#emg_editorials
၂၀၁၄ မေလ ၁၀ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
အလှည့်ကျ ဥက္ကဋ္ဌတာဝန်နှင့် အာဆီယံထိပ်သီး အစည်းအဝေး
အာဆီယံအဖွဲ့ဝင်နိုင်ငံ ဖြစ်ပြီးနောက် ၁၇ နှစ်တာ ကာလအတွင်း အာဆီယံအလှည့်ကျ ဥက္ကဋ္ဌတာဝန်ကို ရရှိခဲ့သည့် မြန်မာနိုင်ငံအနေဖြင့် အာဆီယံထိပ်သီး အစည်းအဝေးကို နေပြည်တော်၌ ယနေ့စတင် ကျင်းပမည်ဖြစ်သည်။
ပြီးခဲ့သည့် ၂၀၀၆ ခုနှစ်က အာဆီယံအလှည့်ကျ ဥက္ကဋ္ဌတာဝန်ကို ရယူရန် အခွင့်အရေး ပေါ်ပေါက်ခဲ့သော်လည်း ထိုအချိန်က မြန်မာအစိုးရ၏ လူ့အခွင့်အရေး ချိုးဖောက်မှုများ အပါအ၀င် အမေရိကန်နှင့် ဥရောပသမဂ္ဂ အဖွဲ့ဝင်နိုင်ငံများက ကန့်ကွက်ခဲ့ကြသဖြင့် အလှည့်ကျဥက္ကဋ္ဌ တာဝန်ကို လက်လွှတ်ခဲ့ရခြင်းဖြစ်သည်။ သမ္မတ ဦးသိန်းစိန် အစိုးရအဖွဲ့ တာဝန်ယူခဲ့ပြီးချိန်တွင် မြန်မာနိုင်ငံက အာဆီယံအလှည့်ကျ ဥက္ကဋ္ဌတာဝန်ရယူရန် ကြိုးပမ်းခဲ့ပြီးနောက် ယခုကဲ့သို့ အခွင့်အရေး ရရှိခဲ့ခြင်းဖြစ်သည်။
အာဆီယံအလှည့်ကျ ဥက္ကဋ္ဌတာဝန် ထမ်းဆောင်ချိန်၌ မြန်မာနိုင်ငံက ကိုင်တွယ်ဆောင်ရွက်ရမည့် ကိစ္စရပ်များမှာ ၁။ အာဆီယံအသိုက်အမြုံ တည်ဆောက်ရေးကို သတ်မှတ်ရည်မှန်းချက် ပြည့်မီအောင် ဆောင်ရွက်ရေး ၂။ အာဆီယံအဖွဲ့ဝင် နိုင်ငံများအကြား တစ်ကြိမ်မျှ ပြန်လည်သုံးသပ်ရခြင်း မရှိသေးသော ASPC (ASEAN Political-Security Community) ကို သုံးသပ်ခြင်း ၃။ ရာခိုင်နှုန်း ၈၀ ခန့် ပြီးစီးနေပြီဖြစ်သော အာဆီယံစီးပွားရေး အသိုက်အမြုံ မျှော်မှန်းချက်မှ ကျန်ရှိနေသည်များကို ဆက်လက် အကောင်အထည်ဖော်ရေး၊ ASCC (ASEAN Socio-Cultural Community) သုံးသပ်ချက်များကို ဆွေးနွေးခြင်း ၄။ ပုဂ္ဂလိကပိုင်း ပူးပေါင်းဆောင်ရွက်ရေးအတွက် ရေးဆွဲထားသော မူဘောင်များမှ အာဆီယံနိုင်ငံများအကြား ချိတ်ဆက်စေမှုကို မည်သို့အကူအညီ ပေးနိုင်မည် ဆိုသည်ကို ဆွေးနွေးခြင်း ၅။ အာဆီယံအဖွဲ့ဝင်နိုင်ငံ ဖြစ်ရေးအတွက် အရှေ့တီမောနိုင်ငံ၏ လျှောက်ထားမှုကို သုံးသပ်ဆောင်ရွက်ရေး ၆။ အာဆီယံနိုင်ငံများအကြား နိုးကြားမှုရှိစေရန် ဆက်သွယ်မှု အစီအစဉ်များ ဆောင်ရွက်ရေး ၇။ အမေရိကန်၊ တရုတ်အပါအ၀င် အာဆီယံမိတ်ဖက် နိုင်ငံများအကြား မျှခြေကို ထိန်းညှိဆောင်ရွက်ပေးခြင်း ၈။ တောင်တရုတ်ပင်လယ်၊ ကိုရီးယားကျွန်းဆွယ်အရေး၊ အရှေ့အလယ်ပိုင်း ကိစ္စရပ်များ ၉။ နိုင်ငံတွင်း ကိစ္စရပ်ဖြစ်သော ရခိုင်အရေး ကိစ္စရပ်များကို ဆောင်ရွက်ခြင်းတို့ ဖြစ်သည်။
အာဆီယံ အသိုက်အ၀န်း ထူထောင်ရေးကို အထောက်အပံ့ ဖြစ်စေရန်အတွက် ရည်ရွယ်ပြီး ၁။ ရာသီဥတု ပြောင်းလဲခြင်း ၂။ သဘာဝဘေးအန္တရာယ် စီမံခန့်ခွဲခြင်း ၃။ သမားရိုးကျမဟုတ်သော လုံခြုံရေးဆိုင်ရာ ကိစ္စရပ်များ ၄။ နိုင်ငံဖြတ်ကျော် ကိစ္စရပ်များ၊ ၅။ စားနပ်ရိက္ခာနှင့် စွမ်းအင်ဖူလုံရေး၊ အသေးစားနှင့် အလတ်စား စီးပွားရေး လုပ်ငန်းများ ဖွံ့ဖြိုးတိုးတက်ရေးနှင့် ပေါင်းစပ်ဆက်သွယ်ရေး ၆။ လူ့အခွင့်အရေးဆိုင်ရာ ကိစ္စရပ်များကို အာဆီယံ အလှည့်ကျဥက္ကဋ္ဌ တာဝန်ထမ်းဆောင်ချိန်၌ မြန်မာနိုင်ငံက လုပ်ဆောင်သွားမည်ဟု သမ္မတဦးသိန်းစိန်က ပြောကြားထားသည်။
ယခုတစ်ကြိမ် အစည်းအဝေးသည် ဗီယက်နမ်နှင့် တရုတ်အကြား တင်းမာမှုများ ဖြစ်ပေါ်နေသည့် တောင်တရုတ် ပင်လယ်အရေး အဓိကထား ဆွေးနွေးရန်ရှိနေကြောင်း သိရသည်။ ဗီယက်နမ်၊ ဖိလစ်ပိုင် အပါအ၀င် အာဆီယံ ဒေသတွင်းရှိ လေးနိုင်ငံနှင့် တရုတ်နိုင်ငံတို့အကြား နယ်မြေအငြင်းပွားမှု ဖြစ်ပေါ်နေခြင်းအား မည်သို့ကိုင်တွယ် ဖြေရှင်းမည်မှာ စိတ်ဝင်စားစရာ ဖြစ်နေသည်။ ထို့ပြင် အာဆီယံဥက္ကဋ္ဌ တာဝန်ယူချိန်တွင် ဒေသတွင်း နိုင်ငံများထက် အဘက်ဘက်က နိမ့်ကျနေသည့် အခြေအနေမှ ကမ္ဘာ့အလယ်တွင် သိက္ခာရှိသော နိုင်ငံတစ်နိုင်ငံအဖြစ် ရပ်တည်နိုင်ရန် လုပ်ဆောင်သင့်ပါကြောင်း The Daily Eleven သတင်းစာက တိုက်တွန်းအပ်ပါသည်။
from Eleven Media Group's Facebook Wall http://ift.tt/RxF9UM
Comments
Post a Comment