ထိုးစစ်များ ရပ်တန့်ရန် သမ္မတဦးသိန်းစိန်ထံ UNFC ဥက္ကဋ္ဌ စာပို့ ရန်ကုန်၊ မေ ၁ တစ်န...

ထိုးစစ်များ ရပ်တန့်ရန် သမ္မတဦးသိန်းစိန်ထံ UNFC ဥက္ကဋ္ဌ စာပို့



ရန်ကုန်၊ မေ ၁



တစ်နိုင်ငံလုံး အပစ်အခတ် ရပ်စဲရေးအတွက် အစိုးရနှင့် တိုင်းရင်းသား အဖွဲ့များ ညှိနှိုင်းနေစဉ် ကချင်ပြည်နယ်နှင့် ရှမ်းပြည်နယ် (မြောက်ပိုင်း) ဒေသတို့၌ တပ်မတော်က အင်အား အလုံးအရင်းဖြင့် ထိုးစစ်ဆင်နေမှုများ ချက်ချင်း ရပ်တန့်ပေးရန် UNFC (ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ) က နိုင်ငံတော်သမ္မတ ဦးသိန်းစိန်ထံ စာပို့ တောင်းဆိုလိုက်သည်။



ပြည်ထောင်စု ငြိမ်းချမ်းရေးဖော်ဆောင်ရေး ဗဟိုကော်မတီ (UPCC) ဥက္ကဋ္ဌထံသို့ တွေ့ဆုံ ဆွေးနွေးပွဲများနှင့် ပတ်သက်သည့် သဘောထားကို UNFC ဥက္ကဋ္ဌ ဒုတိယဗိုလ်ချုပ်ကြီး အင်ဘန်လ လက်မှတ်ရေးထိုး၍ ဧပြီလ ၃၀ ရက် နေ့စွဲဖြင့် ပေးပို့ခြင်းဖြစ်သည်။



အချက် ခြောက်ချက် ပါရှိသည့် အဆိုပါ သဘောထား ပေးပို့ချက်တွင် ကချင်လွတ်လပ်ရေးအဖွဲ့၊ ရှမ်းပြည်တိုးတက်ရေး ပါတီနှင့် ပလောင်ပြည်နယ် လွတ်မြောက်ရေးတပ်ဦး ဒေသတို့တွင် တပ်မတော်က စစ်အင်အား အလွန်အကျွံ အသုံးပြု၍ ထိုးစစ်ဆင် တိုက်ခိုက်နေမှုများကို ရပ်စဲရန် တောင်းဆိုကြောင်း၊ စစ်ဆင်ရေးများ မလျှော့ချပါက တစ်နိုင်ငံလုံး အပစ်အခတ်ရပ်စဲရေး ဆွေးနွေးမှုများကို ပြန်လည် သုံးသပ်သွားမည် ဖြစ်ကြောင်း ဖော်ပြပါရှိသည်။



သို့သော် ကချင်ပြည်နယ် မြစ်ကြီးနားအခြေစိုက် မြောက်ပိုင်းတိုင်း စစ်ဌာနချုပ် တာဝန်ရှိသူ တစ်ဦးကမူ ဌာနချုပ် နယ်မြေအတွင်း စစ်အင်အား တိုးချဲ့မှု လုံးဝမရှိဘဲ ဧပြီလဆန်းက ဖြစ်ပွားသည့် ပဋိပက္ခများမှာလည်း ဧပြီလ ၁၇ ရက်နေ့တွင် ရပ်ဆိုင်းခဲ့ပြီး ဖြစ်ကြောင်း The Voice သို့ ပြောကြားသည်။



ကချင်လွတ်လပ်ရေး တပ်မတော် KIA၊ တအာင်းအမျိုးသား လွတ်မြောက်ရေး တပ်မတော် TNLA နှင့် တပ်မတော်တို့ တိုက်ပွဲ နေ့စဉ် ဖြစ်ပွားနေကြောင်း TNLA နှင့် ကချင်လူမှုအဖွဲ့အစည်း အချို့က ထုတ်ပြန် ပြောဆိုနေသော်လည်း အစိုးရနှင့် တပ်မတော်ကမူ တိုက်ပွဲများ ဖြစ်ပွားမှု မရှိကြောင်း အခိုင်အမာ ဖြေကြားထားသည်။



UNFC က ပေးပို့သော စာတွင် တစ်နိုင်ငံလုံး အပစ်အခတ်ရပ်စဲရေး စာချုပ် ရေးဆွဲရာ၌ ဖက်ဒရယ်ပြည်ထောင်စု တည်ဆောက်ရေး အစိုးရဘက်က လက်မခံသေးကြောင်း၊ ယင်းအပြင် ၂၀၀၈ အခြေခံဥပဒေနှင့် တည်ဆဲ ဥပဒေများအောက်သို့ တိုင်းရင်းသား လက်နက်ကိုင်များကို ဆွဲသွင်းနေခြင်းကို လက်မခံကြောင်း ရေးသားထားသည်။



ဧပြီလဆန်း တိုက်ပွဲများကြောင့် ငြိမ်းချမ်းရေး ဆွေးနွေးပွဲများအပေါ် စိုးရိမ်မှုများ ထွက်ပေါ်ခဲ့သော်လည်း လက်ရှိ အနေအထားကို မပျက်ယွင်းစေလိုကြောင်း တိုင်းရင်းသားများ ကိုယ်စားပြု အပစ်ရပ်ညှိနှိုင်းရေးအဖွဲ့ NCCT ခေါင်းဆောင် ဦးနိုင်ဟံသာက ပြောဆိုထားပြီး မေလ ၁၉ ရက်နေ့တွင် ရန်ကုန်မြို့၌ အစိုးရနှင့် ထပ်မံတွေ့ဆုံရန် သဘောတူထားသည်။



တိုင်းရင်းသား လက်နက်ကိုင် ၁၁ ဖွဲ့ ပါဝင် ဖွဲ့စည်းထားသော UNFC ၏ ဥက္ကဋ္ဌ ဒုတိယဗိုလ်ချုပ်ကြီး အင်ဘန်လသည် အစိုးရနှင့် အပစ်အခတ် ရပ်စဲရေး လက်မှတ် မထိုးနိုင်သေးသော ကေအိုင်အေ အဖွဲ့၏ စစ်ဦးစီးချုပ် ဖြစ်သည်။

from The Voice Weekly's Facebook Wall http://ift.tt/1hiZfbs