၂၀၁၅ ခရီးသွားရာသီ ကမ္ဘာလှည့်ခရီးသည် ငါးသန်း မျှော်မှန်း
ရန်ကုန်၊ မေ ၂၂
လာမည့် ၂၀၁၅ ခုနှစ် ခရီးသွား ရာသီတွင် မြန်မာနိုင်ငံသို့ ကမ္ဘာလှည့် ခရီးသွား အရေအတွက် ငါးသန်း ဝင်ရောက်နိုင်ရန် မျှော်မှန်းထားကြောင်း ဟိုတယ်နှင့် ခရီးသွားလာရေးလုပ်ငန်း ဝန်ကြီးဌာန ဟိုတယ်နှင့် ညွှန်ကြားမှုဦးစီးဌာန ညွှန်ကြားရေးမှူးချုပ် ဦးအောင်ဇော်ဝင်းက ပြောကြားသည်။
ယခုနှစ် ၂၀၁၄ ခုနှစ်တွင် ကမ္ဘာလှည့်ခရီးသည် သုံးသန်း လာရောက်မည်ဟု မျှော်မှန်းထားပြီး မေလ ပထမပတ်အထိ ဝင်ရောက်လာသည့် ခရီးသည် အရေအတွက် ၁ ဒသမ ၄ သန်း ရှိနေပြီ ဖြစ်ကြောင်း အဆိုပါဌာနက မေလ ၁၅ ရက်နေ့က ထုတ်ပြန်သည်။
“လွန်ရောကျွံရော ငါးသန်း မှန်း ထားတယ်။ အသေအချာ ပြောလို့တော့ မရသေးဘူး။ ဒီနှစ် မှန်းထားတဲ့ သုံးသန်း ပြည့်မီ၊ မမီကိုတော့ ပြန်ကြည့်ရမယ်။ ခရီးသွား သုံးသန်းကတော့ ဒီနှစ်အတွက် ရနိုင်ပါတယ်။ ၁ ဒသမ ၄ သန်းဆိုတာ ၂၀၁၂ ခုနှစ် တစ်နှစ်လုံးစာ ဝင်ခဲ့တဲ့ ခရီးသွား အရေအတွက်လောက် ရှိနေပြီ” ဟု ၎င်းကဆိုသည်။
ကမ္ဘာလှည့် ခရီးသွား မြင့်တက်နေသည့်အတွက် အခန်းများရရှိရန် ဟိုတယ် လိုင်စင်များကိုလည်း အမြန်ဆုံး ဆောင်ရွက်ပေးနေကာ လက်ရှိအချိန်အထိ တစ်နိုင်ငံလုံး အခန်းပေါင်း သုံးသောင်း ရှစ်ထောင်ထိ ရှိနေကြောင်း ညွှန်ကြားရေးမှူးချုပ်က ဆက်လက် ပြောဆိုသည်။
“ငါးသန်းတွေ၊ သုံးသန်းတွေ တကယ် ဝင်လာရင်တော့ ကောင်းတာပေါ့။ အဲဒီစာရင်းထဲမှာ နယ်စပ်က ဝင်လာတဲ့ လူမျိုးကို ကောက်နေလို့ ပြည့်မီတာလား ဆိုတာတော့ မပြောတတ်ဘူး။ တကယ်တမ်း ဝင်လာရင် အခြေခံအဆောက်အအုံ မရှိရင်၊ အဆင်မပြေမှုများရင်တော့ စိတ်ညစ်ပြီး ပြန်သွားကြမှာပဲ” ဟု ဝါရင့်ဧည့်လမ်းညွှန် တစ်ဦးဖြစ်သူ ဒေါ်ချောချောကြေးမုံက ဆိုသည်။
ခရီးသွား ဝင်ရောက်မှု များပြားလာ၍ ကြိုတင် မှာကြားထားမှု မရှိသည့် ခရီးသည်များအတွက် လေယာဉ်လက်မှတ်၊ ဟိုတယ်အခန်း ယူရာတွင် အနည်းငယ် အခက်အခဲ ရှိနေဆဲ ဖြစ်ပြီး လာမည့် ၂၀၁၅ ခုနှစ်အတွက် ခရီးသည် ငါးသန်း အမှန်တကယ် ဝင်ရောက်လာပါက ယင်းပြဿနာများကို ထပ်မံရင်ဆိုင်ရနိုင်ကြောင်း ခရီးသွားလုပ်ငန်း ဝန်ဆောင်မှု ကုမ္ပဏီများထံမှ စုံစမ်းသိရှိရသည်။
မြန်မာနိုင်ငံသို့ ခရီးသွားဧည့်သည် ဝင်ရောက်မှုသည် ၂၀၁၁ ခုနှစ်တွင် ၇၉၀,၀၀၀ ဦး၊ ၂၀၁၂ ခုနှစ်တွင် ၁ ဒသမ ၀၄ သန်း၊ ၂၀၁၃ ခုနှစ်တွင် ၂ ဒသမ ၀၆ သန်း ဝင်ရောက်ခဲ့သည်။
from The Voice Weekly's Facebook Wall http://ift.tt/1obUVTb
Comments
Post a Comment