#emg_editorials
၂၀၁၄ မေလ ၁၁ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
အာဆီယံနှင့် ပထဝီနိုင်ငံရေး
အရှေ့တောင်အာရှဒေသသည် ကမ္ဘာ့နိုင်ငံရေး၌ အလွန်အရေးကြီးသော ဒေသတစ်ခုအဖြစ် ကာလကြာရှည်စွာ ရပ်တည်လာခဲ့သည်။ စစ်အေးတိုက်ပွဲသည် ဥရောပတွင်စတင်၍ ဥရောပတွင် အဆုံးသတ်ခဲ့သည်ဟု ဆိုနိုင်သော်လည်း အရှေ့တောင်အာရှဒေသတွင် အပြင်းထန်ဆုံး ဖြစ်ပွားခဲ့သည်။ ယခုတစ်ဖန် အာရှဒေသ၏ ဖွံ့ဖြိုးတိုးတက်မှုများက လာမည့်ဆယ်စုနှစ်များအတွင်း နိုင်ငံတကာ၏ နိုင်ငံရေးရှုခင်းကို အဆုံးအဖြတ်ပေးလိမ့်မည်ဟု တစ်ကမ္ဘာလုံးက သတိပြုမိလာပြန်သည်။
ယင်းအချိန်၌ တရုတ်သည် မကြုံစဖူး စီးပွားရေးအင်အား ကြီးထွားလာပြီး လာမည့် နှစ် ၂ဝ အတွင်း ကမ္ဘာ့စီးပွားရေးအင်အား အကြီးဆုံးနိုင်ငံ ဖြစ်လာဖွယ်ရှိနေသည်။ တရုတ်သည် ပထဝီနိုင်ငံရေးကို ပြန်လည်ပုံဖော်ခြင်းနောက်ကွယ်မှ အဓိကတွန်းအား ဖြစ်သည်။ အရှေ့တောင်အာရှဒေသသည် တရုတ် အင်အားကြီးမားလာမှုနှင့်ပတ်သက်၍ တိုက်ရိုက်အကျဆုံး ရိုက်ခတ်ခံရသည့် ဒေသတစ်ခုဖြစ်သည်။ နှစ်ပေါင်း ၃ဝ အတွင်း တရုတ်တို့သည် ခပ်ခွာခွာနေခဲ့သည့် အရှေ့တောင်အာရှဒေသနှင့် စီးပွားရေးချိတ်ဆက်မှု အသစ်များကို တစ်ဟုန်ထိုးပြုလုပ်ခဲ့သည်။ တရုတ်နှင့် အာဆီယံတို့အကြား အပြန်အလှန်သက်ရောက်မှုက အာရှတိုက်တစ်ခုလုံး၏ အနာဂတ်နှင့် အလားအလာများကို အဆုံးအဖြတ်ပေးမည့် ကြီးမားသော အကြောင်းခြင်းရာတစ်ရပ် ဖြစ်သည်။ အာဆီယံနှင့် တရုတ်တို့၏ ဆက်ဆံရေးသည် ဒေသတွင်း ရပ်တည်ချက်အတွက် အလွန်အရေးကြီးသည်။ ၁၉၉၇-၈ ခုနှစ် စီးပွားရေးပျက်ကပ်အတွင်း တရုတ်သည် အရှေ့တောင်အာရှဒေသများ ကို ထောက်ပံ့မှုပေးခဲ့ပြီး အာဆီယံနှင့် ဆက်လက်ပူးပေါင်း ဆောင်ရွက်မှုများ ပြုလုပ်ခဲ့သည်။ တရုတ်သည် ဒေသတွင်းနိုင်ငံများ၏ မပြင်းထန်သော စီးပွားရေးရည်မှန်းချက်များအတွက် အာမခံချက်ပေးနိုင်ခဲ့သည်။
သို့သော် အရှေ့တောင်အာရှဒေသတွင်းတွင် ပထဝီနိုင်ငံရေးက အသက်ဝင်လာပြီး ပြန်လည်ရှင်သန်လာသည်ဟုပင် ဆိုနိုင်သည်။ တောင်တရုတ်ပင်လယ်အတွင်း နယ်မြေပိုင်ဆိုင်မှုဆိုင်ရာ အငြင်းပွားမှုများ ဖြစ်ပေါ်လာပြီး အလျှော့မပေးသည့် တရုတ်ကို ဆန့်ကျင်အာခံသည့် အာဆီယံနိုင်ငံများ ပေါ်ထွက်လာသည်။ စီးပွားရေးနှင့်ပတ်သက်၍ တရုတ်အပေါ် အကြီးအကျယ် မှီခိုနေရသည့် နိုင်ငံများသည်ပင်လျှင် တရုတ်ကို အာခံလာသည်။ ယင်းအချိန်၌ အမေရိကန်က အရှေ့တောင်အာရှဒေသသို့ ပြန်လှည့်ကြည့်လာသည်။ တရုတ်အင်အား ကြီးထွားလာမှုနှင့်ပတ်သက်၍ မဟာဗျူဟာဆိုင်ရာ စိန်ခေါ်မှုကို အာရုံစိုက်လျက် နိုင်ငံခြားရေးမူဝါဒကို ပြန်လည်ထိန်းညှိရန် အမေရိကန်က ကြိုးပမ်းလာသည်။ အမေရိကန်က ပို၍ပွင့်လင်းမြင်သာမှု နည်းပါးသော တရုတ်တို့၏ ရည်ရွယ်ချက်များကို ကာကွယ်နိုင်ရန်အတွက် ဒေသတွင်းနိုင်ငံများကို အားပေးအားမြှောက်ပြုလာသည်။ ထို့ကြောင့် အရှေ့တောင်အာရှနိုင်ငံများသည် ဒေသတွင်းမှမဟုတ်သော အင်အားကြီး နှစ်နိုင်ငံအကြား ပထဝီနိုင်ငံရေးပဋိပက္ခ၌ မြေစာပင်ဖြစ်ရမည့် အန္တရာယ်ရှိလာသည်။
ထို့ကြောင့် အရှေ့တောင်အာရှ ဒေသတွင်းနိုင်ငံများအနေဖြင့် ပထဝီဝင်အရနှင့် စီးပွားရေးအရ မဟာဗျူဟာအကျိုးစီးပွားအတွက် ပြိုင်ဆိုင်နေသော အမေရိကန်နှင့် တရုတ်တို့၏ စိန်ခေါ်မှုကို တုံ့ပြန်ရာ၌ ကျွဲနှစ်ကောင်ခတ်သည့်ကြား မြေစာပင်ဖြစ်မည့် အရေးကို ရှောင်လွှဲလျက် အခွင့်ကောင်းယူနိုင်ရန် လိုအပ်ပါကြောင်းနှင့် ဒေသတွင်း၌ လက်ရှိဖြစ်ပေါ်နေသော ပထဝီနိုင်ငံရေးပြိုင်ဆိုင်မှု၌ အတူတကွပူးပေါင်းရပ်တည်ကြရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
from Eleven Media Group's Facebook Wall http://ift.tt/1j7GUUh
Comments
Post a Comment