ဝက်လက်၊ ကန့်ဘလူ၊ မော်လိုက်နှင့် ဟင်္သာတတို့တွင် ဖွဲ့စည်းပုံ အခြေခံဥပဒေ ပြင်ဆင်ရေး ဆန္ဒဖော်ထုတ်မည်
ရန်ကုန်၊ မေ ၂၄
တပ်မတော်အစိုးရ လက်ထက်က ရေးဆွဲခဲ့သည့် ၂၀၀၈ ခုနှစ် ဖွဲ့စည်းပုံ အခြေခံဥပဒေ ပြင်ဆင်ရေးအတွက် စစ်ကိုင်းတိုင်းဒေသကြီး ရွှေဘိုခရိုင် အတွင်းရှိ ကန့်ဘလူမြို့နယ်နှင့် ဝက်လက်မြို့နယ်၊ ချင်းတွင်း အထက်ပိုင်းဒေသ မော်လိုက်မြို့နှင့် ဧရာဝတီတိုင်းဒေသကြီး ဟင်္သာတမြို့တို့၌ မေလ ၂၅ ရက်နေ့တွင် ဆန္ဒထုတ်ဖော်ပွဲများ ကျင်းပမည် ဖြစ်ကြောင်း ယင်းမြို့နယ်များရှိ အမျိုးသားဒီမိုကရေစီအဖွဲ့ချုပ် (NLD) အဖွဲ့ဝင်များက ပြောကြားသည်။
စစ်ကိုင်းတိုင်းဒေသကြီး ရွှေဘိုခရိုင် အတွင်းရှိ ကန့်ဘလူမြို့နယ်နှင့် ဝက်လက်မြို့နယ်တို့၌ မေလ ၂၅ ရက်နှင့် ၂၆ ရက်နေ့တို့တွင် NLD အဖွဲ့ဝင်များက ဦးဆောင်၍ လူအင်အား ၅၀၀၀ ကျော်ဖြင့် ဆန္ဒထုတ်ဖော်မည် ဖြစ်ရာ ပုဒ်မ ၄၃၆ ပြင်ဆင်ရေး အပါအဝင် ၂၀၀၈ ခုနှစ် ဖွဲ့စည်းပုံ အခြေခံဥပဒေ ပြင်ဆင်ရေးအတွက် ဆန္ဒဖော်ထုတ်ခြင်း ဖြစ်သည်ဟု ယင်းမြို့နယ် NLD အဖွဲ့ဝင်များက ပြောဆိုသည်။
ဖွဲ့စည်းပုံအခြေခံဥပဒေ ပြင်ဆင်ရေး၊ ပုဒ်မ ၄၃၆ ချက်ချင်းပြင်၊ လေးပွင့်ဆိုင် ဆွေးနွေးရေး၊ အမျိုးသားပြန်လည်ရင်ကြားစေ့ရေး၊ နိုင်ငံသား အခွင့်အရေး တန်းတူရေး ဟူသည့် ဆိုင်းဘုတ်များ ကိုင်ဆောင်၍ နံနက် ၇ နာရီတွင် ထန်းတပင်-ဇီးကုန်း (တ) ကျေးရွာ မြို့မဘောလုံးကွင်း၌ လူစုပြီး ဆေးရုံလမ်းထောင့်မှ အနောက်ဘက် ဈေးလမ်းထောင့်၊ ဈေးထောင့်မှ ဈေးအရှေ့ဘက်လမ်း၊ ဈေးမြောက်ဘက် ဘူတာလမ်း၊ ဘုရားလေးလမ်းမြောက်ဘက် သံလမ်းကူး ရွှေဖောင်ဦးကျောင်း လမ်းထောင့်မှတစ်ဆင့် မူလစုရပ်သို့ မွန်းလွဲ ၂ နာရီထိ ဆန္ဒထုတ်ဖော်မည်ဟု ကန့်ဘလူမြို့နယ် ကာဘိုးကျေးရွာဥက္ကဋ္ဌ ဦးမျိုးဝင်းမောင်က ပြောကြားသည်။
မော်လိုက်ခရိုင် အတွင်းရှိ ကျေးရွာအုပ်စု ၃၂ ခုရှိ NLD အဖွဲ့ဝင်များနှင့် ဒေသခံများ တစ်ထောင်ကျော်ဖြင့် နံနက် ၈ နာရီတွင် ဆန္ဒဖော်ထုတ်မည် ဖြစ်ရာ မြို့မကျောင်းတွင် စုရပ်အဖြစ် ထားရှိပြီး အခြေခံဥပဒေ ပြင်ဆင်ရေး၊ ပုဒ်မ ၄၃၆ ပြင်ဆင်ရေး၊ ပုဒ်မ ၅၉ (စ) နှင့် ပုဒ်မ ၅၉ (ဃ) ပြင်ဆင်ရေးတို့အတွက် ကြွေးကြော်သံများဖြင့် ဆန္ဒဖော်ထုတ်မည်ဟု ယင်းခရိုင် NLD ပါတီဥက္ကဋ္ဌ ဦးတင်မောင်ဝင်းက ရှင်းပြသည်။
“ကျွန်တော်တို့ လူဦးရေ တစ်ထောင်ကျော် ခွင့်ပြုပေးဖို့ တင်ပြတာကို သုံးရာကျော်ပဲ ခွင့်ပြုပါတယ်။ ဒါပေမဲ့ ကျွန်တော်တို့ တစ်ထောင်ကျော်နဲ့ ဆန္ဒပြကြမှာပါ” ဟု ၎င်းက ပြောဆိုသည်။
ဟင်္သာတမြို့နယ်၌ ဆန္ဒဖော်ထုတ်ပွဲနှင့်အတူ ၂၀၀၈ ခုနှစ် ဖွဲ့စည်းပုံ အခြေခံဥပဒေ ပြင်ဆင်ရေးအတွက် NLD ပါတီ နာယက ဦးတင်ဦးနှင့် ၈၈ မျိုးဆက်သစ် ကျောင်းသားခေါင်းဆောင်များ ဖြစ်သည့် မင်းကိုနိုင်၊ ကိုကိုကြီးနှင့် ဧရာဝတီတိုင်းဒေသကြီး NLD ပါတီဥက္ကဋ္ဌ ဒေါက်တာမျိုးညွန့်တို့က ဟောပြောမည် ဖြစ်ကြောင်း ယင်းတိုင်းဒေသကြီး NLD ပါတီဥက္ကဋ္ဌက ပြောကြားသည်။
ဟင်္သာတခရိုင်အတွင်း မြို့နယ်ခြောက်ခုမှ NLD ပါတီဝင်များနှင့်၊ ဟင်္သာတခရိုင် ၈၈ မျိုးဆက် ပွင့်လင်းလူ့အဖွဲ့အစည်းတို့ ပူးပေါင်းကျင်းပသည့် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး ပထမဆုံး လက်မှတ်ရေးထိုး ဟောပြောပွဲ ဖြစ်ပြီး သဘာပတိ ဦးတင်ဦးအနေနှင့် ဟင်္သာတမြို့သို့ ပထမဆုံး လာရောက် ဟောပြောခြင်း ဖြစ်သည်ဟု ပြောဆိုသည်။
“ဒီပွဲက ဟင်္သာတခရိုင်မှာ ရှိတဲ့ မြို့နယ်ခြောက်ခုက NLD ပါတီဝင်တွေ အပြင် စိတ်ဝင်စားတဲ့သူတွေလည်း လာကြမယ်။ လူဦးရေ ၂၀၀၀ ကျော် တက်မယ်လို့ မှန်းထားတယ်” ဟု ဧရာဝတီတိုင်းဒေသကြီး NLD ပါတီ အလုပ်အမှုဆောင် ဦးဝိုင်းမောင်စိုးက ဖြည့်စွက် ပြောကြားသည်။
မြန်မာနိုင်ငံ ဒေသအနှံ့ရှိ မြို့ကြီးများတွင် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး၊ ပုဒ်မ ၄၃၆ ပြင်ဆင်ရေး၊ ပုဒ်မ ၅၉ (စ၊ ဃ) ပြင်ဆင်ရေးတို့အတွက် ဆန္ဒဖော်ထုတ်ပွဲများကို အမျိုးသားဒီမိုကရေစီအဖွဲ့ချုပ် (NLD) ပါတီဝင်များက ဦးဆောင်ခဲ့ကြပြီး ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးကို လက်ခံနိုင်သော်လည်း ပုဒ်မ ၄၃၆ ပြင်ဆင်ရေး၊ ပုဒ်မ ၅၉ (စ၊ ဃ) ပြင်ဆင်ရေးကို လက်မခံသည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီဝင်များကလည်း ဆန္ဒဖော်ထုတ်ပွဲများ ကျင်းပလျက် ရှိသည်။
from The Voice Weekly's Facebook Wall http://ift.tt/1ouvkCA
Comments
Post a Comment