(မေလ ၁၃ ရက်ထုတ် မဇ္ဈိမနေ့စဉ်သတင်းစာမှ အယ်ဒီတာ့အာဘော်)
အခြေခံဥပဒေ အကျပ်အတည်းနဲ့ တတိယလမ်း
နိုင်ငံတစ်နိုင်ငံမှာ အရှည်သဖြင့် မကြည့်မမြင် တတ်လို့ပဲဖြစ်ဖြစ်၊ ကြည့်နိုင်မြင်နိုင်စွမ်း မရှိလို့ပဲဖြစ်ဖြစ်၊ ဒါမှမဟုတ် ပညာရှိသတိဖြစ်ခဲ ဆိုသလိုပဲဖြစ်ဖြစ်၊ တမင် ရည်ရွယ်ရင်းကြောင့်ပဲဖြစ်ဖြစ် ဖွဲ့စည်းအုပ်ချုပ်အခြေခံ ဥပဒေရဲ့ အားနည်းချက်များရှိနေခဲ့ရင် အဲဒီနိုင်ငံမှာ မလွဲမသွေ နိုင်ငံရေး အကျပ်အတည်းနဲ့ ကြုံကြိုက်ရလေ့ရှိပါတယ်။
အဲသလို အကျပ်အတည်းမျိုးတွေနဲ့ ရင်ဆိုင်နေရတဲ့ နိုင်ငံတွေကို ပြန်ကြည့်ရင် ဘာသာရေးအရပဲဖြစ်ဖြစ်၊ လူမျိုးရေးအရပဲဖြစ်ဖြစ်၊ နိုင်ငံရေးအရပဲဖြစ်ဖြစ် မတူကွဲပြားသူအချင်းချင်း ငြိမ်းချမ်းစွာ အတူယှဉ်တွဲနေထိုင်ရေးဆိုတဲ့ ဗဟုလူ့အဖွဲ့အစည်းရဲ့ တန်ဖိုးကို မျက်ကွယ်ပြုပြီး မတူကွဲပြားခြားနားသူများအပေါ် ခွဲခြားဆက်ဆံနိုင်ရေး တစ်ခုတည်းအပေါ်မှာ အခြေစိုက်ရေးဆွဲတဲ့ ဖွဲ့စည်းအုပ်ချုပ်ပုံ အခြေခံဥပဒေမျိုး ကျင့်သုံးကြတဲ့နိုင်ငံတွေ ဖြစ်နေတာ သွားတွေ့ရပါတယ်။
ဒီလို အခြေခံဥပဒေအပေါ်မူတည်ပြီး ဖြစ်ပွားရတဲ့ နိုင်ငံရေး၊ ဘာသာရေး ပြဿနာတွေဟာ တခြားပြဿနာတွေထက် ပိုပြီးဖြေရှင်းရ ခက်တတ်ပါတယ်။ ဘာပြုလို့လဲဆိုတော့ ခွဲခြားဆက်ဆံခြင်းဆိုတဲ့ မှားယွင်းတိမ်းစောင်းနေတဲ့အချက်ကို ဥပဒေအရ အတည်ပြုပေးထားတာကြောင့်ပါပဲ။ မှားယွင်း တိမ်းစောင်းနေသည် မှန်သော်ငြားလည်း ဒီအချက်က ဆေးမင်ရည်စုတ်ထိုးဆိုသလို ဥပဒေက အသိအမှတ်ပြု အကာအကွယ် ပေးထားတာဖြစ်လို့ ဖြေရှင်းဆောင်ရွက်တဲ့အခါ တခြား ပြဿနာတွေထက် ပိုပြီး ခက်ခဲရှုပ်ထွေးစေပါတယ်။
အခုဆိုရင် မိမိတို့နိုင်ငံမှာလည်း ဖွဲ့စည်းအုပ်ချုပ်ပုံ အခြေခံဥပဒေဆိုင်ရာ အကျပ်အတည်းကို မျက်မှောက်ပြုနေကြရပါပြီ။ လက်ရှိဖွဲ့စည်းအုပ်ချုပ်ပုံ အခြေခံ ဥပဒေအရ တိုင်းပြည်ရဲ့အာဏာအပိုင်ဆုံး ပုဂ္ဂိုလ်တချို့ကဆိုရင် ဖွဲ့စည်းအုပ်ချုပ်ပုံ အခြေခံဥပဒေရဲ့အခြေခံကျတဲ့အချက်တွေကို ပြင်ချင်ကြဟန် မတူပါဘူး။ ပြင်လို့မရတဲ့ သဘောနဲ့ ပြင်တာကို လက်မခံတဲ့သဘော ပြောကြပါတယ်။ တစ်ခါ တခြားနိုင်ငံရေးအဖွဲ့အစည်းတွေ၊ အရပ်ဘက်အဖွဲ့အစည်းတွေနဲ့ ပြည်သူအများစုကလည်း လက်ရှိ ဖွဲ့စည်းအုပ်ချုပ်ပုံ အခြေခံဥပဒေကို ပြင်ဖို့ လိုအပ်တယ်၊ အထူးသဖြင့် အခြေခံကျတဲ့ ဥပဒေတွေကို မလွဲမသွေ ပြင်မှသာဖြစ်မယ်လို့ ထုတ်ပြောကြပါတယ်။
ခန့်မှန်းခြေအရဆိုရင် မိမိတို့နိုင်ငံရဲ့ ဖွဲ့စည်းအုပ်ချုပ်ပုံ အခြေခံဥပဒေဆိုင်ရာ ပြဿနာရဲ့ ရေချိန်ဟာ ၂၀၁၄ ခုနှစ်အတွင်းမှာပဲ အထွတ်အထိပ်ကို ရောက်လာတော့မယ်လို့ ယူဆရပါတယ်။ ဒီနှစ်အတွင်းမှာပဲ ဖွဲ့စည်းအုပ်ချုပ်ပုံ အခြေခံဥပဒေပြင်ရေးနဲ့ မပြင်ရေး အားပြိုင်မှုဟာ ထိပ်တိုက်တိုးတော့မယ့်သဘော ဦးတည်လာနေတာ တွေ့ရပါတယ်။ မိမိတို့နိုင်ငံရဲ့ နိုင်ငံရေးမိုးတိမ်ဟာ မှောင်မည်းလာဦးတော့မှာလားလို့ စိုးရိမ်မိပါတယ်။
ဒီနေရာမှာ ပြင်ရေးနဲ့ မပြင်ရေး ဘက်နှစ်ဘက်ရှိတဲ့ အနေအထားမှာ ဒီပြဿနာကို ဘယ်လိုဖြေရှင်းပြီးမှ တိုင်းပြည်အပေါ် ကျရောက်လာမယ့် နိုင်ငံရေးမိုးတိမ်ကို ဖယ်ရှားသင့်သလဲ။ ဘယ်နည်းက အညင်သာဆုံးနဲ့ အပွန်းအပဲ့ အနည်းဆုံး ဖြစ်မလည်း။ နှစ်ဦးနှစ်ဖက်ကြားမှာ တွေ့ဆုံဆွေးနွေးမှုနဲ့ ပွင့်လင်းမြင်သာမှု တည်ဆောက်မှ ဖြစ်ပါလိမ့်မယ်။
တွေ့ဆုံဆွေးနွေးတဲ့အခါမှာလည်း နှစ်ဦးနှစ်ဖက်စလုံး အကျိုးရှိမယ့်၊ နှစ်ဦးနှစ်ဖက်စလုံး မထိခိုက်စေနိုင်တဲ့ အပေးအယူရှိတဲ့ တတိယလမ်းကို ရွေးကြရမှာပါ။ တစ်ဦးရှင်ပြီး တစ်ဦးကွယ်ပျောက်ရမယ့်လမ်း၊ တစ်ဦးအတွက် လုံခြုံပြီး ကျန်တစ်ဦးအတွက် မလုံခြုံတဲ့လမ်းတွေကို ရှောင်ရှားဆွေးနွေးကြရပါလိမ့်မယ်။ ပြင်ရေးနဲ့ မပြင်ရေး လမ်းနှစ်လမ်းနဲ့ မတူတဲ့ အခြား တတိယလမ်းသစ်ကို နှစ်ဖက် ပူးတွဲ ဖောက်လုပ်ရပါလိမ့်မယ်။
နိဂုံးချုပ်ရမည်ဆိုလျင် လက်ရှိဖွဲ့စည်းအုပ်ချုပ်ပုံ အခြေခံဥပဒေမှာ ယခု မပြင်လည်း နောင်အခါ မလွဲမသွေ ပြင်ကြရမယ့် ဖွဲ့စည်းပုံ ဖြစ်ပါတယ်။ ဒါကြောင့်မို့ ခုရှုပ်မှ နောင်ရှင်းဆိုသလို ဖွဲ့စည်းအုပ်ချုပ်ပုံ အခြေခံဥပဒေကို မိမိတို့ သမိုင်းပေးတာဝန်အရ ပြင်ကြဆင်ကြရမယ်ဆိုရင် တွေ့ဆုံဆွေးနွေးခြင်း၊ ဘယ်သူမှမနိုင် ဘယ်သူမှ မရှုံးသည့် နည်းကို ရွေးခြင်းနှင့် အပြန်အလှန် အာမခံချက်ပေး၊ အပြန်အလှန် အသိအမှတ်ပြုသည့် အခြေခံဖြစ်သည့် တတိယလမ်းကိုသာ ရွေးချယ်ကြဖို့ လိုအပ်ကြောင်း တိုက်တွန်းအပ်ပါတယ်။
from Mizzima - News in Burmese's Facebook Wall http://ift.tt/1mjQUtg
Comments
Post a Comment