တောင်ကုတ်၊ သံတွဲကို မဟာဓာတ်အားလိုင်းမှ လျှပ်စစ်မီးစပေးမည်
ရန်ကုန်၊ မေ ၂၇
ရခိုင်ပြည်နယ်တောင်ပိုင်း တောင်ကုတ်မြို့နှင့် သံတွဲမြို့တို့တွင် မဟာဓာတ်အားလိုင်းမှ ဇွန်လမှစတင်ကာ လျှပ်စစ်မီး ၂၄ နာရီ ပေးသွားမည် ဖြစ်ကြောင်း လျှပ်စစ်စွမ်းအား ဝန်ကြီးဌာန၊ ဓာတ်အားပို့လွှတ်ရေး စီမံကိန်း (တောင်ပိုင်း) မှ တာဝန်ရှိသူ တစ်ဦးက ပြောကြားသည်။
လျှပ်စစ်သုံးစွဲခကို ရန်ကုန်မြို့တော်တွင် ကောက်ခံသည့် နှုန်းထား အတိုင်း ကောက်ယူမည် ဖြစ်ကြောင်း ၎င်းကဆိုသည်။
“အမ်း၊ စစ်တွေနဲ့ အခြားမြို့တွေလည်း ဒီနှစ်ထဲမှာ ရနိုင်ခြေရှိတယ်။ ကျန်တဲ့မြို့တွေ ရဖို့အတွက် ဓာတ်အားလိုင်းတွေ တည်ဆောက်နေတုန်းပဲ” ဟု အဆိုပါ တာဝန်ရှိသူက ထပ်မံပြောကြားသည်။
ရခိုင်ပြည်နယ် မီးလင်းရေး မဟာဓာတ်အားလိုင်း စီမံကိန်းကို ၂၀၁၃ ခုနှစ်၊ ဖေဖော်ဝါရီလတွင် စတင်ခဲ့ပြီး ဥသျှစ်ပင်- တောင်ကုတ် ၂၃၀ ကေဗီဓာတ်အားလိုင်း၊ တောင်ကုတ် (ဘာယေ)-သံတွဲ ၆၆ ကေဗီ ဓာတ်အားလိုင်း၊ တောင်ကုတ် (ဘာယေ)- တောင်ကုတ် ၁၁ ကေဗီ ဓာတ်အားလိုင်းများ တည်ဆောက် ပြီးစီးပြီဖြစ်၍ ဓာတ်အားဖြန့်ဖြူးရန် တောင်ကုတ် (ဘာယေ) ဓာတ်အားခွဲရုံနှင့် သံတွဲ ဓာတ်အားခွဲရုံတို့ တည်ဆောက် ပြီးစီးနေပြီ ဖြစ်ကြောင်း လျှပ်စစ်စွမ်းအား ဝန်ကြီးဌာနမှ သိရှိရသည်။
ကျန်ရှိသည့် တောင်ကုတ်-မအီ၊ မအီ-အမ်း၊ အမ်း- ပုဏ္ဏားကျွန်း မြို့များတွင် ၂၃၀ ကေဗွီ ဓာတ်အားလိုင်းနှင့် မအီ-ကျောက်ဖြူ ၂၃၀ ကေဗီ နှစ်ထပ် ဓာတ်အားလိုင်းများကို လျှပ်စစ်စွမ်းအား ဝန်ကြီးဌာနက ထပ်မံတည်ဆောက်လျက် ရှိသည်။
ရခိုင်ပြည်နယ် မြို့တော်ဖြစ်သည့် စစ်တွေမြို့တွင် လျှပ်စစ်မီး ၂၄ နာရီ ရရှိသော်လည်း လျှပ်စစ်ဓာတ်အား တစ်ယူနစ်လျှင် ၄၆၀ ကျပ်နှုန်းဖြင့် သုံးစွဲရသဖြင့် အဆင်မပြေကြောင်း၊ အခြားမြို့နယ် များတွင်လည်း နာရီ အကန့်အသတ်ဖြင့်သာ လျှပ်စစ်မီး ရရှိကြသဖြင့် အဆင်မပြေကြောင်း ရခိုင်ပြည်နယ် ဒေသခံများကို မေးမြန်းချက်အရ သိရှိရသည်။
ရခိုင်ပြည်နယ် ကျောက်ဖြူမြို့နှင့် ကျေးရွာအချို့ကို ၂၀၁၃ ခုနှစ် စက်တင်ဘာလ ၁၅ ရက်နေ့မှစတင်ကာ တရုတ်- မြန်မာ ရေနံနှင့် သဘာဝဓာတ်ငွေ့ စီမံကိန်းမှ ရရှိသည့် သဘာဝဓာတ်ငွေ့ဖြင့် လျှပ်စစ်မီး ၂၄ နာရီ ပေးနေပြီဖြစ်ပြီး လျှပ်စစ်သုံးစွဲခအဖြစ် နေအိမ်သုံး တစ်ယူနစ် ၃၅ ကျပ်နှုန်း၊ စီပွားရေး လုပ်ငန်းသုံးအတွက် ၇၅ ကျပ်နှုန်းဖြင့် ကောက်ယူနေသည်။
ပြည်ထောင်စု မဟာဓာတ်အားလိုင်းမှတစ်ဆင့် ရခိုင်ပြည်နယ်သို့ သွယ်တန်းနေသည့် မဟာဓာတ်အားလိုင်း စီမံကိန်း အိန္ဒိယချေးငွေ၊ နိုင်ငံတော် ဘတ်ဂျက်တို့ဖြင့် ၂၀၁၂ ခုနှစ်ပင် စတင်ခဲ့ပြီး ယင်းစီမံကိန်း ပြီးစီးပါက တောင်ကုတ်၊ သံတွဲ၊ အမ်း၊ မြောက်ဦး၊ ပုဏ္ဏားကျွန်း၊ မအီ၊ ကျောက်ဖြူ၊ ရမ်းဗြဲ၊ စစ်တွေမြို့များနှင့် ဆက်စပ်သည့် မြို့၊ ကျေးရွာများကို လျှပ်စစ်ဓာတ်အား အပြည့်အဝ ပေးသွားမည် ဖြစ်ကြောင်း လျှပ်စစ်အား ဝန်ကြီးဌာန ဒုတိယဝန်ကြီး ဦးအောင်သန်းဦးက ၂၀၁၃ ခုနှစ် မတ်လ ၁၉ ရက်နေ့က ပြည်သူ့လွှတ်တော်တွင် ပြောကြားသည်။
from The Voice Weekly's Facebook Wall http://ift.tt/RA0cpe
Comments
Post a Comment