၂၀၁၄ မေလ ၁၅ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
#emg_editorials
မြေမြှုပ်မိုင်း အန္တရာယ်နှင့် မြန်မာနိုင်ငံ
HANDICAP International အဖွဲ့၏ ထုတ်ပြန်ချက်များအရ မြန်မာနိုင်ငံသည် မြေမြှုပ်မိုင်းကြောင့် လူဦးရေ ၁၀၀ နှင့်အထက် သေကျေပျက်စီးသည့် နိုင်ငံများအနက် ပဉ္စမနေရာတွင် ရပ်တည်နေကြောင်း သိရသည်။ ပထမနှင့် ဒုတိယနေရာတွင် အာဖဂန်နစ္စတန်နှင့် ကိုလံဘီယာတို့ ရှိနေသည်။
ထို့ပြင် တိုက်ပွဲအချို့ ပြန်လည်ဖြစ်ပွားနေသော ကချင်ပြည်နယ်နှင့် ရှမ်းပြည်နယ် (မြောက်ပိုင်း) တို့တွင် လက်ရှိအချိန်အထိ မြေမြှုပ်မိုင်းများ အသုံးပြုလျက်ရှိနေသေးကြောင်း ယူနီဆက်ဖ် (မြန်မာ) က ထုတ်ပြန်ထားသည်။
၂၀၁၃ ခုနှစ်အတွင်းက ထုတ်ပြန်ခဲ့သော မြေမြှုပ်မိုင်းနှင့် ထပ်ဆင့်ပေါက်ကွဲစေသော လက်နက်ပစ္စည်းများ စောင့်ကြည့်လေ့လာရေး အစီရင်ခံစာတွင် သံသယရှိဖွယ် အန္တရာယ်များသောဒေသများ (Suspected Hazardous Areas - SHAs) အဖြစ် ကရင်ပြည်နယ်အတွင်းမှ မြို့နယ်များ၊ ကယားပြည်နယ်အတွင်းမှ မြို့နယ်များ၊ ကချင်ပြည်နယ်အတွင်းမှ မိုးကောင်း၊ မိုးမောက်၊ မြစ်ကြီးနား၊ ၀ိုင်းမော်၊ မန်ရှီ၊ ချီဝီနှင့် ဆလောတို့ကို သတ်မှတ်ထားကြောင်း သိရသည်။ အဆိုပါ အစီရင်ခံစာကို မြေမြှုပ်မိုင်းနှင့် ထပ်ဆင့်ပေါက်ကွဲစေသော လက်နက်ပစ္စည်းများ စောင့်ကြည့်လေ့လာရေးအဖွဲ့ (LCM- LANDMINE & CLUSTER MUNITION) က ပြုစု၍ ထုတ်ပြန်ခဲ့ခြင်းဖြစ်သည်။ အစီရင်ခံစာတွင် မွန်ပြည်နယ်မှ ဘီးလင်း၊ ကျိုက်ထို၊ မော်လမြိုင်၊ သံဖြူဇရပ်၊ သထုံနှင့်ရေး၊ ပဲခူးတွင် ကျောက်ကြီး၊ ရွှေကျင်၊ သနပ်ပင်နှင့်တောင်ငူ၊ ရှမ်းပြည်နယ်တွင် ဟိုပုံး၊ ဆီဆိုင်၊ လမ်ခို၊ မောက်မိုင်၊ မိုင်းပန်၊ မိုင်းတုံ၊ မိုင်းဖြတ်၊ နမ့်စန်၊ တာချီလိတ်၊ နမ့်ခမ်း၊ တနင်္သာရီတွင် ဘုတ်ပြင်း၊ ထားဝယ်၊ တနင်္သာရီ၊ သရက်ချောင်းနှင့် ရေဖြူ၊ ရခိုင်ပြည်နယ်တွင် မောင်တော စသည်ဖြင့် သံသယရှိဖွယ် နယ်မြေများအဖြစ် သတ်မှတ်ထားကြောင်း သိရသည်။ ဘင်္ဂလားဒေ့ရှ်၊ ထိုင်းနိုင်ငံတို့နှင့် နယ်စပ်ထိစပ်နေသော ဒေသများ မြန်မာနိုင်ငံ အရှေ့ဘက်ခြမ်း ဒေသများတွင် ရှိနိုင်သည်ဟု ခန့်မှန်းထားကြသည်။
မြန်မာ့ငြိမ်းချမ်းရေးစင်တာ (MPC) ၏လက်အောက်တွင် မိုင်းဆိုင်ရာလုပ်ငန်း ဌာနတစ်ခု ဖွဲ့စည်းဆောင်ရွက်ရန် သဘောတူထားပြီးဖြစ်သည်။
ကမ္ဘာ့နိုင်ငံပေါင်း ၁၁၆ နိုင်ငံက မြေမြှုပ်မိုင်းတားဆီးရေး စာချုပ်ကို ၁၉၉၇ ခုနှစ်က လက်မှတ်ရေးထိုးထားသည်။ မြန်မာနိုင်ငံသည် မြေမြှုပ်မိုင်းအသုံးပြုမှု ပိတ်ပင်တားဆီးခြင်း သဘောတူစာချုပ် အစည်းအဝေးများတွင် ပူးပေါင်းဆောင်ရွက်မှု အနေဖြင့် ဂျီနီဗာတွင် ၂၀၁၂ ခုနှစ် ဒီဇင်ဘာက ကျင်းပခဲ့သော အဖွဲ့ဝင်နိုင်ငံများ၏ ၁၂ ကြိမ်မြောက် အစည်းအဝေးနှင့် ၂၀၁၃ ခုနှစ်မေတွင် ကျင်းပသော လုပ်ငန်းကဏ္ဍဆိုင်ရာ ဆက်စပ်အစည်းအဝေးများသို့ တက်ရောက်ခဲ့သည်။ ၂၀၁၂ ခုနှစ် ဒီဇင်ဘာ ၃ ရက်ကကျင်းပသော ကုလသမဂ္ဂ အထွေထွေညီလာခံ ဆုံးဖြတ်ချက် ၆၆/၂၉ ချမှတ်ရာတွင် ကြားနေနိုင်ငံ ၁၉ နိုင်ငံတွင် မြန်မာနိုင်ငံ ပါဝင်ခဲ့သည်။
ကမ္ဘာ့နိုင်ငံများသည် မသန်စွမ်းသူများ အခွင့်အရေးဆိုင်ရာ သဘောတူညီချက်စာချုပ်၊ လွင့်စဉ်ပေါက်ကွဲ လက်နက်များဆိုင်ရာစာချုပ်၊ သမားရိုးကျ လက်နက်များဆိုင်ရာစာချုပ်၊ စစ်ကျန်လက်နက်ပစ္စည်းဆိုင်ရာ နောက်ဆက်တွဲဆိုင်ရာ စာချုပ်တို့ကို လက်မှတ်ရေးထိုးထားကြကြောင်း သိရသည်။
ထို့ကြောင့် မြေမြှုပ်မိုင်းအန္တရာယ်အတွက် စောင့်ကြည့်ခြင်းခံနေရသော မြန်မာနိုင်ငံအနေဖြင့် ငြိမ်းချမ်းရေးလုပ်ငန်းစဉ်များ လုပ်ဆောင်ခြင်း၊ လက်နက်ကိုင်တိုက်ပွဲများ ချုပ်ငြိမ်းအောင် လုပ်ဆောင်ခြင်းများဖြင့် ကလေးသူငယ်များ အပါအ၀င် နိုင်ငံသားများ မြေမြှုပ်မိုင်းအန္တရာယ်မှ ကင်းဝေး၍ ဒုက္ခိတများ မဖြစ်စေရန် အလေးထား လုပ်ဆောင်သင့်ပါကြောင်း The Daily Eleven သတင်းစာက တိုက်တွန်းအပ်ပါသည်။
from Eleven Media Group's Facebook Wall http://ift.tt/1mWHBT7
Comments
Post a Comment