ကလေးသူငယ် အခွင့်အရေး
အလုပ်သမား အလုပ်အကိုင်နှင့် လူမှုဖူလုံရေးဝန်ကြီးဌာနအနေဖြင့် “၂၀၁၅ ခုနှစ် အကုန်တွင် အတင်းအဓမ္မစေခိုင်းမှု လုံးဝပပျောက်ရေး ပူးတွဲမဟာဗျူဟာ” ကို လက်မှတ်ရေးထိုးထားကြောင်း သိရသည်။ ထိုလုပ်ငန်းစီမံချက်တွင် အရွယ်မရောက်သူ ကလေးသူငယ်များ တပ်မတော်မှနုတ်ထွက်ခွင့်ရရေးအတွက် ကာကွယ်ရေးဝန်ကြီးဌာနနှင့် ပူးပေါင်းဆောင်ရွက်နေပြီဖြစ်ကြောင်း သိရသည်။
နိုင်ငံအနာဂတ်အတွက် အရေးပါသော ရင်သွေးများဟု အမြဲသုံးနှုန်းလေ့ရှိသလို အဆိုပါရင်သွေးများ၏ အနာဂတ်လှပဖို့ လိုအပ်ချက်များ ဖြည့်ဆည်းပေးရန် အားလုံးတွင် တာဝန်ရှိမည်ဖြစ်သည်။
မြန်မာနိုင်ငံရှိ ကလေးသူငယ်များ၏ ရာခိုင်နှုန်း ၇၀ ခန့်သည် တစ်ပတ်လျှင် လေးရက်ထက်မနည်း သတ်မှတ်ထားသည့် အလုပ်ချိန် ရှစ်နာရီထက် ကျော်လွန် အလုပ် လုပ်ကိုင်နေရကြောင်း အပြည်ပြည်ဆိုင်ရာအလုပ်သမားအဖွဲ့က ထုတ်ပြန်ခဲ့သည်။ ကျောင်းနေအရွယ်ရောက်သော်လည်း အေးချမ်းစွာပညာသင်ကြားနိုင်ခြင်းမရှိသော ကလေးသူငယ်များစွာ ရှိနေသည်။ အရွယ်မတိုင်မီ လုပ်ငန်းခွင်ဝင်နေရသော ကလေးလုပ်သားများစွာ ရှိနေသည်။ လူမှုအ၀န်းအ၀ိုင်းတွင် အခွင့်အလမ်းနည်းပါးသော ကလေးငယ်များစွာ ရှိနေသည်။ အသက်မပြည့်မီ တပ်မတော်တွင် စုဆောင်းခံခဲ့ရသူများလည်း ရှိခဲ့သည်။ မြန်မာနိုင်ငံတွင် ကျောင်းနေအရွယ် ကလေးမည်မျှ ပညာသင်ကြားနိုင်ပြီဖြစ်ကြောင်း ကိန်းဂဏန်းများ၊ ရာခိုင်နှုန်းများဖြင့် ထုတ်ပြန်နိုင်လေ့ရှိသော်လည်း ကလေးမည်မျှသည် ပညာသင်ခွင့်မရ၊ ကလေးအခွင့်အရေးဆုံးရှုံး၍ အဓမ္မခိုင်းစေခံနေရမှု မည်မျှအထိရှိနေသည်ကိုမူ တိတိကျကျထုတ်ပြန် ဆန်းစစ်နိုင်မှုတွင်မူ လိုအပ်ချက်များရှိနေဆဲ ဖြစ်သည်။
ထို့ပြင် အခြေခံအခွင့်အရေး ဆုံးရှုံးထားသော ကလေးသူငယ်များ၏ စိတ်ပိုင်းဆိုင်ရာ ယုံကြည်မှုအတွက် အချိန်ယူလုပ်ဆောင်စရာ များစွာရှိနေကြောင်း နာဂစ်မုန်တိုင်းအလွန် အဆိုပါဒေသများရှိ ကလေးသူငယ်များ၏ အခြေအနေနှင့်ပတ်သက်၍ ဆန်းစစ်ချက်များအရ သိရသည်။ ကလေးသူငယ်အရွယ်တွင် ခါးသီးစွာ ခံစားခဲ့ရသော စိတ်ဒဏ်ရာသည် အဆိုပါကလေးသူငယ်၏ အနာဂတ်နှင့် သူကျင်လည်ကြီးပြင်းမည့် အ၀န်းအ၀ိုင်းအား အနည်းနှင့်အများ သက်ရောက်လာနိုင်သည်ကို သတိပြုရမည်ဖြစ်သည်။ ကလေးသူငယ်အရေးနှင့်ပတ်သက်လျှင် မိုးများရာ မိုးရွာသကဲ့သို့ အခြေအနေမျိုးထက် လိုအပ်သည့်နေရာများတွင် မှန်မှန်ကန်ကန်ဖြည့်ဆည်းပေးနိုင်ရန် လုပ်ဆောင်သင့်ပါသည်။ မြန်မာနိုင်ငံဒေသအနှံ့တွင် အကြောင်းအမျိုးမျိုးကြောင့် အခြေခံအခွင့်အရေးများ ဆုံးရှုံးနေသော ကလေးငယ်များအား အမေ့လျော့ခံများအဖြစ်သို့ မရောက်ရန် အစိုးရအပါ အ၀င် လူမှုကူညီရေးအဖွဲ့အစည်းများအားလုံး ၀ိုင်းဝန်းလုပ်ဆောင်သင့်ပါသည်။
ထို့ကြောင့် အပြည်ပြည်ဆိုင်ရာအလုပ်သမားအဖွဲ့ (ILO) နှင့် ပူးပေါင်းကာ ကလေးသူငယ်များအား အဆိုးရွားဆုံးပုံစံဖြင့် ခိုင်းစေခြင်းများ၊ ၂၀၁၅ မတိုင်မီ လျော့နည်းပပျောက်အောင် ဆောင်ရွက်သကဲ့သို့ ကလေးသူငယ်များ၏ အခွင့်အရေး အပြည့်အ၀ရကာ အမေ့လျော့ခံအဖြစ်မှ ကင်းလွတ်ရန် အားလုံးတွင် တာဝန်ရှိမည်ဖြစ်ကြောင်း The Daily Eleven သတင်းစာက တိုက်တွန်းအပ်ပါသည်။
from Eleven Daily News http://ift.tt/1fGwXwo
Comments
Post a Comment