(မေလ ၉ ရက်နေ့ထုတ် The Voice နေ့စဉ်သတင်းစာ မျက်နှာဖုံးနှင့် Editorial)
လုပ်အားပြဿနာ
မြန်မာ့စီးပွားရေး ကွင်းဆင်းလေ့လာမှု စစ်တမ်းကို မကြာသေးမီက ထုတ်ပြန်ခဲ့ရာ ကျွမ်းကျင်လုပ်သား ရှားပါးခြင်းသည် ပြည်တွင်းစီးပွားရေး လုပ်ငန်းများ ရင်ဆိုင်ရသည့် အခက်အခဲကြီး ဖြစ်ကြောင်း ထောက်ပြထားသည်။
စီးပွားရေး လုပ်ငန်းတစ်ခု တည်ထောင်ရန်၊ အောင်အောင်မြင်မြင် လည်ပတ်ရန်အတွက် ငွေကြေး အရင်းအနှီး၊ တည်နေရာ အဆောက်အအုံတို့ ကဲ့သို့ပင် လူသားအရင်းအမြစ်သည် အရေးကြီးသော လိုအပ်ချက် ဖြစ်သည်။ လူကောင်းမရှိလျှင် မည်သည့် အလုပ်မျှ မလုပ်နိုင်။
တစ်ဖန် မြန်မာတို့သည် နိုင်ငံခြားလုပ်ငန်းများထက် အရင်းအနှီး နည်းပါးကာ ချေးငွေဖြင့် ရင်းနှီးရန်လည်း ဘဏ်များသည် အားမကောင်းသေးပါ။ ထို့ကြောင့် ကုန်ထုတ်လုပ်ရေး လုပ်ငန်းများထက် အရင်းအနှီး နည်းသော ဝန်ဆောင်မှု လုပ်ငန်းများသည် မြန်မာတို့ ဝင်သင့်သော လုပ်ငန်းများ ဖြစ်သည်။ ဝန်ဆောင်မှု လုပ်ငန်းများသည် လူအားသုံးရသော လုပ်ငန်းများ ဖြစ်သည့်အတွက် လူသာမရလျှင် လုပ်ငန်းချောမွေ့စွာ လည်ပတ်နိုင်ရန် မဖြစ်နိုင်ပါ။ မြန်မာအသေးစားနှင့် အလတ်စား လုပ်ငန်းများသည် ဝန်ဆောင်မှု၊ ကုန်ထုတ်လုပ်ငန်းမဟူ အရင်းအနှီး နည်းပါးသည် ဖြစ်သောကြောင့် ကျွမ်းကျင်လုပ်သားများ ရှားပါးသောကြောင့် ဈေးကြီးလာသည်နှင့် အမျှ ခေါ်ယူနိုင်စွမ်းလည်း ပိုကျဆင်းလာမည်။ ထို့ကြောင့် ကျွမ်းကျင်လုပ်သား ရှားပါးသော အခက်အခဲသည် မြန်မာများထဲတွင်မှ ဝန်ဆောင်မှု လုပ်ငန်းများ၊ အသေးစားနှင့် အလတ်စား လုပ်ငန်းများကို ပိုမိုထိခိုက်မည် ဖြစ်သည်။
ကျွမ်းကျင်လုပ်သား ရှားပါးခြင်းကြောင့် ပြည်တွင်းလုပ်ငန်းများ ရပ်တည်ရန်၊ ချဲ့ထွင်ရန် ခက်ခဲသည့် အချိန်တွင် ပြည်ပမှ ပြိုင်ဘက်များသည် မြန်မာပြည်တွင်း ဈေးကွက်ကို သွားရည်ယိုလာကာ ဝင်ရောက်လာမည် ဖြစ်သည့်အတွက် မြန်မာလုပ်ငန်းတို့သည် နှစ်ထပ်ကွမ်း၊ သုံးထပ်ကွမ်း အခက်အခဲ ရင်ဆိုင်နေရသည်။ ဈေးကွက်စီးပွားရေးတွင် အကြံ့ခိုင်ဆုံးသူသာ ရှင်သန် ကျန်ရစ်မည် ဖြစ်ရာ မြန်မာစီးပွားရေး လုပ်ငန်းများအတွက် ကျွမ်းကျင်လုပ်သား ရှားပါးမှုကို အမြန်ဖြေရှင်းရမည် ဖြစ်သည်။
မြန်မာနိုင်ငံတွင် ကျွမ်းကျင်လုပ်သား ရှားပါးရသည့် အကြောင်းရင်းမှာ ပြည်တွင်းတွင် အလုပ်အကိုင် အခွင့်အလမ်း နည်းပါးခြင်း၊ ပညာရေးစနစ် ယိုယွင်းခြင်းနှင့် ဆူလွယ်နပ်လွယ် စီးပွားရေး လုပ်ငန်းရှင်များ ကြီးပွားခြင်းတို့ကြောင့် ဖြစ်သည်။
ပညာရေးစနစ် ယိုယွင်းခြင်းကြောင့် အတတ်ပညာရှင်၊ အသိပညာရှင်များ နည်းပါးသည်။ ထိုသို့ နည်းလွန်းသော သူများသည် ပြည်တွင်းတွင် အလုပ်အကိုင် အခွင့်အလမ်း နည်းပါးသောကြောင့် ပြည်ပသို့ ထွက်ကြရာ ရှင်နည်းရာ အဂ္ဂလူထွက် ဖြစ်ပြန်သည်။ ပြည်တွင်း စီးပွားရေးကြီးများ သည်လည်း ကျွမ်းကျင်စရာမလို ဦးရာလူစနစ်ဖြင့် ပါမစ်ပုံစံ သွားကြရာ အရည်အသွေး ကောင်းရန် မလိုသဖြင့် အသိပညာရှင် အတတ်ပညာရှင်များ ခန့်ထားရန် မလိုသောကြောင့် တကယ်တတ်သူတို့ အလုပ်အကိုင် အခွင့်အလမ်း နည်းပြန်သည်။ အလုပ်အကိုင် အခွင့်အလမ်း နည်းခြင်း၊ ပညာတတ်ရန် မလိုခြင်းကြောင့် ပညာတတ်လိုစိတ် နည်းပါးကြပြန်သည်။ အလုပ်အကိုင် အခွင့်အလမ်း နည်းခြင်း၊ ပညာရေး ယိုယွင်းခြင်းနှင့် ဆူလွယ်နပ်လွယ် သမားတို့ ကြီးပွားခြင်းတို့သည် အချင်းချင်း အားပေးကာ ကျွမ်းကျင်လုပ်သား ရှားပါးခြင်းကို ပိုမိုဆိုးဝါးစေသည်။
ကျွမ်းကျင်လုပ်သား ရှားပါးမှုကို အစိုးရ၊ ပုဂ္ဂလိက ပူးပေါင်းဖြေရှင်းရမည် ဖြစ်သလို ပြည်တွင်းနေများအား အရည်အချင်း မြှင့်ပေးခြင်းနှင့် ပြည်ပမှ ကျွမ်းကျင်သူများအား ခေါ်ယူခြင်း နည်းလမ်း နှစ်ရပ်လုံးကို အလျဉ်းသင့်သလို ဆောင်ရွက်သင့်သည်။
အရည်အချင်းမြှင့် သင်တန်းများ ဖွင့်လှစ်ခြင်း၊ တက္ကသိုလ်များတွင် တက်ရောက်နေသူတို့အား စာသင်ခန်းတွင်း သင်ကြားမှုအပြင် ပြင်ပလုပ်ငန်းခွင် အတွေ့အကြုံ မဖြစ်မနေ ရယူစေခြင်းတို့ဖြင့် ကျွမ်းကျင်လုပ်သား လိုအပ်ချက်ကို တစ်စိတ်တစ်ပိုင်း ဖြေရှင်းနိုင်မည် ဖြစ်သည်။ အင်အားကြီး စီးပွားရေး လုပ်ငန်းများသည် နိုင်ငံခြားသားများအား ခေါ်ယူခြင်း၊ ပြည်ပရောက် မြန်မာတို့အား ခေါ်ယူခြင်းတို့ဖြင့် ကျွမ်းကျင်လုပ်သား လိုအပ်ချက်အား ဖြေရှင်းနိုင်ပြီး ထိုသူတို့အနားတွင် မြန်မာအရည်အချင်း ရှိများအား ဝိုင်းရံထားခြင်း ဖြင့် ပြည်ပကျွမ်းကျင်သူ၏ လုပ်အားသက်သက်သာမက သူ၏ပညာကိုပါ ရယူနိုင်အောင် စီမံထားသင့်သည်။
ကျွမ်းကျင်လုပ်သား ရှားပါးခြင်းသည် ပြည်တွင်းစီးပွားရေး လုပ်ငန်းများ၏ ရပ်တည်နိုင်စွမ်းနှင့် နိုင်ငံ့စီးပွားရေးကို ရှေ့သို့ သယ်ဆောင်နိုင်စွမ်းကို ကြီးမားစွာ ထိခိုက်စေသောကြောင့် အမြန်ဆုံး ထိရောက်စွာ ကိုင်တွယ်ရမည် ဖြစ်သည်။
အယ်ဒီတာ (၈.၅.၂၀၁၄)
from The Voice Weekly's Facebook Wall http://ift.tt/RsYC9f
Comments
Post a Comment