အာဆီယံ လွတ်လပ်စွာ ကုန်သွယ်မှုကြောင့် ပြည်တွင်းလုပ်ငန်းများ မထိခိုက်စေရန် ဥပဒေများ ရေးဆွဲ
ရန်ကုန်၊ ဇွန် ၁၃
အာဆီယံ ဒေသတွင်း နိုင်ငံများမှ လုပ်ငန်းများ ဝင်ရောက်လာချိန်တွင် ပြည်တွင်းရှိ အသေးစားနှင့် အလတ်စားလုပ်ငန်းများ (SME) ကို လွှမ်းမိုးမှု မရှိစေရန်နှင့် ယှဉ်ပြိုင်နိုင်စွမ်း ရှိစေရန် အားပေးမည့် ဥပဒေများကို ရေးဆွဲလျက်ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ အကြံပေး ဒေါက်တာမောင်အောင်က The Voice သို့ ပြောကြားသည်။
ဈေးကွက်အတွင်းသို့ အမှန်တကယ် ရှိသင့်သည့် ဈေးနှုန်းထက် လျော့နည်းသော ကုန်ပစ္စည်းများ ဝင်ရောက်လာခြင်းမှ ကာကွယ်ရန် စုပုံ ကာကွယ်ရေးဥပဒေ (Anti-Dumping Law) နှင့် ပြည်တွင်းလုပ်ငန်းများ လုံခြုံမှုဥပဒေ (Safe Guard Law) တို့ကို ရေးဆွဲလျက်ရှိကြောင်း ၎င်းကဆိုသည်။
အာဆီယံ စီးပွားရေး အသိုက်အဝန်း (AEC) ကို ၂၀၁၅ ခုနှစ် နှစ်ကုန်တွင် စတင်မည် ဖြစ်ပြီး အာဆီယံနိုင်ငံများမှ လုပ်ငန်းများ လွတ်လပ်စွာ စီးပွားရေး လုပ်ကိုင်နိုင်မည်ဖြစ်ရာ စီးပွားရေး ဖွံ့ဖြိုးမှု အားကောင်းသည့် စင်ကာပူ၊ ထိုင်း၊ မလေးရှား စသည့် နိုင်ငံတို့မှ လုပ်ငန်းများ လာရောက် လုပ်ကိုင်ကြမည် ဖြစ်သည်။
မြန်မာနိုင်ငံ၏ ထိပ်တန်းရင်းနှီးမြှုပ်နှံသူ နိုင်ငံများတွင် ထိုင်းသည် အဆင့် ၂၊ စင်ကာပူသည် အဆင့် ၄ နှင့် မလေးရှားနိုင်ငံသည် အဆင့် ၇ နေရာတို့တွင် အသီးသီး ရပ်တည်နေသည်။
“နိုင်ငံတိုင်းမှာတော့ Protection (ကာကွယ်မှု) လုပ်ကြတာပါပဲ။ အရမ်းကြီး သိသာထင်ရှားအောင် ကာကွယ်ပေးတာမျိုး မဖြစ်အောင် လိမ္မာပါးနပ်ဖို့တော့ လိုပါတယ်” ဟု ကုန်သည်/စက်မှု အသင်းချုပ် ဒုတိယဥက္ကဋ္ဌ ဒေါက်တာမောင်မောင်လေးက ပြောကြားသည်။
သို့ရာတွင် ပြည်တွင်းလုပ်ငန်းများကို အကာအကွယ် ပေးလွန်းခြင်းသည် ယှဉ်ပြိုင်နိုင်စွမ်းကို လျော့ကျစေသည့်အတွက် ရေရှည် ဖွံ့ဖြိုးတိုးတက်ရေးကို အဓိကထား လုပ်ဆောင်ရန် လိုကြောင်း ၎င်းက ထပ်လောင်း ပြောကြားသည်။
ပြည်တွင်းလုပ်ငန်းများ မထိခိုက်စေရန် ဥပဒေများနှင့် ကာကွယ်ပေးခြင်းသည် ရေတိုအတွက် အဆင်ပြေသော်လည်း အမှန်တကယ် အားကောင်းဖွံ့ဖြိုး လာစေရန် အစိုးရက အားပေးထောက်ကူရန် လိုကြောင်း ဂျာမနီ ဖွံ့ဖြိုးမှု ပူးပေါင်းဆောင်ရွက်ရေးအဖွဲ့ (GIZ) မှ အကြီးတန်း အကြံပေး ဦးစံသိန်းက ဆိုသည်။
“အစိုးရက အားပေးထောက်ကူမှုတွေ တစ်ဖက်က လုပ်သလို ပြည်တွင်းလုပ်ငန်းတွေ အနေနဲ့လည်း လုပ်ငန်းတူချင်း ပူးပေါင်းဆောင်ရွက်ဖို့ လိုပါတယ်” ဟု ၎င်းကဆိုသည်။
ပြည်တွင်းရှိ SME များ ပျောက်ကွယ်မသွားရန် ကာကွယ်ရမည် ဖြစ်ပြီး ဖွံ့ဖြိုးတိုးတက်ရန် ငွေကြေးအရင်းအနှီး၊ နည်းပညာနှင့် ဈေးကွက်ရရှိရန် နိုင်ငံတကာ အဖွဲ့အစည်းများနှင့်အတူ ထောက်ပံ့ပေးရန် လိုကြောင်း ဒေါက်တာမောင်မောင်လေးက ဆိုသည်။
မြန်မာနိုင်ငံတွင် ပြည်တွင်း SME လုပ်ငန်းပေါင်း တစ်သိန်းကျော် ရှိပြီး တစ်နိုင်ငံလုံး စီးပွားရေးလုပ်ငန်းများ၏ ၉၉ ရာခိုင်နှုန်းကျော် ရှိကြောင်း အသေးစားနှင့် အလတ်စားလုပ်ငန်းများ ဖွံ့ဖြိုးရေးဗဟိုဌာနထံမှ စုံစမ်းသိရှိရသည်။
အသေးစားနှင့် အလတ်စားလုပ်ငန်းများ၏ အဓိပ္ပာယ်ကို တိကျစွာ သတ်မှတ်နိုင်ရန် အသေးစားနှင့် အလတ်စားလုပ်ငန်းများ ဖွံ့ဖြိုးရေးဥပဒေနှင့် တန်ဖိုးမြှင့်ပို့ကုန် ဥပဒေတို့ကိုလည်း သက်ဆိုင်ရာ ဝန်ကြီးဌာနများက ရေးဆွဲလျက်ရှိသည်။
from The Voice Weekly's Facebook Wall http://ift.tt/1qK1oCU
Comments
Post a Comment