#emg_editorials
၂၀၁၄ မေလ ၁၃ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
ပြည်ပနိုင်ငံများရောက် ရွှေ့ပြောင်းလုပ်သားများအရေး
အာဆီယံအလှည့်ကျဥက္ကဋ္ဌ မြန်မာနိုင်ငံမှ ရွှေ့ပြောင်းလုပ်သားများသည် အိမ်နီးချင်း အာဆီယံဒေသတွင်း နိုင်ငံများနှင့် ကမ္ဘာ့နိုင်ငံ အချို့တွင် ရောက်ရှိအလုပ်လုပ်ကိုင် နေကြရသည်မှာ နှစ်ပေါင်းများစွာ ကြာမြင့်နေပြီဖြစ်သည်။ ရွှေ့ပြောင်းလုပ်သားများ အရေးနှင့်ပတ်သက်၍ ဖြစ်ပျက်ခဲ့သော အဖြစ်အပျက်များ ဖြေရှင်းခဲ့ရသော ပြဿနာများလည်း များစွာရှိခဲ့ပြီးဖြစ်သည်။ သို့သော် နိုင်ငံပြင်ပရောက် ရွှေ့ပြောင်းလုပ်သားများ အရေးသည် မည်သည့်အခါတွင်မှ ရိုးအီမသွားနိုင်သော ဇာတ်လမ်းများပမာ ဖြေရှင်းရခက်သည့် ပဟေဠိပုစ္ဆာများအဖြစ် ရှိနေဆဲဖြစ်သည်။
အဓိကအားဖြင့် Dirty၊ Difficult၊ Dangerous ဟု ဆိုသည့် 3D အလုပ်များကိုသာ လုပ်ကိုင်ရသည့် မြန်မာရွှေ့ပြောင်း လုပ်သားများအတွက် လုပ်သားအခွင့်အရေး ဆုံးရှုံးမှုများစွာ ရှိနေသည်။ သက်ဆိုင်ရာအစိုးရ အသီးသီးနှင့် ညှိနှိုင်းလုပ်ဆောင် နေသည်ဟု ဆိုသော်လည်း ဖြစ်ပွားသည့် ပြဿနာနှင့် ဖြေရှင်းနိုင်မှုစွမ်းအား မျှတခြင်း မရှိသေးပါ။
ပြီးခဲ့သည့်ရက်များက မြန်မာနိုင်ငံမှ တာဝန်ရှိသူများက ဒေသတွင်းနိုင်ငံအချို့မှ တာဝန်ရှိသူများနှင့် မြန်မာအလုပ်သမားများအရေး ဆွေးနွေးခဲ့သည်ဟု သိရသည်။ ထိုသို့ ဆွေးနွေးမှုများအရ မြန်မာရွှေ့ပြောင်း အလုပ်သမားအများဆုံး ရောက်ရှိနေသည့် ထိုင်းနှင့် မလေးရှားနိုင်ငံတို့မှ တာဝန်ရှိသူများက အနည်းဆုံး လုပ်ခလစာ သတ်မှတ်ရေး အပါအ၀င် ၎င်းတို့နိုင်ငံသားများနည်းတူ အလုပ်သမား အခွင့်အရေး တန်းတူပေးမည်ဟု ကတိပေးပြောကြားကြကြောင်း သိရသည်။ ကြိုဆိုရမည်ဖြစ်သလို လက်တွေ့တွင် အောက်ခြေအထိ သက်ရောက်ရန်လည်း စောင့်ကြည့်တွန်းအားပေးရမည့် ကိစ္စရပ်ပင်ဖြစ်သည်။
ဆင်းရဲ၍ အလုပ်အကိုင်ရှားပါးမှုက နိုင်ငံတွင်း လုပ်သားများစွာကို ပြည်ပနိုင်ငံများသို့ ရေကြည်ရာ မြက်နုရာ ရှာဖွေကြသူများအဖြစ် ရောက်ရှိသွားစေခဲ့ပြီး ဖြစ်သည်။ ပြုပြင်ပြောင်းလဲရေး လမ်းကြောင်းပေါ်မှ ယခင်ထက်ကောင်းမွန်သော ၀န်းကျင်ကောင်းများ ဖန်တီးနိုင်ရန် အာမခံချက်များရှိရန် လုပ်ဆောင်နေသည်ဟု ဆိုသော်လည်း ပြည်ပနိုင်ငံများရောက် မြန်မာရွှေ့ပြောင်း လုပ်သားများအတွက် ခိုင်မာသည့် အာမခံချက် မရှိပါက ၎င်းတို့အား မိခင်နိုင်ငံသို့ ပြန်လာရန် ယုံကြည်အောင် ဆွဲဆောင်နိုင်ဦးမည် မဟုတ်ပါ။ ထိုအခါ ရွှေ့ပြောင်းလုပ်သားများနှင့် ပတ်သက်သော ပြဿနာများက ရှိနေဦးမည်သာ ဖြစ်သည်။
အခြေခံအလုပ်သမား အခွင့်အရေး မဆိုထားနှင့် တရားဝင် အထောက်အထားများဖြင့် ရပ်တည်နိုင်ရန်ပင် လုပ်ဆောင်ပေးနိုင်မှု အားနည်းချက်များ ရှိနေသည်။ ထိုင်း-မြန်မာ နယ်စပ် မဲဆောက်တွင် နေထိုင်လုပ်ကိုင် နေကြသော ရွှေ့ပြောင်းလုပ်သား ထက်ဝက်ကျော်ခန့်သည် အထောက်အထားမဲ့ တရားမ၀င် အလုပ်သမားများအဖြစ် ရှိနေဆဲဟု သိရသည်။ ယာယီပတ်(စ်)ပို့ပြုလုပ်ရာ၌ အကျိုးဆောင် အေဂျင်စီအချို့နှင့် ပွဲစားများက လိမ်လည်ခြင်း၊ ထိုင်းဥပဒေ အကန့်အသတ်အရ ပတ်(စ်)ပို့ထုတ်ပေးရေး လုပ်ငန်းစဉ်များတွင် မြန်မာအလုပ်သမားများ ကိုယ်တိုင်မပြုလုပ်နိုင်သဖြင့် ကုန်ကျစရိတ်များပြားခြင်း၊ ထိုင်းရဲများ၏ အထောက်အထား ရှိရှိမရှိရှိ ငွေကြေးတောင်းခံ နေမှုတို့ကြောင့် အလုပ်သမားများ အနေဖြင့် ပတ်(စ်)ပို့ပြုလုပ်ရန် စိတ်ဝင်စားမှု နည်းပါးနေကြောင်း သိရသည်။ ထို့ပြင်သက်ဆိုင် ရာစစ်ဆေးရေး ဂိတ်များတွင် ယခင်ကကဲ့သို့ ငွေကောက်ခံ၍ မရသောအခါ မြန်မာရွှေ့ပြောင်း အလုပ်သမားများအား ယာယီပတ်(စ်)ပို့များ လွှင့်ပစ်ခြင်း၊ ဆဲဆိုခြင်းများဖြင့် ထိုင်းလ၀ကရဲများ ရိုင်းစိုင်းစွာပြုမှု ဆက်ဆံလျက်ရှိကြောင်း ၀မ်းနည်းဖွယ် သိရှိရသည်။
ထို့ကြောင့် လက်ရှိတွင် အာဆီယံဥက္ကဋ္ဌအဖြစ် ဒေသတွင်း ပြဿနာများကို ဦးဆောင် ဖြေရှင်းရသည့်နည်းတူ ဒေသတွင်းနိုင်ငံများ အပါအ၀င် ပြည်ပနိုင်ငံများရောက် အခြေခံအခွင့် အရေးဆုံးရှုံးနေသော မြန်မာရွှေ့ပြောင်း လုပ်သားများ အရေးကိုလည်း အလေးထား လုပ်ဆောင်သင့်ပါကြောင်း The Daily Eleven သတင်းစာက တိုက်တွန်းအပ်ပါသည်။
from Eleven Media Group's Facebook Wall http://ift.tt/1mjRsj4
Comments
Post a Comment