မြန်မာနိုင်ငံ ဓမ္မတက္ကသိုလ် (MIT) စာကြည့်တိုက် မြှင့်တင်ရေး အမေရိကန်အစိုးရ ကူညီမည်
ရန်ကုန်၊ မေ ၂၄
ရန်ကုန်မြို့ရှိ ခရစ်ယာန်ဘာသာရေး သင်တန်းကျောင်း ဖြစ်သော မြန်မာနိုင်ငံ ဓမ္မတက္ကသိုလ် (MIT) အတွက် မြန်မာနိုင်ငံရှိ အမေရိကန်သံရုံးက စာကြည့်တိုက် မြှင့်တင်ရေးလုပ်ငန်းများ ဆောင်ရွက်ရန် မေလ ၂၃ ရက်နေ့တွင် နားလည်မှု စာချွန်လွှာ ရေးထိုးခဲ့ကြောင်း အဆိုပါ တက္ကသိုလ် အသိုင်းအဝိုင်းက သိရသည်။
အဆိုပါ အစီအစဉ်အတွက် MIT ကျောင်းအုပ်ကြီးနှင့် အမေရိကန်သံရုံး တာဝန်ရှိသူတို့က သဘောတူလက်မှတ် ရေးထိုးခဲ့ပြီး ကနဦးအနေနှင့် ဘာသာရပ်ဆိုင်ရာ စာအုပ်ပေါင်း ၆၀၀ နီးပါးကို MIT ကျောင်းအတွက် ထောက်ပံ့ခဲ့ကြောင်း အမေရိကန်သံရုံးမှ တာဝန်ရှိသူတစ်ဦးက ပြောကြားသည်။
နားလည်မှု စာချွန်လွှာ ရေးထိုးသည့်အတွက် နှစ်ဦးနှစ်ဖက် ရေရှည် လက်တွဲသွားရန် အလားအလာ ပိုကောင်းကြောင်းကို အမေရိကန်သံရုံးမှ ပြည်သူ့ရေးရာဌာန အရာရှိ Mr.Satrajit Sarder က ပြောဆိုသည်။
အမေရိကန်အစိုးရနှင့် MIT တက္ကသိုလ်တို့ကြား သဘောတူညီမှုတွင် စာအုပ်စာတမ်းများ ထောက်ပံ့ခြင်းနှင့် အင်တာနက် ဆက်သွယ်ရေးတို့အတွက် ကူညီပံ့ပိုးရေးတို့ ပါဝင်ကြောင်း အမေရိကန်သံရုံးက သိရသည်။
၂၀၁၃ ခုနှစ်က အမေရိကန်တက္ကသိုလ် ကိုးခု၏ မြန်မာ့ပညာရေး လေ့လာရေး ခရီးစဉ်တွင် MIT နှင့် ဆက်လက် ပူးပေါင်းဆောင်ရွက်ရန် သဘောတူညီမှုများ ရှိထားခဲ့သည်။
မြန်မာနိုင်ငံ ဓမ္မတက္ကသိုလ် (MIT) ကို ၁၉၂၇ ခုနှစ်တွင် စတင် တည်ထောင်ခဲ့ပြီး ၂၀၀၀ ပြည့်နှစ်ကတည်းက ဘာသာရေး၊ ဖွံ့ဖြိုးရေးတို့အတွက် ဘွဲ့ကြိုတန်းများ ဖွင့်လှစ် သင်ကြားပေးလျက် ရှိသည်။
(ရဲမင်းအောင်၊ အောင်သီဟ)
from The Voice Weekly's Facebook Wall http://ift.tt/1ouvkCI
Comments
Post a Comment