အခြေခံဥပဒေ ပြင်ဆင်ရေး NLD နှင့် ၈၈ မျိုးဆက်များ ပူးပေါင်းကော်မတီ ဖွဲ့စည်း
ရန်ကုန်၊ မေ ၄
၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးအတွက် မေလ တတိယပတ် အတွင်း လူထုဟောပြောပွဲများ ပြုလုပ်ရန်အတွက် အမျိုးသားဒီမိုကရေစီ အဖွဲ့ချုပ် ပါတီ (NLD) နှင့် ၈၈ မျိုးဆက်ကျောင်းသားများ ပူးပေါင်း ကော်မတီတစ်ရပ် ဖွဲ့စည်းလိုက်ကြောင်း ၈၈ မျိုးဆက်ကျောင်းသား ဦးဂျင်မီက ပြောကြားသည်။
အခြေခံဥပဒေပြင်ဆင်ရေး ပူးပေါင်းကော်မတီကို မေလ ၄ ရက်နေ့တွင် ဗဟန်းမြို့နယ် NLD ပါတီ ရုံးချုပ်တွင် NLD ပါတီ ဗဟိုကော်မတီဝင်များနှင့် ၈၈ မျိုးဆက်ကျောင်းသားများ ညှိနှိုင်း အစည်းအဝေးတွင် ဖွဲ့စည်းခြင်း ဖြစ်ကြောင်း ၎င်းကဆိုသည်။
“ရန်ကုန်နဲ့ မန္တလေးမှာ လုပ်မယ့် လူထုတွေ့ဆုံပွဲတွေ အတွက် ပူးပေါင်းကော်မတီကို ဖွဲ့စည်းတာပါ” ဟု ၎င်းကဆိုသည်။
အဆိုပါ ပူးပေါင်းကော်မတီတွင် NLD ပါတီ ဗဟိုကော်မတီဝင် ငါးဦးနှင့် ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ငါးဦး ပါဝင်ကြောင်း NLD ပါတီမှ သိရသည်။
“ကျွန်တော်တို့ နှစ်ဖက်သဘော တူညီထားပါတယ်။ ဒါပေမဲ့ ဘယ်သူတွေ ပါဝင်တယ် ဆိုတဲ့ စာရင်းကို မထုတ်ပြန်သေးပါဘူး” ဟု NLD ပါတီ ဗဟိုကော်မတီဝင် ဦးဖြိုးဇေယျာသော်က ပြောကြားသည်။
NLD ပါတီဥက္ကဋ္ဌ ဒေါ်အောင်ဆန်းစုကြည်နှင့် ၈၈ မျိုးဆက် ကျောင်းသားခေါင်းဆောင်များ ပူးပေါင်းပြီး ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး လူထု ဟောပြောပွဲများကို မေလ ၁၇ ရက်နေ့တွင် ရန်ကုန်မြို့နှင့် ၁၈ ရက်နေ့တွင် မန္တလေးမြို့တို့၌ ပြုလုပ်မည် ဖြစ်ကြောင်း NLD ပါတီမှ ထုတ်ပြန်ထားသည်။
ဖွဲ့စည်းပုံအခြေခံဥပဒေ ပြင်ဆင်ခြင်း ကန့်သတ်ချက် အခန်း ၁၂ ပါ ပုဒ်မ ၄၃၆ ကို ပြင်ဆင်ရန် အမျိုးသားဒီမိုကရေစီအဖွဲ့ချုပ် NLD ပါတီနှင့် ၈၈ ငြိမ်းချမ်းရေးနှင့် ပွင့်လင်း လူ့အဖွဲ့အစည်းက ဖေဖော်ဝါရီ တတိယပတ်အတွင်း ပူးတွဲကြေညာချက် တစ်စောင် ထုတ်ပြန်ထားသည်။
တပ်မတော်နှင့် အတိုက်အခံပါတီ အချို့ကြား သဘောထား ကွဲလွဲမှုအချို့ ရှိနေသည့် ဖွဲ့စည်းပုံအခြေခံဥပဒေ ပြင်ဆင်ရေး လုပ်ငန်းစဉ်များကို ငြိမ်းချမ်းစွာ ဆောင်ရွက်မည် ဖြစ်ကြောင်း အမျိုးသားဒီမိုကရေစီအဖွဲ့ချုပ် (NLD) ပါတီနှင့် ၈၈ မျိုးဆက် ငြိမ်းချမ်းရေး ပွင့်လင်းလူ့အဖွဲ့အစည်းတို့ ဖေဖော်ဝါရီလ ၁၀ ရက်နေ့တွင် ပူးတွဲကြေညာချက် တစ်ရပ် ထုတ်ပြန်ထားသည်။
အခြေခံဥပဒေပြင်ဆင်ရေး ကော်မတီကို ပြည်ထောင်စုလွှတ်တော်က ဇန်နဝါရီလ ပထမအပတ်အတွင်း အဖွဲ့ဝင် ၃၁ ဦးဖြင့် ဖွဲ့စည်းခဲ့ပြီး ၂၀၁၅ ရွေးကောက်ပွဲ မတိုင်မီ ၆ လ အလိုတွင် အခြေခံဥပဒေ ပြင်ဆင်ရန် ပြည်ထောင်စုလွှတ်တော် နာယက သူရဦးရွှေမန်းက တိုက်တွန်း ပြောဆိုထားသည်။
from The Voice Weekly's Facebook Wall http://ift.tt/1rTwwyO
Comments
Post a Comment