တပ်မတော်က သိမ်းယူခဲ့သော လယ်မြေများကို စွန့်လွှတ်ရန် ရွှေပြည်သာတွင် လယ်သမားများ တော...

တပ်မတော်က သိမ်းယူခဲ့သော လယ်မြေများကို စွန့်လွှတ်ရန် ရွှေပြည်သာတွင် လယ်သမားများ တောင်းဆို



ရန်ကုန်၊ ဇွန် ၈



ရန်ကုန်တိုင်းဒေသကြီး ရွှေပြည်သာမြို့နယ် လှော်ကားကျေးရွာအုပ်စုတွင် တပ်မ ၁၁ နှင့် ရဲတပ်ရင်း ၁ တို့ သိမ်းဆည်းခဲ့သည်ဟု ဆိုသော လယ်ယာမြေ ၁၁၆ ဧကကို သက်ဆိုင်ရာက စွန့်လွှတ်ရန် သိမ်းဆည်းခံ လယ်သမားများက တောင်းဆိုကြောင်း ယင်းလယ်သမားများထံမှ သိရှိရသည်။



ရွှေပြည်သာမြို့နယ်ရှိ ပြည်တော်သာ၊ တောရွာလေး၊ စမ်းချောင်းကြီး၊ စမ်းချောင်းလေး စုစုပေါင်း ရွာလေးရွာမှ တပ်မတော် သိမ်းဆည်းလယ် ၁၀၅ ဧကကျော်နှင့် ရဲတပ်ရင်းမှ ၁၀ ဧကကို ၁၉၉၃၊ ၁၉၉၄ ခုနှစ်တို့တွင် သိမ်းဆည်းခဲ့ကြောင်း လက်ရှိတွင် အုတ်ဖုတ်လုပ်ငန်း လုပ်ကိုင်ကာ အဆောက်အအုံ့ အချို့လည်း ဆောက်လုပ်ထားပြီး ယင်းလယ်များမှာ ချိုင့်ခွက်များ ဖြစ်ပေါ်နေသောကြောင့် လယ်ယာမြေ ပြန်လည်ရရှိခဲ့ပါက စိုက်ပျိုး၍ မရတော့ကြောင်း ၁၁ ဧကကျော် အသိမ်းခံရသူ ဒေါ်ခင်ခင်ထွေးက The Voice သို့ ပြောကြားသည်။



“အဒေါ်တို့ လယ်တွေပြန်ရဖို့ လုပ်နေတာ သုံးနှစ်တော့ ရှိပြီ။ သက်ဆိုင်ရာတွေကို စာတင်တာ ၁၀ ကြိမ်၊ အခုစစ်တပ်က လယ်တွေ ပြန်စွန့်လွှတ်တော့ ရန်ကုန်တိုင်းမှာ တော်တော်များများ ပြန်ရတယ်။ အဒေါ်တို့ ရွှေပြည်သာပဲ မပါတာ” ဟု ၎င်းက ရှင်းပြသည်။



၁၉၉၃-၉၄ တွင် လယ်သမားများကို တပ်မတော်က ပိုင်ဆိုင်သော မြေယာများကို ထိန်းသိမ်း စောင့်ရှောက်ပေးသည်ဟု ဆိုကာ တစ်ဧကလျှင် ၂၃,၀၀၀ ကျပ်ဖြင့် ပေးအပ်ကာ ဖယ်ရှားခိုင်းပြီး သိမ်းဆည်းခဲ့ကြောင်း လယ်သမားများအနေနှင့် အသိမ်းခံခဲ့ရသော လယ်ယာမြေများကို သက်ဆိုင်ရာက လက်ရှိကာလ ပေါက်ဈေးဖြင့် လျော်ကြေး ပေးစေလိုကြောင်း အဆိုပါ လယ်သမားများက ပြောကြားသည်။



သို့သော လယ်မြေများပေါ်တွင် ဖြတ်သန်း ဖောက်လုပ်ထားသော ကွန်ပျူတာတက္ကသိုလ် မီးရထားလမ်းနှင့် အမှတ် (၄) လမ်းမကြီး မြေနေရာကို နစ်နာကြေး တောင်းဆိုမည် မဟုတ်ဘဲ နိုင်ငံတော်ကို လှူဒါန်းမည် ဖြစ်ကြောင်း ၎င်းတို့က ဆက်လက် ပြောကြားသည်။



(ဖိုးကွန်)

from The Voice Weekly's Facebook Wall http://ift.tt/1kYZGIw