောင်ရွက်ရန် စီစဉ်ရခြင်း ဖြစ်ကြောင်း ၎င်းက ဆက်လက် ပြောကြားသည်။
ယင်းဆေးဝါးစက်ရုံ ပိုလျှံမြေများနှင့် ပတ်သက်၍ မေလ ၂၃ ရက်နေ့ နံနက်က ပြင်ဦးလွင်မြို့ ညံညင်းသာကျေးရွာ၊ ကန်ကြီးကုန်းကျေးရွာ၊ စည်ကားကျေးရွာ၊ မြတ်မင်္ဂလာကျေးရွာ၊ အောင်ချမ်းသာ ကျေးရွာတို့မှ တောင်သူအင်အား ၁၀၀ ခန့်သည် ယင်းပိုလျံမြေများ ပြန်လည်ရရှိရေးအတွက် လယ်ယာမြေ ခုတ်ထွင်ရှင်းလင်းရေး လှုပ်ရှားမှုတစ်ခု ပြုလုပ်ခဲ့ကြသည်။
ယင်းပိုလျှံမြေများနှင့် ပတ်သက်၍ ပြန်လည်ပေးအပ်ရန် သို့မဟုတ် သင့်လျော်သော မြေယာလျော်ကြေး ပေးရန် ကိစ္စကို အထက်အဆင့်အဆင့်သို့ တင်ပြထားကြောင်း စက်ရုံမှူး ဦးသန်းထူးက ပြောကြားသည်။
ပြင်ဦးလွင်ရှိ တောင်သူများ ပိုင်ဆိုင်သော မြေဧက ၃၆၀ ကျော်ကို ၁၉၉၅ ခုနှစ် ဒီဇင်ဘာလ ၂၃ ရက်နေ့တွင် လယ်ယာစိုက်ပျိုးရေး ဝန်ကြီးဌာနက သိမ်းယူခဲ့ပြီး ၂၀၀၉ ခုနှစ်တွင် ကာကွယ်ရေးဝန်ကြီးဌာနက လွှဲပြောင်းရယူကာ မြန်မာ့ဆေးဝါးစက်ရုံ (ပြင်ဦးလွင်) ကို မြန်မာ့စီးပွားရေး ဦးပိုင်လီမိတက်က ဆက်လက်လုပ်ကိုင်လျက် ရှိသည်။
ယင်းစက်ရုံမှ ပိုလျှံမြေများကို လုံခြုံမှု ရှိစေရန်အတွက် ခြံစည်းရိုး ကာရံမည် ဖြစ်ကြောင်း မြန်မာ့ဆေးဝါးစက်ရုံ (ပြင်ဦးလွင်) ထံမှ သိရှိရသည်။
ယင်းမြေယာ အငြင်းပွားမှုများနှင့် ပတ်သက်ပြီး စက်ရုံ တာဝန်ရှိသူများနှင့် တောင်သူများ ညှိနှိုင်းနေဆဲ ဖြစ်ကာ ထူးခြားမှု တစ်စုံတစ်ရာ မရှိသေးဟု ယင်းတောင်သူများထံမှ သိရှိရသည်။
from The Voice Weekly's Facebook Wall http://ift.tt/1kkMyTG
Comments
Post a Comment